លោក ម៉ម ប៊ុនហេង រដ្ឋមន្ត្រីក្រសួងសុខាភិបាល លើកឡើងថា សមត្ថកិច្ច បានបង្កើតប្រព័ន្ធមួយ ដើម្បីតាមដានសកម្មភាពរបស់អ្នកផ្ទុកជំងឺកូវីដ-១៩ និងមើលឃើញសកម្មភាពរបស់បុគ្គលណាម្នាក់ ដែលសង្ស័យពីការផ្ទុកជំងឺកូវីដ-១៩។
ក្នុងសន្និសីទកាសែតប្រចាំសប្តាហ៍ស្តីពីស្ថានភាពជំងឺកូវីដ-១៩ នៅកម្ពុជា ដែលរៀបចំឡើងទីស្តីការក្រសួងសុខាភិបាល នាព្រឹកថ្ងៃចន្ទ ទី២០ ខែមេសា ឆ្នាំ២០២០ លោក ម៉ម ប៊ុនហេង មានប្រសាសន៍ដូច្នេះថា៖«យើង ទៅណា ក៏គេ ដឹងដែរ។ ឥឡូវ យើងធ្វើប្រព័ន្ធមួយ...តាមដានរហូត...គេ តាមដាមដឹងទាំងអស់ ហើយលឿន រហ័ស ឆ្លើយតបទាន់ពេលវេលាទៀត...»។
សំឡេង៖
រដ្ឋមន្ត្រីសុខាភិបាលរូបនេះ និយាយបែបលេងសើចទៀតថា បច្ចុប្បន្ន កម្លាំងសមត្ថកិច្ច មិនមែនត្រឹមតែចាប់ចោរនោះទេ តែថែមទាំងជួយលោក តាមរកនិងតាមចាប់កូវីដ-១៩ ផងដែរ។
ឧត្តមសេនីយ៍ឯក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការដ្ឋាននគរបាលជាតិ មិនធ្វើអត្ថាធិប្បាយនិងពន្យល់ អំពីប្រព័ន្ធតាមដានមួយនេះទេ ដោយលោក លើកហេតុផលថា វា ជារឿងសម្ងាត់និងជារឿងសុវត្ថិភាព សម្រាប់ប្រជាប្រពលរដ្ឋនិងប្រទេសជាតិទាំងមូល ដូច្នេះ មិនអាចនិយាយចេញជាសាធារណៈឡើយ។
ម្យ៉ាងទៀត បើនិយាចេញទៅ លោក បារម្ភខ្លាចក្រែងមានការយល់ច្រឡំថា នគរបាល ឃ្លាំមើលសកម្មភាពរបស់ប្រជាពលរដ្ឋគ្រប់រូប។ លោក និយាយថា៖«ប្រាប់អូនឯង អូនឯងយកទៅផ្សព្វផ្សាយ ប្រជាពលរដ្ឋ គាត់ អន់ចិត្ត ថា គាត់អត់សិទ្ធិ អត់សេរីភាពទៀត...»។
យ៉ាងណា លោក បានបង្ហើបបន្តិចដែរថា សមត្ថកិច្ច ប្រើប្រព័ន្ធនេះ សម្រាប់តែតាមមើលសកម្មភាពអ្នក ដែលសង្ស័យពីការផ្ទុកជំងឺកូវីដ-១៩ ប៉ុណ្ណោះ។ ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទ អគ្គស្នងការរងរូបនេះ បញ្ជាក់ថា៖«...ប៉ូលិសណា តាមដានប្រជាពលរដ្ឋ១៦លាននាក់ អ៊ីចឹង យើង តាមមើលតែប្រជាពលរដ្ឋណា ដែលយើង សង្ស័យថា មានផ្ទុកកូវីដ-១៩... គាត់ទៅទាក់នងជាមួយអ្នកណា»។
នៅបណ្តាប្រទេសមួយចំនួន បានប្រើប្រព័ន្ធផ្សេងៗពីគ្នា ក្នុងការដាមតានអ្នកដែលសង្ស័យថាឆ្លងជំងឺកូវីដ-១៩ ឬអាចហៅថា ជាប្រព័ន្ធគ្រប់គ្រងជំងឺកូវីដ-១៩។ ចំពោះអ្នកដែលធ្លាប់ប៉ះពាល់ឬទាក់ទងជាមួយអ្នកផ្ទុកជំងឺកូវីដ-១៩ ក៏គេ អាចប្រើប្រព័ន្ធតាមដានទាំងនោះ ស្វែងរកបានដែរ។
ជាក់ស្តែង កូរ៉េខាងត្បូង បានបង្កើតកម្មវិធី កូរ៉ូណាចម្ងាយ ១០០ម៉ែត្រ (Corona 1០០m app) ដើម្បីជូនដំណឹងដល់ប្រជាពលរដ្ឋឲ្យជៀសវាងពីករណីឆ្លង និងដឹងពីទីតាំងឆ្លងកូវីដ-១៩។ តាមរយៈកម្មវិធីនេះ ប្រសិនប្រជាជនស្ថិតនៅចម្ងាយ១០០ម៉ែត្រ ឬតិចជាងនេះ ពីទីតាំងកើតមានកូវីដ-១៩ កម្មវិធី Corona 1០០m app នឹងជូនដំណឹងប្រាប់ភ្លាម ដោយមិនចាំបាច់ឲ្យមនុស្សចូលទៅស្វែងរកប្រវត្តិនៃការធ្វើដំណើររបស់អ្នកជំងឺទៅទីតាំងណា។
ចំណែក កម្មវិធីមួយទៀត គឺគេហទំព័រ Coronamap ដែលអនុញ្ញាតឲ្យមនុស្សចូលមើល ដើម្បីដឹងថា តើអ្នកជំងឺកូវីដ-១៩ ធ្លាប់ធ្វើដំណើរទៅទីតាំងណាខ្លះ ក្នុងប្រទេសកូរ៉េខាងត្បូង និងបង្ហាញពីទីតាំង កំពុងផ្ទុកកូវីដ-១៩ នៅក្នុងប្រទេសកូរ៉េខាងត្បូង។
ប្រជាពលរដ្ឋកូរ៉េខាងត្បូងជាច្រើន បានប្រើកម្មវិធីទាំងពីរនេះ ដើម្បីបង្ការករណីឆ្លងថ្មី។
កូរ៉េខាងត្បូង ធ្លាប់ត្រូវបានចាត់ទុកជាប្រទេសមួយ ដែលមានអ្នកឆ្លងជំងឺកូវីដ-១៩ ច្រើនគួរសមដែរ តែក្រោយមក បានចាត់វិធានការទប់ស្កាត់ទាន់ ដែលធ្វើឲ្យចំនួនអ្នកឆ្លង មិនសូវកើនឡើង ហើយចំនួនអ្នកជាសះស្បើយ មានការកើនឡើង។ គិតត្រឹមថ្ងៃទី២០ ខែមេសា កូរ៉េខាងត្បូង មានអ្នកឆ្លងជំងឺកូវីដ-១៩ ជាង១ម៉ឺននាក់ ដោយក្នុងនោះស្លាប់២៣៦នាក់ និង ជាសះស្បើយជាង៨ពាន់នាក់។
នៅកម្ពុជា មន្ត្រីមានសមត្ថកិច្ច បន្តស្វែងរកអ្នកដែលសង្ស័យពីការឆ្លងជំងឺកូវីដ-១៩ ជារៀងរាល់ថ្ងៃ តាមមធ្យោបាយនានា។ ប៉ុន្តែ រយៈពេលមួយសប្តាហ៍ចុងក្រោយនេះ កម្ពុជា មានព័ត៌មានល្អជាប់គ្នារហូត ដោយមិនមានករណីឆ្លងថ្មីឡើយ ហើយអ្នកជាសះស្បើយ ចេះតែកើនឡើង។
គិតត្រឹមព្រឹកថ្ងៃទី២០ ខែមេសា នៅកម្ពុជា មានអ្នកជំងឺកូវីដ១៩ ១០៧នាក់ហើយ ដែលជាសះស្បើយ ក្នុងចំណោមអ្នកឆ្លង១២២នាក់។ នៅសល់អ្នកជំងឺកូវីដ-១៩ តែ១៥នាក់ប៉ុណ្ណោះ ដែលកំពុងសម្រាកព្យាបាល។
ទោះស្ថានភាពជំងឺកូវីដ-១៩ នៅកម្ពុជា ហាក់មានសភាពធូរស្រាលបន្តិចក្តី តែសម្តេច នាយករដ្ឋមន្ត្រី ហ៊ុន សែន នៅតែក្រើនរម្លឹកប្រជាជន ឲ្យប្រុងប្រយ័ត្ន និងយកចិត្តទុកដាក់ចំពោះសុវត្ថិភាពសុខភាពជាប្រចាំថ្ងៃ។
តាមរយៈសារលើទំព័រហ្វេសប៊ុក កាលពីថ្ងៃទី១៩ ខែមេសា ប្រមុខរដ្ឋាភិបាល ផ្ញើសារជូនប្រជាជន ដូច្នេះថា៖«...ត្រូវចងចាំគ្រប់ពេលថា ជំងឺឆ្លងកូវីដ-១៩ គឺជាជំងឺឆ្លងរាតត្បាតដ៏កាចសាហាវបំផុត ដែលក្នុងតែមួយប៉ប្រិចភ្នែកប៉ុណ្ណោះ វា អាចបង្កវិនាសកម្មបានយ៉ាងឆាប់រហ័សបំផុត...»៕