ជាតិ
សង្ក្រាន្តឆ្នាំជូត ដែលមានទេវធីតា «គោរាគៈទេវី» ចូលមកដល់នាម៉ោង៨ និង៤៨នាទីយប់នេះ
លោក អ៊ឹម បុរិន្ទ អ្នកចងក្រងសៀវភៅ មហាសង្ក្រាន្ត
×![]()
ដោយ: រួបរួម
សង្ក្រាន្តឆ្នាំជូត ទោស័ក នឹងចូលមកដល់នៅថ្ងៃចន្ទ ៦រោច ខែចេត្រ ត្រូវនឹងថ្ងៃទី១៣ ខែមេសា ឆ្នាំ២០២០។ បុត្រីទី២នៃកបិលមហាព្រហ្ម ព្រះនាម «គោរាគៈទេវី» មានតួនាទីជាមគ្គនាយិកាដែលត្រូវគ្រប់គ្រងជម្ពូទ្វីប។ នេះបើតាមក្បួនតម្រាក្នុងសៀវភៅមហាសង្ក្រាន្តរបស់លោក អ៊ឹម បុរិន្ទ សមាជិកគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ។
ព្រះនាង «គោរាគៈទេវី» ដែលបន្តតំណែងពីព្រះនាង «ធុង្សៈទេវី» ទ្រង់អម្ពរពណ៌លឿង លម្អនៅព្រះកាណ៌ដោយផ្កាអង្អារបុស្ស។ ព្រះនាងសោយ តេលំ ជាអាហារ។ តេលំជាប្រភេទប្រេងរុក្ខជាតិ (សណ្តែក ល្ង ដូង...)។ ដោយគង់លើស្តេចខ្លា (ព្យាគ្ឃៈ) ទេវធីតាអង្គនេះ មានព្រះហស្តស្តាំទ្រង់ព្រះខ័ន និងព្រះហស្តឆ្វេងទ្រង់ឈើច្រត់។
ក្បួនតម្រាដែលគន់គូរដោយលោក អ៊ឹម បុរិន្ទ បង្ហាញថា ពិធីចូលឆ្នាំនេះ មានរយៈពេល៤ថ្ងៃ។ ថ្ងៃទី១ ដែលចំថ្ងែចន្ទ ៦រោច ខែចេត្រ ត្រូវនឹងថ្ងៃទី១៣ ខែមេសា ជាវារៈមហាសង្ក្រាន្ត។ ថ្ងៃវារៈវ័នបត មានដល់ទៅ២ថ្ងៃ គឺថ្ងៃទី១៤ និងទី១៥ ខែមេសា។ ឈានចូលថ្ងៃព្រហស្បត៍ ៩ រោច ខែ ចេត្រ ត្រូវនឹងថ្ងៃទី ១៦ ខែ មេសា ឆ្នាំ២០២០ នៅវេលាម៉ោង ១ និង ២៤ នាទី ៣៦ វិនាទី ជាថ្ងៃវារៈឡើងស័ក ។
រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយសម្រាប់គ្រឿងពលីការផ្សេងៗ ។ ចំពោះកម្រាល អ្នកស្រាវជ្រាវវិជ្ជាហោរាសាស្ត្រ ផ្តល់យោបល់ថា គួរប្រើពណ៌លឿង ព្រោះទេវធីតា ឆ្នាំនេះ គ្រងអម្ពរពណ៌លឿង។
ជាមួយនឹងគ្រឿងរណ្តាប់ទៅតាមលំនាំបុរាណ ពលរដ្ឋអាចរៀបផ្លែឈើពី៣ ទៅ៥មុខ ទៅតាមធនធានរបស់ខ្លួន។ តេលំ ដែលជាប្រភេទប្រេង សណ្តែក ល្ង ដូង ក៏ត្រូវរៀបចំជារណ្តាប់ទទួលទេវធីតាឆ្នាំនេះផងដែរ។
ឆ្នាំថ្មីនាឱកាសនេះ ប្រព្រឹត្តខណៈពិភពលោក ក៏ដូចជាប្រទេសកម្ពុជា កំពុងរងនូវការរាតត្បាតជំងឺផ្លូវដណ្តើម COVID-19 ដូច្នេះរដ្ឋាភិបាលបានសម្រេចលុបចោលការធ្វើដំណើរទៅលេងស្រុក និងការប្រារព្ធពិធីនៅទីនានា ដើម្បីទប់ស្កាត់ការរាលដាលជំងឺនេះ។ ទោះបីជាយ៉ាងណាក៏ដោយ ពុទ្ធសាសនិកជននៅតែអាចប្រារព្ធពិធីទទួលទេវតានៅតាមគេហដ្ឋាន ឬកន្លែងដែលខ្លួនកំពុងរស់នៅរៀងៗខ្លួន ជាមួយនឹងការប្រយ័ត្នប្រយែងខ្ពស់។
នាឱកាសសង្ក្រាន្តទាំង៤ថ្ងៃ អ្នកចងក្រងសៀវភៅមហាសង្ក្រាន្ត លោក អ៊ឹម បុរិន្ទ ក៏រំលឹកដល់ពលរដ្ឋប្រុសស្រីទាំងអស់ ខំលះបង់ចិត្តអាក្រក់ដែលជាប់ដោយគំនុំគំគួនព្យាបាទ ដែលកើតមាននៅឆ្នាំចាស់ ឲ្យជ្រះស្រឡះ ហើយតាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និងបញ្ញា៕
© រក្សាសិទ្ធិដោយ thmeythmey.com
