ប៉េកាំង សន្យាថែទាំងពលរដ្ឋអាហ្វ្រិកនៅចិនឲ្យបានល្អ ក្រោយរងការរើសអើងព្រោះ COVID-19

COVID-19

អន្តរជាតិ

ប៉េកាំង សន្យាថែទាំងពលរដ្ឋអាហ្វ្រិកនៅចិនឲ្យបានល្អ ក្រោយរងការរើសអើងព្រោះ COVID-19

13, Apr 2020 , 2:45 pm

រូបភាព

ដោយ: តន ចាន់រិទ្ធារ៉ា

ទីក្រុងប៉េកាំង នៅថ្ងៃទី១២ ខែមេសា បានបង្ហាញការប្ដេជ្ញាចិត្តរបស់ខ្លួនក្នុងការផ្ដល់ការថែទាំ និងសម្រួលការរស់នៅរបស់ពលរដ្ឋអាហ្វ្រិកដែលរស់នៅក្នុងទឹកដីចិន ក្រោយមានរបាយការណ៍ទាក់ទងការរើសអើងពួកគេ។ អគ្គរដ្ឋទូតប្រទេសអាហ្វ្រិកប្រចាំប៉េកាំង បានសរសេរលិខិតតវ៉ាទៅកាន់រដ្ឋមន្ត្រីការបរទេសចិន វ៉ាង យី ដើម្បីស្នើឲ្យដោះស្រាយការរើសអើងនេះ ដែលកើតឡើងជាបន្តបន្ទាប់នៅឯទីក្រុងគ័ងចូវដែលសម្បូរសហគមន៍ពលរដ្ឋអាហ្វ្រិក។

នៅទីក្រុងគ័ងចូវ ខេត្តគ័ងតុង ប្រជាជនចំណាកស្រុកអាហ្វ្រិក ក្លាយជាមុខសញ្ញានៃការរើសអើង និងការសង្ស័យថា ពួកគេជាអ្នកនាំជំងឺ COVID-19 ចូលទឹកដីចិន។ នៅក្នុងទីក្រុងឧស្សាហកម្មដែលមានប្រជាជនប្រមាណ១៥លាននាក់នេះ ពលរដ្ឋអាហ្វ្រិកទាំងនោះ ត្រូវបានបង្ខំឲ្យរើឥវ៉ាន់ចេញពីផ្ទះជួល ត្រូវដាក់នៅដោយឡែកដោយបង្ខំ និងត្រូវធ្វើតេស្តរក COVID-19 ជាច្រើនលើកច្រើនសារ តែមិនទទួលបានលទ្ធផលជាដើម។

ដើមហេតុនៃសកម្មភាពរើសអើងទាំងនេះដែលរាប់ទាំងការមិនអនុញ្ញាតឲ្យស្នាក់នៅតាមសណ្ឋាគារផងនោះ ទំនងជាចាប់ផ្ដើមបន្ទាប់ពីការរកឃើញករណីឆ្លង COVID ក្នុងសហគមន៍ប្រជាជននីហ្សេរីយ៉ា។ ទាំងប្រជាជនចិន ទាំងមន្ត្រីសុខាភិបាលផងនោះ ហាក់រើសអើសពលរដ្ឋអាហ្វ្រិកទាំងនេះខ្លាំង។

ស្ថានទូតអាហ្វ្រិកនៅចិន ក៏នាំគ្នាសរសេរលិខិតផ្ញើឲ្យលោក វ៉ាង យី រដ្ឋមន្ត្រីការបរទេសចិនដើម្បីដោះស្រាយបញ្ហា ដោយពួកគេអះអាងថា សកម្មភាពបែបនោះ នាំឲ្យមានអារម្មណ៍ថា ពលរដ្ឋអាហ្វ្រិកជាអ្នកចម្លងវីរុស។ ក្រុមអគ្គរដ្ឋទូតប្រទេសអាហ្វ្រិក ក៏ទទូចឲ្យរដ្ឋាភិបាលចិន ប្រញាប់បញ្ឈប់សកម្មភាពរើសអើងប្រឆាំងប្រជាជនអាហ្វ្រិក។ នេះបើតាមការផ្សាយរបស់ទីភ្នាក់ងារព័ត៌មាន AFP ។ អាមេរិកឯណោះវិញ ចាត់ទុកទង្វើនេះជាការបង្កើតការស្អប់ខ្ពើមពលរដ្ឋអាហ្វ្រិកទៅទៀត។

អ្នកនាំពាក្យក្រសួងការបរទេស Zhao Lijian ក៏ចេញសេចក្ដីប្រកាសដោយបង្ហាញពីជំហររបស់ចិនក្នុងការគោរពសិទ្ធិពលរដ្ឋអាហ្វ្រិកទាំងនោះ។ ក្នុងសេចក្ដីប្រកាសថ្ងៃទី១២ ខែមេសា លោក Zhao និយាយថា ចិនឲ្យតម្លៃយ៉ាងខ្លាំងចំពោះជីវិត និងសុខភាពជនបរទេសទាំងអស់នៅលើទឹកដីខ្លួន ចំណែកខេត្តគ័ងតុងវិញ ក៏ឲ្យតម្លៃដូចគ្នាលើការក្ដីបារម្ភរបស់ប្រទេសអាហ្វ្រិកខ្លះ ហើយក៏កំពុងញាប់ដៃជើងដើម្បីដោះស្រាយបញ្ហានេះ។

«ទំនាក់ទំនងចិន-អាហ្វ្រិក មិនអាចបំបែកបានឡើយព្រោះបានចាក់ឬសយ៉ាងជ្រៅ។» អ្នកនាំពាក្យក្រសួងការបរទេសចិនខាងលើលើកឡើងបែបនេះ ហើយបញ្ជាក់ថា អាជ្ញាធរខេត្តគ័ងតុងមិនទទួលយកការរើសអើងពណ៌សម្បុរអ្វីឡើយ៕