ជាតិ
គណៈកម្មការវត្តអធ្វា នៅតែរៀបចំពិធីពូនភ្នំខ្សាច់១០០ បួងសួងសុំសេចក្ដីសុខ
×![]()
សៀមរាប៖ គណៈកម្មការវត្តអធ្វា ដែលមានការព្រមព្រៀងពីប្រជាពលរដ្ឋក្នុងភូមិក្រសាំងរលើង សង្កាត់សៀមរាប ក្រុងសៀមរាប គ្រោងរៀបចំពិធីពូនភ្នំខ្សាច់១០០ ក្នុងបំណងដើម្បីបួងសួងសុំសេចក្ដីសុខ និងបញ្ជៀសជំងឺកាចសាហាវទាំងឡាយដែលប្រទេសកម្ពុជាកំពុងជួបប្រទះ។
ចាស់ទុំដែលផ្តួចផ្ដើមឱ្យមានពិធីពូនភ្នំខ្សាច់១០០មួយរូប លោក ម៉ម ម៉ៃ បានឱ្យដឹងថា ពិធីពូនភ្នំខ្សាច់គឺជាទំនៀមដែលតែងធ្វើរៀងរាល់ថ្ងៃទី១នៃពិធីបុណ្យចូលឆ្នាំប្រពៃណីជាតិ គ្រាន់តែថា រាល់ឆ្នាំពិធីនេះធ្វើធម្មតា មិនមានរៀបអាសនៈ៥ថ្នាក់ដូចឆ្នាំនេះទេ។ គណៈកម្មការវត្តកំពុងមមាញឹករៀបចំរោងអាសនៈ៥ថ្នាក់ សម្រាប់រៀបចំពិធីពូនភ្នំខ្សាច់១០០ នៅបរិវេណវត្តអធ្វា។
តាមការបញ្ជាក់របស់ ម៉ម ម៉ៃ អ្នកភូមិមានជំងឺរៀបចំពិធីខាងលើនេះតាំងពីដូនតាមក ហើយបើមិនធ្វើដូចមិនអស់ចិត្ត ទើបសម្រេចចិត្តធ្វើខានតែបាន ក្នុងបំណងសុំសេចក្ដីសុខជូនដល់ប្រជាពលរដ្ឋខ្មែរទូទាំងប្រទេស និងសុំឱ្យជំងឺកាចសាហាវរលាយបាត់ពីប្រទេសឆាប់ៗ។ ជំងឺកាចសាហាវដែលលោក ម៉ម ម៉ៃ សំដៅនោះ គឺកូវីដ១៩។ លោកបន្ថែមថា តាំងពីដើមចាស់ៗក្នុងភូមិបានរៀបចំពិធីនេះរាល់ពេលមានសង្គ្រាម អាសន្នធំៗ និងជំងឺអាសន្នរោគជាដើម ហើយតែងសមប្រកបដូចអ្វីដែលបានបួងសួង។
យ៉ាងណាក៏ដោយ លោក ម៉ម ម៉ៃ ពន្យល់ថាពិធីនៅឆ្នាំនេះលោកមិនសូវចង់ឱ្យពលរដ្ឋចូលរួមច្រើនទេ ហើយក៏បានត្រៀមរៀបចំឱ្យពលរដ្ឋអង្គុយបួងសួងនៅឆ្ងាយៗពីគ្នាផងដែរ ដើម្បីការពារឆ្លងជំងឺជាយថាហេតុ។ លោកបន្ថែមថា ពិធីនេះមិនមែនធ្វើដើម្បីបំពានទៅនឹងបម្រាមរាជការទេ គឺមានការសុំអនុញ្ញាតត្រឹមត្រូវពីអាជ្ញាធរ ដើម្បីឱ្យពលរដ្ឋបានប្រតិបត្តិតាមជំនឿពីបុរាណកាលមក៕
Tag:
ពូនភ្នំខ្សាច់១០០
វត្តអធ្វា
© រក្សាសិទ្ធិដោយ thmeythmey.com
