COVID-19
អន្តរជាតិ
ប៉ូលិសអង់គ្លេសឈរការពារខាងមុខមន្ទីរពេទ្យ St Thomas ដែលនាយករដ្ឋមន្រ្តី បូរីស ចនសុន សម្រាកព្យាបាល COVID-19។ រូបភាព AFP
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីចក្រភពអង់គ្លេស លោក បូរីស ចនសុន បានចាកចេញពីបន្ទប់សង្គ្រោះហើយក្រោយសា្នក់នៅអស់បីយប់ បន្ទាប់ពីស្ថានភាពជំងឺ COVID-19 របស់លោកមិនធូរស្រាល។ យ៉ាងណាមិញ លោកនឹងស្នាក់នៅមន្ទីរពេទ្យក្នុងទីក្រុងឡុងដ៍មួយរយៈទៀតដើម្បីការព្យាបាលបន្តដោយក្រុមគ្រូពេទ្យអង់គ្លេស។ ចំណែកស្ថានការណ៍ COVID-19 នៅអង់គ្លេស ក៏នៅតែយ៉ាប់យ៉ឺនដោយចំនួនករណីឆ្លងថ្មី និងអ្នកស្លាប់បន្តកើនឡើង។
បើតាមការិយាល័យនាយករដ្ឋមន្ត្រីអង់គ្លេស លោក បូរីស ចនសុន ត្រូវបានផ្ទេរពីបន្ទប់សង្គ្រោះ ICU ទៅកាន់បន្ទប់សម្រាកធម្មតាវិញល្ងាចថ្ងៃទី៩ ខែមេសា (ម៉ោងចក្រភពអង់គ្លេស)។ ទោះសុខភាពរបស់លោកបានធូរស្រាលបន្តិច ក្រុមគ្រូពេទ្យអង់គ្លេស នឹងបន្តតាមដានឲ្យជាប់លាប់ព្រោះលោកស្ថិតក្នុងដំណាក់កាលដំបូងមុនឈានទៅដល់ការសះស្បើយ។
«លោកមានព្រលឹងព្រលះល្អណាស់។» នេះជាការបញ្ជាក់របស់ការិយាល័យនាយករដ្ឋមន្ត្រីអង់គ្លេស Downing Street ។ លោក ចនសុន ត្រូវបញ្ជូនទៅកាន់បន្ទប់ ICU នៃមន្ទីរពេទ្យ St Thomas កាលពីដើមសប្ដាហ៍នេះ ក្រោយពេលអាការ COVID-19 នៅតែមានក្នុងខ្លួនរបស់លោក ទោះជាបាននៅដោយឡែកតាមគោលការណ៍ពេទ្យហើយនោះ។ លោកថែមទាំងត្រូវការបំពាក់អុកស៊ីសែនជំនួយការដកដង្ហើមទៀតផង។
ខណៈមុខព្រួញបាញ់ទៅរកស្ថានភាពលោក ចនសុន នោះ ស្ថានភាព COVID-19 នៅចក្រភពអង់គ្លេស ក៏មិនទាន់ថមថយនៅឡើយ។ គិតត្រឹមពេលនេះ អង់គ្លេសមានករណីឆ្លងទាំងអស់ជាង៦៥០០០នាក់។ ករណីស្លាប់ឡើងដល់៧៩៨៩នាក់ ក្រោយការរាយការណ៍ករណីស្លាប់ថ្មីចំនួន៨៨១នាក់នៅថ្ងៃទី៩ ខែមេសា។ នេះបើតាមទីភ្នាក់ងារព័ត៌មាន AFP ។
ដើម្បីទប់ស្កាត់ករណីឆ្លងថែមទៀត មន្ត្រីរដ្ឋាភិបាលអង់គ្លេស កំពុងពិចារណាពន្យារពេលអនុវត្តវិធានការគម្លាតសង្គមតឹងរ៉ឹងរយៈពេលយូរទៀត។ ដំបូង អង់គ្លេស គ្រោងអនុវត្តវិធានការនេះ៣សប្ដាហ៍ ប៉ុន្តែស្ថានការណ៍មិនធូរស្រាល វិធានការដែលនឹងអស់សុពលភាពនៅថ្ងៃទី១៣ ខែមេសា ទំនងជាត្រូវបន្តទៀត។
រដ្ឋមន្ត្រីការបរទេស Dominic Raab ដែលកំពុងជួយចាត់ចែងកិច្ចការប្រទេសជាតិនោះ និយាយថា វិធានការនេះ ទំនងជាមិនទាន់អាចផ្អាកឡើយ ព្រោះអ្នកស្លាប់នៅតែមាន ហើយករណីឆ្លងមិនទាន់់ឡើងដល់ចំណុចកំពូលនៅឡើយ៕
Tag:
អង់គ្លេស
COVID-19
បូរីស ចនសុន
© រក្សាសិទ្ធិដោយ thmeythmey.com
