COVID-19
ជាតិ
ក្រសួងសុខាភិបាល ផ្តើមធ្វើតេស្តរកកូវីដ-១៩ លើកម្មករដែលទៅស្រុកពេលចូលឆ្នាំ កម្មករកំពុងអង្គុយរង់ចាំការធ្វើតេស្តរកកូវីដ-១៩
× ភ្នំពេញ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល អះអាងថា មន្ត្រីជំនាញរបស់ក្រសួងសុខាភិបាល ចាប់ផ្តើមធ្វើតេស្តរកមេរោគកូវីដ-១៩ (COVID-19) លើកម្មករ-កម្មការិនីរោងចក្រ ដែលកំពុងស្ថិតនៅដាច់ដោយឡែករយៈពេល១៤ថ្ងៃ ក្នុងរាជធានីភ្នំពេញ ។
លោក ម៉ម ប៊ុនហេង ថ្លែងក្នុងសន្និសីទកាសែត នៅព្រឹកថ្ងៃទី២០ ខែមេសា ឆ្នាំ២០២០ ថា៖«យើង កំពុងធ្វើការងារនេះ ដើម្បីតាមដានស្រាវជ្រាវជាមួយក្រសួងការងារ អាជ្ញាធរមូលដ្ឋាន និង ក្រុមគ្រូពេទ្យរបស់យើង។ បើមាន [អ្នកឆ្លង] គេ ជូនដំណឹងហើយ»។
កម្មករ-កម្មការិនីទាំងនោះ ត្រូវបានដាក់ឲ្យនៅដាច់ដោយឡែករយៈពេល១៤ថ្ងៃ និងត្រូវឆ្លងកាត់ការធ្វើតេស្តរកជំងឺកូវីដ-១៩ ដោយសារពួកគេ ឈប់សម្រាកពេលចូលឆ្នាំខ្មែរកន្លងទៅ។ របាយការណ៍ពីសាលារាជធានីភ្នំពេញ បានឲ្យដឹងថា មានកម្មករ-កម្មការិនីជាង១,៥ម៉ឺននាក់ ដែលទៅស្រុកកំណើតពេលចូលឆ្នាំ។
លោក ម៉ម ប៊ុនហេង ពុំបានបញ្ជាក់ឡើយថា កម្មករ-កម្មការិនីជាង១,៥ម៉ឺននាក់នោះ នឹងត្រូវធ្វើតេស្តរកជំងឺកូវីដ-១៩ ទាំងអស់គ្នា ឬក៏ធ្វើតេស្តតែមួយចំនួនទេ។
គិតត្រឹមថ្ងៃទី២០ ខែមេសា កម្ពុជា រកឃើញអ្នកជំងឺកូវីដ-១៩ ចំនួន១២២នាក់ ក្នុងនោះ មានអ្នកជាសះស្បើយ១០៧នាក់ហើយ និងនៅសល់១៥នាក់ទៀត កំពុងសម្រាកព្យាបាល៕
© រក្សាសិទ្ធិដោយ thmeythmey.com