អន្តរជាតិ
មេបក្សប្រឆាំងកូរ៉េខាងត្បូង លាលែងពីតំណែងក្រោយបរាជ័យការបោះឆ្នោតសភា លោក វ៉ាង ក្យូអាន មេបក្សប្រឆាំងធំជាងគេនៅកូរ៉េខាងត្បូង លាលែងពីតំណែងដើម្បីទទួលខុសត្រូវចំពោះបរាជ័យក្នុងការបោះឆ្នោតសភា។ រូបភាព AFP
× មេដឹកនាំបក្សប្រឆាំងធំជាងគេរបស់កូរ៉េខាងត្បូង បានប្រកាសចុះចេញពីតំណែងរបស់ខ្លួនភា្លមៗក្រោយរងបរាជ័យក្នុងការបោះឆ្នោតជ្រើសរើសសមាជិកសភានៅថ្ងៃទី១៥ ខែមេសា។ លោក វ៉ាង ក្យូអាន (Hwang Kyo-ahn) ប្រធានបក្សអនាគតរួបរួម សុខចិត្តលាលែងពីតំណែងរបស់ខ្លួន ដើម្បីទទួលខុសត្រូវចំពោះបរាជ័យធ្ងន់ធ្ងរក្នុងការបោះឆ្នោតដែលរៀបចំឡើងស្របពេលកូរ៉េខាងត្បូងកំពុងរួមរឹតដោយសារជំងឺផ្លូវដង្ហើម COVID-19 ។
លទ្ធផលបោះឆ្នោតជ្រើសរើសសមាជិកសភាកូរ៉េខាងត្បូងដែលប្រកាសដោយគណៈកម្មការរៀបចំការបោះឆ្នោតបង្ហាញថា ក្នុងចំណោមអាសនដែលដាក់ឲ្យប្រជែងចំនួន២៥៣ បក្សអនាគតរួបរួមទទួលបានអាសនចំនួន៨៤ ខណៈបក្សប្រជាធិបតេយ្យដែលជាបក្សកាន់អំណាចទទួលបាន១៦៣អាសន និង៦ទៀតបានលើបក្សតូចៗ។ លទ្ធផលមិនសមប្រកបនេះ ធ្វើឲ្យលោក វ៉ាង ក្យូអាន ដែលជាប្រធានបក្សប្រឆាំងដ៏ធំ សម្រេចចិត្តលាលែងពីតំណែងតែម្ដង។
បន្ថែមពីលើបរាជ័យរបស់បក្ស លោក វ៉ាង ផ្ទាល់ ក៏មិនអាចឈ្នះអាសនសភាខ្លួនឯងទៅទៀត។ លោករងបរាជ័យក្រោមស្នាដៃអតីតនាយករដ្ឋមន្ត្រី លី ណាក់យុន ក្នុងការប្រជែងអាសនសភាមណ្ឌល Jongno នៃទីក្រុងសេអ៊ូល។
ទោះទទួលបានអាសនសភាដែលត្រូវជ្រើសរើសដោយការបោះឆ្នោតផ្ទាល់ក្នុងចំនួនតិចក្ដី បក្សប្រឆាំងបាននាំមុខបក្សកាន់អំណាចបន្តិចវិញក្នុងការដណ្ដើមអាសនសភាដែលជ្រើសរើសតាមរូបមន្តសមាមាត្រ។ អាសនសភាដែលត្រូវដាក់ឲ្យប្រជែងតាមរូបមន្តនេះមាន៤៧ ដោយបក្សរណបបក្សប្រឆាំងឈ្នះ១៩ បក្សរណបបក្សអំណាចរបស់ប្រធានាធិបតី មូន ចេអ៊ីន ឈ្នះ១៧ និងអាសនសេសសល់ធ្លាក់លើបក្សប្រឆាំងតូចៗ។
បើសរុបអាសនទាំង៣០០ បក្សកាន់អំណាចទទួលអាសន១៨០ ដែលជាសំឡេងភាគច្រើនលើសលប់ ខណៈបក្សប្រឆាំងទទួលបាន១០៣។ នេះជាជ័យជម្នះធំធេសសម្រាប់បក្សកាន់អំណាច ហើយលោក មូន នឹងទទួលបានការគាំទ្រកាន់តែច្រើនក្នុងការអនុវត្តគោលនយោបាយរបស់រដ្ឋាភិបាលដែលកន្លងជួបបញ្ហានៅស្ថាប័ននីតិបញ្ញត្តិនេះ ព្រោះគ្មានសំឡេងភាគច្រើន។ ប៉ុន្តែនេះក៏ជាបរាជ័យលើកទីបីរបស់បក្សប្រឆាំងក្នុងការបោះឆ្នោផងដែរ។
ជ័យជម្នះរបស់បក្សកាន់អំណាច ទទួលបានមួយផ្នែកមកពីវិធានការរបស់រដ្ឋាភិបាលប្រធានាធិបតី មូន ក្នុងការដោះស្រាយជំងឺរលាកសួតបង្កដោយកូរ៉ូណាវីរុស ដែលកំពុងរាលដាលនៅកូរ៉េខាងត្បូង។ យ៉ាងណាមិញ ស្ថានភាពហាក់ធូរស្រាលខ្លាំង ដោយចំនួនករណីឆ្លងថ្មីបានធ្លាក់ចុះមកក្រោម៣០នាក់បីថ្ងៃមកហើយ។
សម្រាប់បក្សប្រឆាំងវិញ ប្រធានយុទ្ធនាការស្វែងរកសំឡេងបក្សនេះ លោក Kim Chong-in ក៏បានសុំទោសអ្នកគាំទ្រចំពោះបរាជ័យ ហើយទទួលស្គាល់ថា ការផ្លាស់ប្ដូររបស់បក្ស មិនទាន់គ្រប់គ្រាន់នៅឡើយ។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។ ទោះជាយ៉ាងណា លោក ស្នើឲ្យប្រជាជនបន្តគាំទ្របក្សប្រឆាំងទៀតដើម្បីជោគវាសនាប្រទេស៕
Tag:
កូរ៉េខាងត្បូង
Hwang Kyo-ahn
© រក្សាសិទ្ធិដោយ thmeythmey.com