COVID-19
ជាតិ
ខេត្តពោធិ៍សាត់ជំរុញការដាំដុះបន្លែធម្មជាតិបន្ថែម ក្នុងបរិបទកូវីដ១៩
× ពោធិ៍សាត់៖ មន្ត្រីជាន់ខ្ពស់នៃខេត្តពោធិ៍សាត់ បាននិងកំពុងជំរុញការដាំដុះបន្លែបន្ថែមទៀត ក្នុងខណៈពេលដែលរដូវវស្សានឹងឈានមកដល់ ហើយជាពិសេស ក្នុងបរិបទមេរោគកូវីដ១៩តែម្តង។ ដំណាំដែលតំណាងខេត្តជំរុញឲ្យពលរដ្ឋដាំដុះនៅពេលនេះ គឺជាដំណាំបន្លែសរីរាង្គ និងជាដំណាំដែលឆាប់ផ្តល់ផល។ បន្លែ ត្រកួន ផ្ទី ស្ពៃ គឺជាដំណាំអាទិភាពដែលត្រូវដាំដុះនៅក្នុងពេលដ៏ខ្លីខាងមុខនេះ។
«លើកកម្ពស់បន្លែខ្មែរ គឺមានន័យស្មើនឹងជួយថែ ឬជួយគ្រួសារខ្មែរ»។ នេះ គឺជាការលើកឡើងរបស់លោក អ៊ឹង គីមលាង អភិបាលខេត្តរងនៃខេត្តពោធិ៍សាត់នៅចំពោះមុខមន្ត្រី និងយុវជនរបស់ខ្លួនដែលត្រូវចូលរួមជំរុញការដាំដុះនៅក្នុងពេលខាងមុខនេះ។
នៅលើទំព័រហ្វេសប៊ុករបស់ខ្លួន លោក អ៊ឹង គីមលាង បានបញ្ជាក់ថា គ្រួសារនីមួយៗនៅក្នុងខេត្តគួរដាំបន្លែបីមុខដើម្បីធានាសន្តិសុខស្បៀង និងដើម្បីរក្សាសុខភាពរបស់ប្រជាពលរដ្ឋ។ បន្លែដែលត្រូវដាំចាំបាច់ គឺបន្លែផ្ទី ត្រកួន និងស្ពៃ។ តែដើម្បីអាចធ្វើកិច្ចការនេះបានលឿន និងមានប្រសិទ្ធិភាព លោក អ៊ឹង គីមលាង ជំរុញឲ្យមន្ត្រីរបស់ខ្លួនជួយពង្រឹងសមត្ថភាពកសិករ ជួយផ្តល់ពូជ និងជួយផ្តល់ដីទំនេរខ្លះជូនកសិករក្នុងករណីចាំបាច់។ ម្យ៉ាងទៀត លោក អ៊ឹង គីមលាង អំពាវនាវឲ្យកសិករទាំងអស់ប្រើប្រាស់ជីធម្មជាតិ ជំនួស ជីគីមី ដូចជា លាមកគោ ឬអាចម៍មាន់ អាចម៍ទា ជាដើម។ ក្រោយពីទទួលផលរួចហើយ លោក អ៊ឹង គីមលាង សន្យាថា ក្រុមការងាររបស់លោកនឹងជួយរកទីផ្សារជូនកសិករទៅតាមលទ្ធភាពដែលអាចធ្វើទៅបាន។
សូមរម្លឹកថា កាលពីដើមខែមេសាឆ្នាំ២០២០កន្លងមកនេះ, ក្នុងស្ថានភាពប្រទេសជាតិកំពុងប្រឈមនឹងវិបត្តិកូវីដ-១៩ (COVID-19), សម្តេចនាយករដ្ឋមន្ត្រី ហ៊ុន សែន បានអំពាវនាវឲ្យពលរដ្ឋដាំបន្លែ និងចិញ្ចឹមសត្វនានា ដើម្បីផ្គត់ផ្គង់តម្រូវការទីផ្សារក្នុងស្រុក។ សម្តេច ហ៊ុន សែន បានបញ្ជាក់ទៀតថា វិបត្តិមេរោគកូវីដ-១៩ ថ្វីដ្បិតធ្វើឲ្យប៉ះពាល់ដល់វិស័យទេសចរណ៍ វិស័យឧស្សាហកម្ម នៅកម្ពុជាមែន ប៉ុន្តែវិបត្តិនេះមិនធ្វើឲ្យប៉ះពាល់ដល់វិស័យកសិកម្មនោះទេ។ ផ្ទុយទៅវិញ កលានុវត្តភាព គឺមានសម្រាប់វិស័យកសិកម្ម ដែលតម្រូវឲ្យប្រជាជនដាំដុះផលិតផលកសិកម្ម ដើម្បីផ្គត់ផ្គង់តម្រូវការទីផ្សារ។ ប្រមុខរាជរដ្ឋាភិបាលកម្ពុជា បានមានប្រសាសន៍បន្ថែមយ៉ាងដូច្នេះថា៖«យើងប្រើប្រាស់ឱកាសដ៏លំបាកនេះឲ្យក្លាយទៅជាកលានុវត្តភាពសម្រាប់វិស័យកសិកម្មរបស់កម្ពុជា ដែលមានកំណើនយឺតក្នុងរយៈពេលកន្លងទៅ»៕
© រក្សាសិទ្ធិដោយ thmeythmey.com