ជាតិ
បំបាត់អផ្សុកពេលនៅផ្ទះ! យករូបចាស់មកធៀប ហើយ «Challenge» គ្នាតាមហ្វេសប៊ុក!
×![]()
ភ្នំពេញ៖ កូវីដ-១៩ ធ្វើឱ្យពលរដ្ឋជាច្រើន បង្ខំចិត្តនៅផ្ទះដោយមិនអាចដើរកម្សាន្ត ចេញក្រៅឬជួបជុំមិត្តភក្តិបាននោះឡើយ។ អផ្សុកមែនទេ? ឆ្លៀតពេលទំនេរពីការងារដែលបំពេញពីផ្ទះ អ្នកប្រើប្រាស់បណ្តាញសង្គមហ្វេសប៊ុក ក៏បានឆ្លៀតបង្កើតកម្មវិធីកម្សាន្តផ្សេងៗ ដើម្បីបំបាត់ការអផ្សុករបស់ខ្លួនក្នុងនោះ ដូចជា ការយករូបថតចាស់មកប្រៀបធៀបជាមួយរូបបច្ចុប្បន្ន ការបង្ហាញក្បួនអនាម័យទប់ទល់កូវីដ-១៩។ ពួកគេក៏បានហៅមិត្តភក្តិ (Tag) ឲ្យចូលរួមជាមួយខ្លួនផងដែរ ដែលមានន័យជាភាសាអង់គ្លេសថា «Challenge»។
ជាការកម្សាន្តម្យ៉ាង ដែលមើលទៅគួរឲ្យអស់សំណើច និងធ្វើឱ្យអ្នកលេងអាចរំលឹកពីអនុស្សាវរីពីកុមារភាព ដោយសារពួកគេយករូបថតពីកុមារមកប្រៀបធៀបជាមួយនឹងរូបថតបច្ចុប្បន្ន ដែលមើលទៅមានស្ទាយថតស្រដៀងគ្នា យកបង្ហោះលើហ្វេសប៊ុករបស់ខ្លួន និងបានអញ្ជើញមិត្តភក្តិដទៃទៀតលេងបន្ត។
មិនត្រឹមតែប៉ុណ្ណោះ យុវជនខ្លះក៏បានបង្ហោះរូបថត «Challenge»របស់ខ្លួនដោយភ្ជាប់ជាមួយសំណេរអប់រំពីជំងឺកូវីដ-១៩ទៀតផង ដែលធ្វើឲ្យការលេង «Challenge»បៀបធៀបរូបនេះ ដូចជាការរំលឹកខ្លួនឯង និងអ្នកដទៃឲ្យមានការប្រុងប្រយ័ត្នពីជំងឺកូវីដ-១៩។
«កុំភ្លេចលាងសម្អាតដៃ និងពាក់ម៉ាស់ឲ្យត្រឹមត្រូវ ដើម្បីបង្ការការឆ្លងជំងឺកូវីដ-១៩ , កុំដើម្បីតែការជួបជុំម្តងនេះ ធ្វើឲ្យបាត់បង់ការជួបជុំជារៀងរហូត, ចូលឆ្នាំនៅផ្ទះដើម្បីរក្សាសុខភាពទាំងអស់គ្នា»។ នេះជាសំណេរក្នុងហ្វេសប៊ុករបស់អ្នកលេង«Challenge »ប្រៀបធៀបរូប ក្នុងន័យចូលរួមបង្ការជំងឺកូវីដ-១៩។
«Challenge» បៀបធៀបរូប ជាល្បែងកម្សាន្តមួយកំពុងពេញនិយមលើហ្វេសប៊ុក ដោយតម្រូវឲ្យអ្នកលេងត្រូវយករូបថតពីក្មេងមកប្រៀបធៀបជាមួយរូបបច្ចុប្បន្ន និងត្រូវអញ្ជើញមិត្តភក្កិរបស់ខ្លួនលេងបន្ត។
មិនមែនតែពលរដ្ឋខ្មែរនោះឡើយ សូម្បីតែលោក Tedros Adhanom Ghebryesus អគ្គនាយកអង្គការសុខភាពពិភពលោក ក៏បានបង្កើត «Safe Hands Challenge» ដែលបង្ហាញពីការលាងដៃ ផងដែរ។ លោកបានហៅឥស្សរជន និងតារាល្បីៗជាច្រើនទៀតចូលរួម ក្នុងនោះមានតារាសម្តែងដ៏ល្បីល្បាញឥណ្ឌា Priyanka Chopra ជាដើម៕
© រក្សាសិទ្ធិដោយ thmeythmey.com
