ក្រុមអវកាសយានិកគឺជាក្រុមមនុស្សឆ្នើមមួយចំនួនដែលប្រថុយជីវីតក្នុងការបំពេញតួរនាទីធ្វើដំណើរទៅក្នុងលំហ ដើម្បីសិក្សាស្រាវជ្រាវពីមជ្ឍដ្ឋានខាងក្រៅភពផែនដី។ ក្រៅពីការធ្វើដំណើរទៅកាន់ភពព្រះចន្ទ ប្រទេសមួយចំនួនដែលក្នុងនោះមានដូចជាសហរដ្ឋអាមេរិក កាណាដា ជប៉ុន និងសហភាពអឺរ៉ុបបានសហការគ្នាក្នុងការផលិត និងដាក់ឲ្យដំណើរការនូវស្ថានីយពិសោធន៍ក្នុងលំហមួយដែលមានឈ្មោះថា«ស្ថានីយអវកាសអន្តរជាតិ»ឬ«International Space Station»។ ស្ថានីយដែលដើរដោយថាមពលពន្លឺព្រះអាទិត្យមួយនេះ អាចផ្ទុកអវកាសយានិកបានរហូតទៅដល់៦នាក់ ក្នុងរយៈពេលលើសពីកន្លះឆ្នាំ។ ជាមួយនឹងមជ្ឍដ្ឋានដ៏ប្លែកមួយនេះ តើអវកាសយានិកទាំងនោះអនុវត្តជីវិតប្រចាំថ្ងៃពួកគេដោយដូចម្តេច?
គេហទំព័រ esa.int បានពន្យល់ថា ជារៀងរាល់រយៈពេល២៤ម៉ោង អវកាសយានិកនៅទីនោះនឹងជួបប្រទះព្រះអាទិត្យរះរហូតទៅដល់១៥លើក។ នេះគឺដោយសារតែការធ្វើចលនាយ៉ាងរហ័សរបស់យានលើគន្លងជុំវិញភពផែនដី។ អវកាសយានិកងើបពីដំណេកជាមួយនឹងការកំណត់ម៉ោងច្បាស់លាស់តាមកាលវិភាគ។ ការចូលដំណេករបស់ពួកគេអាចមានភាពលំបាកដោយសារតែភាពអវត្តមាននៃទំនាញ។ ពួកគេសម្រាន្តដោយមានខ្សែក្រវ៉ាត់ចង់ភ្ជាប់ជាមួយនឹងគ្រែនិងជញ្ចាំង។
នៅក្នុងបន្ទប់របស់ពួកគេ ខ្យល់ក្តៅមិនហើរឡើងលើដូចនៅលើភពផែនដីនោះទេ។ នៅលើផែនដី ដោយសារតែទំនាញ ខ្យល់ក្តៅនឹងហើរឡើងទៅលើ ចំណែកឯខ្យល់ត្រជាក់នឹងហូរធ្លាក់ចុះមកក្រោម។ អវកាសយានិកមួយចំនួនបាននិយាយថា ជាមួយនឹងម៉ាស៊ីនចម្រោះខ្យល់ទាំងនោះ ស្ថានីយអវកាសអន្តរជាតិមានសំឡេងរំខានខ្លាំងណាស់។ គេប្រៀបធៀបថាដូចជាការរស់នៅក្បែផ្លូវមហាវិថីដែរ។ ជាមួយនឹងការអណ្តែតក្នុងលំហដូចនេះ អវកាសយានិកសម្រាន្តក្នុងទម្រង់ដូចជាទារកក្នុងផ្ទៃម្តាយ នៅក្នុងបន្ទប់តូចៗរបស់ពួកគេ។
ក្នុងការស្លៀកពាក់ ពួកគេប្រើប្រាស់សម្លៀកបំពាក់ណាដែលអាចកែច្នៃឡើងវិញបាន និងផ្លាស់ប្តូរសម្លៀកបំពាក់ទាំងនោះរៀងរាល់រយៈពេលបីថ្ងៃម្តង។ ពួកគេគ្មានម៉ាស៊ីនបោកគក់ ឬបន្ទប់ទឹកងូតទឹកនោះទេ។ ហេតុដូចនេះ អវកាសយានិកត្រូវជូតសម្អាតខ្លួនរបស់ពួកគេជាមួយនឹងកន្សែងអនាម័យ។ ក្នុងការកោរពុកម៉ាត់ និងកាត់សក់ ពួកគេត្រូវប្រើប្រាស់ម៉ាស៊ីនបូមខ្យល់នៅក្បែខ្លួនជានិច្ចដើម្បីជៀសវាងរោមសក់ទាំងនោះធ្វើដំណើរទៅពេញស្ថានីយ។
ការបរិភោគអាហារមានចំនួនបីដងជាធម្មតាក្នុងមួយថ្ងៃ។ ក្នុងការពិសារអាហារដែលជាលក្ខណៈជាអង្គធាតុរាវ ឬស៊ុប អវកាសយានិកអាចហូបវាចេញពីកញ្ចប់ប្លាស្ទិក ជាមួយនឹងទុយយោបឺត។ ចំពោះអាហាររឹង គេអាចប្រើប្រាស់ស្លាបព្រា និងកាំបិតជាមួយនឹងការប្រុងប្រយ័ត្នមិនឲ្យកំទិចអាហារទាំងនោះអណ្តែតទៅក្រៅ។ ដោយសារតែពួកគេនៅក្នុងលំហ លទ្ធភាពក្នុងការភ្លក់រសជាតិត្រូវបានកាត់បន្ថយ។ ដូចនេះ ភាគច្រើនអាហារហិរគឺជាអ្វីដែលអវកាសយានិកចូលចិត្ត។
ក្រោយពីការទទួលទានអាហារ អវកាសយានិកអាចចូលទៅធ្វើការពិសោធន៍ផ្សេងៗរបស់ខ្លួនដែលត្រូវបានកំណត់ដោយក្រុមអ្នកវិទ្យាសាស្ត្រនៅលើភពផែនដី និងការត្រួតពិនិត្យមើលផ្នែកនានានៃស្ថានីយដើម្បីធានានូវសុវត្ថិភាពអាយុជីវិតរបស់អ្នករស់នៅលើទីនោះ។ អវកាសយានិកនិមួយៗត្រូវការអុកស៊ីសែនរហូតទៅដល់៩០០ក្រាម និងទឹកចំនួនជិត៣លីត្រជារៀងរាល់ថ្ងៃ។ ហេតុដូចនេះ ទឹកនោម និងខ្យល់ដែលចេញពីដង្ហើមត្រូវបានគេចម្រោះឡើងក្នុងការប្រើប្រាស់សារជាថ្មី។
ចំពោះកាកសំណល់រឹង គេស្តុកវាទុកសម្រាប់ការបញ្ចេញចោលលើកក្រោយ។ បន្ទប់ទឹកនៅលើនោះមិនប្រើប្រាស់ទឹកនោះឡើយ។ ដោយឡែក គេប្រើប្រាស់បំពង់បឺត ដែលផលិតខ្យល់បឺតខ្លាំងដើម្បីទាញកាកសំណល់។ ការហាត់ប្រាណក៏ត្រូវបានគេអនុវត្តជាប្រចាំផងដែរ ដើម្បីរក្សាដង់ស៊ីតេឆ្អឹង ឬសុខភាពសាច់ដុំឲ្យនៅបានប្រសើរ។
នៅពេលទំនេរ អវកាសយានិកអាចប្រើប្រាស់ប្រព័ន្ធអិនធើណែត ទាក់ទងទៅគ្រួសារ ទស្សនាខ្សែភាពយន្តផ្សេងៗជាដើម។ ទិដ្ឋភាពដែលសំខាន់ជាងគេរបស់ពួកគេគឺការពិនិត្យមើលភពផែនដី ពីលើលំហប្រមាណជាជាង៥០០គីឡូម៉ែត្រពីកម្ពស់ទឹកសមុទ្រ៕