អេសស៊ីជី បរិច្ចាគប្រអប់សុវត្ថិភាពវេជ្ជសាស្ត្រដល់ក្រសួងសុខាភិបាល សម្រាប់ការប្រយុទ្ធប្រឆាំងវីរុសកូវីដ១៩

អត្ថបទពាណិជ្ជកម្ម

អេសស៊ីជី បរិច្ចាគប្រអប់សុវត្ថិភាពវេជ្ជសាស្ត្រដល់ក្រសួងសុខាភិបាល សម្រាប់ការប្រយុទ្ធប្រឆាំងវីរុសកូវីដ១៩

15, Apr 2020 , 2:43 pm

រូបភាព

ដោយ: ថ្មីៗ

រាជធានីភ្នំពេញ, ថ្ងៃទី១៥ ខែមេសា ឆ្នាំ២០២០ - ក្រុមហ៊ុន អេសស៊ីជី (SCG) ជាក្រុមហ៊ុនឧស្សាហកម្មឈានមុខគេមួយនៅក្នុងតំបន់អាស៊ាន បានបរិច្ចាគប្រអប់សុវត្ថិភាពវេជ្ជសាស្ត្រ (surgical shield box) ចំនួន៥០ឈុត ដល់ក្រសួងសុខាភិបាលកម្ពុជា ដើម្បីចូលរួមចំណែកក្នុងការប្រយុទ្ធប្រឆាំងការឆ្លងរាលដាលនៃវីរុសកូវីដ១៩។

ប្រអប់សុវត្ថិភាពវេជ្ជសាស្ត្រទាំងនេះ ផលិតឡើងសម្រាប់បុគ្គលិកវេជ្ជសាស្ត្រជួរមុខប្រើប្រាស់ ប្រយុទ្ធប្រឆាំងវីរុសកូវីដ១៩ ត្រូវបានប្រគល់ជូនតំណាងក្រសួងសុខាភិបាល នៅថ្ងៃនេះ នៅឯទីស្ដីការក្រសួង។

លោក គិត គឹមអ៊ន តំណាងរបស់នាយកក្រុមហ៊ុន អេសស៊ីជី ប្រចាំកម្ពុជា បានមានប្រសាសន៍ថា ក្រុមហ៊ុនយល់ច្បាស់អំពីសារសំខាន់នៃការងាររបស់បុគ្គលិកវេជ្ជសាស្ត្រជួរមុខរបស់កម្ពុជា នៅក្នុងការប្រយុទ្ធប្រឆាំងវីរុសកូវីដ១៩ ដូច្នេះក្រុមហ៊ុនបានរិះគិតរកវិធីជួយដល់ពួកគាត់។

លោក គិត គឹមអ៊ន ថ្លែងយ៉ាងដូច្នេះ ៖ «យើងធ្វើអាជីវកម្មនៅកម្ពុជា ដូច្នេះ យើងយកចិត្តទុកដាក់ចំពោះប្រជាជនកម្ពុជា។ ទោះបីចំនួនករណីឆ្លងកូវីដ១៩ នៅទីនេះ មិនទាន់ខ្ពស់ក៏ដោយ យើងគិតថា យើងត្រូវរិះគិតចាត់វិធានការឲ្យបានមុន ដើម្បីជួយការពារដល់បុគ្គលិកវេជ្ជសាស្ត្រ ពីព្រោះពួកគាត់ជាអ្នកប្រយុទ្ធជួរមុខ ដែលធ្វើការប៉ះពាល់ផ្ទាល់ជាមួយនឹងអ្នកជំងឺ»។

លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល ដែលបានទទួលយកអំណោយពីតំណាងក្រុមហ៊ុន អេសស៊ីជី ជំនួសមុខឲ្យរដ្ឋមន្ត្រីក្រសួងសុខាភិបាល បានថ្លែងអំណរគុណដល់ក្រុមហ៊ុន អេសស៊ីជី ដែលបានចែករំលែកចូលរួមជាមួយក្រសួង ក៏ដូចជា

រាជរដ្ឋាភិបាលកម្ពុជា នៅក្នុងការប្រយុទ្ធប្រឆាំងការឆ្លងរាលដាលនៃវីរុសកូវីដ១៩ នៅកម្ពុជា។

ប្រអប់សុវត្ថិភាពវេជ្ជសាស្ត្រ (surgical shield box) នេះ រចនាឡើងសម្រាប់វេជ្ជបណ្ឌិតនិងបុគ្គលិកពេទ្យប្រើប្រាស់ ដើម្បីការពារខ្លួនពួកគាត់ពីហានិភ័យឆ្លងជំងឺ នៅពេលធ្វើការផ្ទាល់ជាមួយនឹងអ្នកជំងឺកូវីដ១៩។

គិតត្រឹមថ្ងៃទី១៥ ខែមេសា ឆ្នាំ២០២០ ប្រទេសកម្ពុជាមានករណីឆ្លងវីរុសកូវីដ១៩ សរុបចំនួន ១២២នាក់ ក្នុងនោះព្យាបាលជាសះស្បើយចំនួន ៩៦នាក់ និងពុំទាន់ករណីស្លាប់នៅឡើយទេ។

រាជរដ្ឋាភិបាលកម្ពុជាបានប្រកាសស្វាគមន៍ជំនួយនិងអំណោយពីសប្បុរសជន និងក្រុមហ៊ុននានា សម្រាប់បុព្វហេតុប្រយុទ្ធប្រឆាំងនឹងវីរុសកូវីដ១៩ ហើយកន្លងមក មន្ត្រីរដ្ឋាភិបាលជាច្រើន រួមទាំងសម្ដេចនាយករដ្ឋមន្ត្រីផ្ទាល់ផង បានរួមចំណែកបរិច្ចាគថវិកា សម្រាប់កិច្ចប្រឹងប្រែងនេះ។