អន្តរជាតិ
មនុស្ស១៣នាក់ ស្លាប់ក្នុងការបាញ់ប្រហារដ៏អាក្រក់បំផុតនៅកាណាដាក្នុងពេល៣០ឆ្នាំ
×![]()
ដោយ: តន ចាន់រិទ្ធារ៉ា
មនុស្សយ៉ាងហោចណាស់១៣នាក់រួមទាំងប៉ូលិសម្នាក់ផង បានបាត់បង់ជីវិតក្នុងការបាញ់ប្រហារមួយនៅកាណាដានៅថ្ងៃទី១៩ ខែមេសា។ នេះជាការហេតុការណ៍បាញ់ប្រហារដ៏អាក្រក់បំផុតនៅរដ្ឋអាមេរិកខាងជើងមួយនេះក្នុងពេលច្រើនជាង៣០ឆ្នាំ។ ជនសង្ស័យ ក៏ត្រូវរកឃើញថា បានបាត់បង់ជីវិតផងដែរ។
ប៉ូលិសកាណាដាអះអាងថា ជនសង្ស័យឈ្មោះ Gabriel Wortman វ័យ៥១ឆ្នាំ បានរត់គេចពីការចាប់ខ្លួន បន្ទាប់ពីប៉ូលិសទទួលបានដំណឹងពីការបាញ់ប្រហារនៅទីក្រុង Portapique ក្បែរទីក្រុង Halifax នៃខេត្ត Nova Scotia ។ ជនសង្ស័យដែលពាក់ឯកសណ្ឋានប៉ូលិសផងនោះ បានបើកឡានរបស់ខ្លួនទៅកាន់តំបន់ជាច្រើន ហើយបានបើការបាញ់ប្រហារផងដែរ។
ស្នងការប៉ូលិសជាតិកាណាដា Brenda Lucki ប្រាប់ទូរទស្សន៍ CBC ថា មនុស្សយ៉ាងហោចណាស់១៣នាក់ បូករួមទាំងជនសង្ស័យម្នាក់ផងនោះ បានស្លាប់។ ប៉ូលិសកាណាដាបញ្ជាក់ថា ប្រតិបត្តិការរុករកមានរយៈពេល១២ម៉ោង ដែលចាប់ផ្ដើមតាំងពីយប់ថ្ងៃទី១៨ រហូតដល់ថ្ងៃទី១៩ ខែមេសា។ ប៉ូលិសកាណាដា បានបាត់បង់ជីវិតក្នុងហេតុការណ៍នេះ ខណៈមន្ត្រីប៉ូលិសម្នាក់ទៀតរងរបួស។ នេះបើតាមការផ្សាយរបស់ទីភ្នាក់ងារព័ត៌មាន AFP ។
អ្នកស្រី Lucki បន្ថែមថា មកទល់ពេលនេះ ប៉ូលិសមិនទាន់អាចកំណត់ពីមូលហេតុ នៃការបាញ់ប្រហារនេះឡើយ ហើយគេក៏រកទាន់ឃើញពីទំនាក់ទំនងរវាងជនសង្ស័យ និងជនរងគ្រោះដែរ។ លោក Chris Leather មន្ត្រីជាន់ខ្ពស់ប៉ូលិសកាណាដា និយាយដែរថា ប៉ូលិសស្ថិតនៅដំណាក់កាលដំបូង នៃការស៊ើបអង្កេតស្មុគស្មាញ តែមានព័ត៌មានច្រើន។
នាយករដ្ឋមន្ត្រីកាណាដា ចាស្ទីន ទ្រូដូ បានរំលែកទុក្ខជនរងគ្រោះក្នុងអំពើហិង្សាគ្មានន័យ។ លោកបានជូនពរឲ្យអ្នករងរបួសឆាប់សះស្បើយវិញ។
នេះជាការហេតុការណ៍បាញ់ដ៏អាក្រក់បំផុតនៅកាណាដា គិតតាំងពីឆ្នាំ១៩៨៩មក។ កាលនោះ ខ្មាន់កាំភ្លើងម្នាក់បានបាញ់សម្លាប់សិស្សចំនួន១៤នាក់ នៅសាលា Ecole Polytechnique ក្នុងទីក្រុង Montreal ៕
Tag:
កាណាដា
© រក្សាសិទ្ធិដោយ thmeythmey.com
