ជាតិ
បទយកការណ៍ / បទសម្ភាសន៍
ស្ត្រីជនជាតិភាគតិច ប្រា ឌិន ខ្នះខ្នែងផ្ទេរចំណេះឲ្យយុវជនរួមគ្នារក្សាតម្បាញប្រពៃណី
× មណ្ឌលគិរី៖ ទោះមមាញឹកនឹងការងារនឹងការត្បាញផ្ទាល់ខ្លួន និងលក់អីវ៉ាន់ចាប់ហួយយ៉ាងណា ក៏ស្ត្រីជនជាតិដើមភាគតិចទំពូន ប្រា ឌិន ឆ្លៀតពេលបង្រៀនតម្បាញតាមបែបប្រពៃណីដល់យុវជន និងស្ត្រីជនជាតិព្នង។ គោលបំណងដែលស្ត្រីវ័យ៤០ឆ្នាំ រូបនេះ លះបង់ទាំងពេលវេលា និងមិនយកកម្រៃពីការបង្រៀនតម្បាញនេះ គឺចង់ឃើញតម្បាញបែបប្រពៃណីរបស់ជនជាតិដើមភាគតិចរស់បន្តដល់កូនចៅជំនាន់ក្រោយ។
ដើម្បីជ្រាបច្បាស់សូមអញ្ជើញលោក-អ្នកនាងទស្សនាវីដេអូខ្លី ដូចតទៅ៖
បច្ចុប្បន្ន អ្នកស្រី ប្រា ឌិន កំពុងប្រកបរបរត្បាញនៅក្រុងសែនមនោរម្យ ខេត្តមណ្ឌលគិរី និងបានបង្រៀនតម្បាញប្រពៃណីដល់កូនសិស្សចំនួន២០នាក់។ «ដោយសារខ្ញុំស្រលាញ់ការងាតម្បាញហ្នឹង អីចឹងខ្ញុំចង់ចែកចាយឱ្យបងប្អូនផ្សេងចេះដូចខ្ញុំដែរ។ សំខាន់យើងអត់ចង់ឲ្យបាត់បង់ និងឱ្យពួកគាត់អាចប្រកបរបរនេះបានដូចខ្ញុំដែរ»។ នេះជាសម្ដីរបស់អ្នកស្រី ប្រា ឌិន ដែលឥតរួញរានឹងបង្រៀនតម្បាញប្រពៃណីដល់ស្ត្រីជនជាតិព្នងជាច្រើន ដើម្បីឱ្យតម្បាញប្រពៃណីនេះនៅតែបន្តរស់យូរអង្វែង។
ទោះបីជាសព្វថ្ងៃ ស្ត្រីជនជាតិព្នង ប្រា ឌិន មានបទពិសោធត្បាញជាង២០ឆ្នាំមកហើយនោះ បានផ្ទេរចំណេះដែលខ្លួនមានឱ្យយុវជនជំនាន់ក្រោយក៏ពិត តែអ្នកស្រីនៅតែបារម្ភខ្លាចបាត់បង់មុខរបរដូនតានេះ ដោយមើលឃើញអ្នកជំនាន់ក្រោយ មិនសូវយកចិត្តទុកដាក់ និង ចេះត្បាញតែកន្សែងនិងកាបូបប៉ុណ្ណោះ។ អ្នកស្រី ប្រា ឌិត ចង់ឱ្យអ្នកបន្តវេនជំនាន់ក្រោយ ចេះត្បាញគ្រប់ផលិតផលរបស់ជនជាតិព្នងឲ្យបានច្រើនប្រភេទទៀត ជាពិសេសការត្បាញដែលមានក្បាច់រចនាបង្ហាញពីវប្បធម៌ប្រពៃណីជនជាតិដើមភាគតិចរបស់ខ្លួន៕
Tag:
តម្បាញ
ជនជាតិភាគតិច
មណ្ឌលគិរី
© រក្សាសិទ្ធិដោយ thmeythmey.com