COVID-19
ជាតិ
អ្នកនាំពាក្យ ព្រមានម្តងហើយម្តងទៀតពីគ្រោះថ្នាក់ បើពលរដ្ឋភ្លេចខ្លួន ដោយគិតថាលែងមានកូវីដ-១៩
× ភ្នំពេញ៖ «ប្រសិនបើបុគ្គលគ្រប់រូបភ្លេចខ្លួន ហើយបែរជាគិតថាអស់មានបញ្ហាកូវីដ១៩ហើយ ហើយវិធានការការពារខ្លួនមិនបានបន្តអនុវត្តឲ្យបានខ្ជាប់ខ្ជួនទេនោះ ការរាលត្បាត ឬការវាយលុកនៃជំងឺកូវីដ១៩ នឹងអាចកើតមានឡើង»។ នេះជាការលើកឡើងរបស់លោកស្រី ឱ វណ្ណឌីន អ្នកនាំពាក្យក្រសួងសុខាភិបាល នាសន្និសីទសារព័ត៌មានស្ដីពីបច្ចុប្បន្នភាពជំងឺកូវីដ១៩ នៅព្រឹកថ្ងៃទី២០ មេសា។
រយៈពេល១សប្ដាហ៍នេះ កម្ពុជាមិនមានករណីឆ្លងថ្មីជំងឺកូវីដ១៩ឡើយ។ ទោះបីកម្ពុជាមិនមានករណីឆ្លងថ្មី ប៉ុន្តែលោកស្រី ឱ វណ្ណឌីន នៅតែអះអាងថា លទ្ធផលនេះ មិនទាន់បញ្ជាក់ថាកម្ពុជារួចផុតពីការវាយលុកនៃជំងឺកូវីដ១៩នោះទេ។ លោកស្រី លើកឡើងយ៉ាងដូច្នេះថា៖ «ខ្ញុំសូមជម្រាបជូនថា នៅក្នុងពេលខាងមុខនេះ យើងមិនត្រូវប្រហែសទេ។ យើងនឹងអាច ប្រសិនបើបុគ្គលគ្រប់រូប ភ្លេចខ្លួន ហើយបែរជាគិតថាយើងអស់មានបញ្ហាកូវីដ១៩ហើយ ហើយវិធានការការពារខ្លួនយើងនេះ យើងមិនបានបន្តអនុវត្តឲ្យបានខ្ជាប់ខ្ជួនទេនោះ។ ការរាលត្បាត ឬការវាយលុកនៃជំងឺកូវីដ១៩ នឹងអាចកើតមានឡើង»។
ការលើកឡើងរបស់អ្នកនាំពាក្យខាងលើ ក្នុងគោលបំណងមិនចង់ឲ្យមានករណីឆ្លងថ្មីទៅកាន់សហគមន៍ ខណៈកម្ពុជាដែលករណីឆ្លងជាការនាំចូល។ លោកស្រី ឱ វណ្ណឌីន ពន្យល់ទៀតថា៖ «យើងស្ថិតនៅក្នុងខ្សែបន្ទាត់ក្រហម ដូច្នេះជើងរបស់យើងមិនត្រូវឆ្លងផុតពីខ្សែបន្ទាត់ក្រហមនេះឲ្យសោះ។ ហើយយើងត្រូវខិតខំថែរក្សាសុខភាព ដោយបុគ្គលគ្រប់រូប ត្រូវបន្តអនុវត្តវិធានការការពារខ្លួនឲ្យបានខ្ជាប់ខ្ជួន»។
សូមបញ្ជាក់ថា គិតត្រឹមថ្ងៃទី២០ មេសានេះ កម្ពុជាមានអ្នកឆ្លងកូវីដ១៩ សរុបចំនួន ១២២ករណី ក្នុងនោះ១០៧នាក់ បានជាសះស្បើយ។ ដោយឡែក ចំនួនវត្ថុសំណាកដែលបានធ្វើវិភាគរកកូវីដ-១៩នេះ មានជិត ១ម៉ឺនសំណាក ដោយគិតចាប់ពីខែ មករា ដល់ថ្ងៃទី១៩ ខែមេសា ឆ្នាំ២០២០៕
Tag:
COVID19
សុខាភិបាល
ឱ វណ្ណឌីន
© រក្សាសិទ្ធិដោយ thmeythmey.com