វត្តមួយនៅព្រៃវែង ដាំបន្លែ និងផ្លែឈើជាង១០ឆ្នាំហើយ សម្រាប់ផ្គត់ផ្គង់ព្រះសង្ឃ

ជាតិ

សង្គមជាតិ

វត្តមួយនៅព្រៃវែង ដាំបន្លែ និងផ្លែឈើជាង១០ឆ្នាំហើយ សម្រាប់ផ្គត់ផ្គង់ព្រះសង្ឃ

10, Apr 2020 , 8:59 am

រូបភាព

ដោយ:

ភ្នំពេញ៖ វត្តសិរិសាគរដូនស្តើង នៅខេត្តព្រៃវែង បានដាំបន្លែ និងផ្លែឈើជាច្រើនប្រភេទ សម្រាប់ទុកធ្វើជាស្បៀងអាហារសម្រាប់ឲ្យព្រះសង្ឃ ក្នុងវត្តនេះ។ បន្លែ និងផ្លៃឈើមួយចំណែកទៀត សម្រាប់ចែកជូនដល់ពុទ្ធបរិស័ទចំណុះជើងវត្ត ដែលប្រឈមនឹងវិបត្តិជំងឺកូវីដ-១៩។

ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទ ព្រះតេជគុណ អ៊ឹម ទៀង ព្រះគ្រូចៅអធិការវត្តសិរិសាគរដូនស្តើង មានសង្ឃដីកាថា បន្លែ និងផ្លែឈើជាច្រើនមុខ បានដាំនៅក្នុងបរិវេណវត្តមាន ដូចជា ស្ពៃ ត្រកួន ផ្ទី ខាត់ណា ត្រប់ ប៉េងប៉ោះ ពោត ស្លឹកគ្រៃ ល្ពៅ ដូងក្រអូប ព្រលិត រំចង់ ចេក ខ្នុរ ស្វាយ ជម្ពូ និង ល្ហុង ជាដើម ដែលសុទ្ធតែជាដំណាំប្រើជីធម្មជាតិ។ ព្រះតេជគុណ បន្តថា បន្លែ និងផ្លែឈើទាំងអស់គឺដាំជាង១០ឆ្នាំមកហើយ ដែលដាំដោយព្រះសង្ឃ នៅក្នុងវត្តនេះ។

ព្រះអង្គ បន្ថែមថា ក្រៅពីដាំបន្លែ និងផ្លែឈើក្នុងទំហំបណ្តោយ៥០ម៉ែត្រ និងទទឹងជាង១០ម៉ែត្រ ក៏មានដាំប្រភេទផ្កាសម្រាប់បណ្តេញសត្វល្អិតមិនឲ្យបំផ្លាញបន្លែ និងបានដាំដើមឈើជាច្រើនដើមផងដែរ។ លើសពីនេះ ព្រះអង្គ បានដឹកនាំព្រះសង្ឃដែលគង់នៅក្នុងវត្តនេះ ធ្វើស្រែចម្ការសម្រាប់ផ្គត់ផ្គង់ដល់ជីវភាពរស់នៅរបស់ព្រះសង្ឃផងដែរ។

ព្រះគ្រូចៅអធិការវត្ត មានសង្ឃដីកាទៀត ផលដំណាំទាំងអស់សម្រាប់ផ្គត់ផ្គង់ព្រះសង្ឃក្នុងវត្ត នេះ និងទុកសម្រាប់ចែកជូនដល់ពុទ្ធបរិស័ទ និងអ្នកដែលខ្វះខាត ពិសេសស្ថិតក្នុងស្ថានភាពមានជំងឺកូវីដ-១៩។ ព្រះអង្គ មានថេរដីកាថា៖«មានបន្លែ និងផ្លែឈើដែលយើងឆាន់អត់ទាន់ គឺសម្រាប់ចែកជូនដល់ប្រជាពលរដ្ឋដែលនៅក្បែរមូលដ្ឋាន និងអ្នកដែលមកពីចម្ងាយក៏យើងចែកជូនដល់គាត់ផងដែរ។ ដល់ពេលធ្លាក់ភ្លៀងមក អាត្មាចែកពូជស្រូវដល់ប្រជាជន ហើយពូជបន្លែរបស់យើងក៏បន្សាំទុកឲ្យគាត់ផងដែរ»។

ព្រះអង្គ លើកឡើងថា គ្រប់ពុទ្ធបរិស័ទដែលចង់ឈ្វេងយល់ពីវិធីដាំបន្លែធម្មជាតិ វត្តរបស់ព្រះអង្គ ក៏អាចចែករំលែកពីពិធីដាំឲ្យទទួលបានផលល្អផងដែរ។ ព្រះអង្គ បញ្ជាក់ថា៖«ការដាំបន្លែធម្មជាតិ ធ្វើឲ្យព្រះសង្ឃ ពុទ្ធបរិស័ទ និងមនុស្សដែលរស់នៅក្នុងវត្តហ្នឹង ធ្វើពលកម្មបញ្ចេញញើស។ ហើយបានជាគំរូដល់បរិស័ទទាំងឡាយដែលអាចបង្កបង្កើតសេដ្ឋកិច្ចមូលដ្ឋានគ្រួសារដោយការដាំបន្លែធម្មជាតិ និងជាមេរៀនមួយសម្រាប់ពួកគាត់នៅថ្ងៃក្រោយផងដែរ»៕