កីឡាអន្តរជាតិ
រថយន្ត
អន្តរជាតិ
ក្លិបបាល់ទាត់មួយនៅដាណឺម៉ាកគ្រោងឲ្យអ្នកគាំទ្រអង្គុយមើលការប្រកួតពីក្នុងរថយន្ត
× ក្លិប FC Midtjylland នៃលីគកីឡាបាល់ទាត់កំពូលដាណឺម៉ាក (Danish Superliga) បានរកឃើញដំណោះស្រាយមួយដែលអាចឲ្យអ្នកគាំទ្រទស្សនាការប្រកួតទាំងបិទកីឡដ្ឋានបានអំឡុងមានវិបត្តិ COVID-19។ ពួកគេគ្រោងរៀបចំបង្កើតផ្ទាំងអេក្រង់ធំ ដោយឲ្យអ្នកគាំទ្រទស្សនាពីក្នុងរថយន្តនៅចំណតឡានក្រៅកីឡដ្ឋានរបស់ពួកគេ។
លីគកំពូលដាណឺម៉ាក ក៏ដូចជាលីគជាច្រើននៅទូទាំងពិភពលោកសុទ្ធតែត្រូវបានពន្យារពេលប្រកួតបណ្តោះអាសន្ន ដើម្បីបង្កាការរីករាលដាលជំងឺ COVID-19។ នៅពេលការប្រកួតចាប់ផ្តើមឡើងវិញ ពួកគេ ទំនងជានឹងត្រូវលេងដោយបិទទ្វារកីឡដ្ឋានផង។
ក្នុងករណីនេះ ក្លិប FC Midtjylland បានប្រកាសពីផែនការដែលនឹងអនុញ្ញាតឲ្យរថយន្តចំនួន ២០០០ គ្រឿងដែលចតនៅជុំវិញកីឡដ្ឋាន MCH របស់ពួកគេ អាចមើលការប្រកួតដែលផ្សាយនៅលើអេក្រង់ធំបាន។ នេះជាការបានបង្កើតគំនិតដ៏ប៉ិនប្រសប់មួយដើម្បីធានាថា អ្នកគាំទ្រអាចនៅជិតបំផុតតាមដែលអាចធ្វើទៅបានដោយមានគម្លាតសុវត្ថិភាព ខណៈកីឡាករកំពុងប្រកួតក្នុងកីឡដ្ឋាន។
ក្លិបនឹងរៀបចំដាក់អេក្រង់ធំៗ ចំនួនពីរនៅក្នុងចំណតឡានក្រៅកីឡដ្ឋានដែលមានចំណតរហូតដល់ ២០០០ កន្លែង។ ចំនួននេះ អាចអនុញ្ញាតឲ្យអ្នកគាំទ្ររហូតដល់ទៅ ១០០០០ នាក់អាចទស្សនាការប្រកួត ហើយស្តាប់ការអត្ថាធិប្បាយតាមរយៈវិទ្យុរថយន្តរបស់ពួកគេរៀងៗខ្លួន។
ដោយឡែក រូបភាពផ្ទាល់នៅឯចំណតរថយន្តក៏នឹងត្រូវចាក់បញ្ចាំងនៅខាងក្នុងកីឡដ្ឋាន MCH ផងដែរ ដើម្បីឲ្យកីឡាករដែលកំពុងប្រកួតគ្នាមានអារម្មណ៍ថាមានវត្តមានរបស់អ្នកគាំទ្រពួកគេ និងជាកម្លាំងចិត្តផង។
លោក Preben Rokkjaer នាយកទីផ្សារក្លិប FC Midtjylland បានលើកឡើងពីគម្រោងដ៏ពិសេសនេះថា៖« យើងកំពុងខិតខំបង្កើតបទពិសោធន៍ដែលល្អបំផុត។ យើងចង់ផ្តល់អ្វីដែលពិសេសហើយប្លែកទៅក្នុងដល់តំបន់ និងអ្នកគាំទ្រដ៏ស្មោះស្ម័គ្ររបស់យើង»។
FC Midtjylland ស្ថិតនៅកំពូលតារាង Superliga របស់ដាណឺម៉ាកដោយរកបាន៦២ពិន្ទុ តាមពីក្រោយដោយ FC Koebenhavn ដែលមាន៥០ពិន្ទុ បន្ទាប់ពីឆ្លងកាត់ការប្រកួត២៤លើកដូចគ្នាក្នុងរដូវកាលនេះ មុនពេលផ្អាកការប្រកួតដោយសារ COVID-19។ យ៉ាងណាក៏ដោយ Superliga គ្រោងនឹងត្រឡប់ទៅកាន់ការប្រកួតវិញនៅថ្ងៃទី១៧ ខែឧសភា ដើម្បីបញ្ចប់រដូវកាលរបស់ខ្លួន ដែលនឹងបញ្ចប់នៅចុងខែកក្កដា។
ដាណឺម៉ាក មានករណីឆ្លង COVID-19 ចំនួនជាង៧០០០ករណីដែរគិតត្រឹមថ្ងៃទី២០ ខែមេសានេះ ក្នុងនោះស្លាប់ជាង៣៥០នាក់ និងសះស្បើយជាង៤១០០នាក់៕
Tag:
COVID-19
Danish Superliga
© រក្សាសិទ្ធិដោយ thmeythmey.com