COVID-19
អន្តរជាតិ
WHO ថា អត់មានលាក់បាំងព័ត៌មានអ្វីពី COVID-19 ឡើយ អគ្គនាយក WHO លោក Tedros Adhanom Ghebreyesus។ រូបភាព AFP
× អគ្គនាយកអង្គការសុខភាពពិភពលោក (WHO) នៅតែអះអាងថា ខ្លួនមិនបានលាក់បាំងព័ត៌មានអ្វីទាក់ទងនឹងជំងឺផ្លូវដង្ហើមបង្កដោយកូរ៉ូណាវីរុស (COVID-19) ។ ការអះអាងនៅថ្ងៃទី២០ ខែមេសា ជាការឆ្លើយតបនឹងការចោទប្រកាន់ម្ដងហើយម្ដងទៀតរបស់អាមេរិកដែលថា អង្គការនេះមិនបានចាត់ចែងការងារឲ្យត្រឹមត្រូវ និងមិនផ្ដល់ព័ត៌មានពេល COVID-19 ចាប់ផ្ដើមលេចមុខ ហើយស៊ុំគ្រលំជាមួយចិនទៅទៀត។
ក្នុងសន្និសីទសារព័ត៌មានថ្ងៃទី២០ ខែមេសា អគ្គនាយក WHO លោក Tedros Adhanom Ghebreyesus បានអះអាងជាថ្មីថា អង្គការរបស់លោក បាននិយាយតាំងពីដើមទីមកពីគ្រោះថ្នាក់នៃវីរុសដែលផ្ទុះចេញពីទីក្រុងវូហាន ខេត្តហ៊ូប៉ី ប្រទេសចិន ហើយមិនដែលបិទបាំងព័ត៌មានណាមួយឡើយ។ លោក Tedros បញ្ជាក់ថា អង្គការរបស់លោក ក៏គ្មានអាថ៌កំបាំងអ្វីទាំងអស់។
WHO បានក្លាយជាមុខសញ្ញារិះគន់របស់អាមេរិក និងប្រទេសមួយចំនួនទៀតចំពោះចំណាត់ការខ្លួនតបនឹងការផ្ទុះ COVID-19 នៅចិន ហើយក៏រាលដាលពេញពិភពលោកដូចបច្ចុប្បន្ន។ ទីក្រុងវ៉ាស៊ីនតោន ចោទ WHO ថា មិនបានផ្ដល់ព័ត៌មានច្បាស់លាស់នៅដំណាក់កាលដំបូង ហើយណែនាំមិនឲ្យមានការបិទជើងហោះហើរទៀតផងក្រោមហេតុផលថា ប៉ះពាល់សេរីភាព និងមិនអាចទប់ស្កាត់វីរុសបានអ្វីទាំងអស់។ អាមេរិក ក៏ថែមទាំងប្រកាសផ្អឹបលុយសម្រាប់ WHO ផងដែរ។
«យើងបានព្រមានតាំងពីថ្ងៃទីមួយថា នេះជាបិសាចដែលមនុស្សគ្រប់រូបត្រូវប្រយុទ្ធជាមួយ។» លោក Tedros និយាយបែបនេះក្នុងសន្និសីទសារព័ត៌មានដដែល។ អគ្គនាយកអង្គការទទួលបន្ទុកសុខភាពអន្តរជាតិរូបនេះ បន្ថែមថា អ្នកជំនាញ១៥មកពីមជ្ឈមណ្ឌលទប់ស្កាត់ជំងឺឆ្លងរបស់អាមេរិក (CDC) បានធ្វើការជាមួយ WHO លើការឆ្លើយតបនឹង COVID-19 ដែលការណ៍នេះបង្ហាញថា គ្មានអ្វីដែលត្រូវលាក់បាំងឡើយ។
ប្រមុខ WHO ក៏អះអាងឡើងវិញថា ស្ថាប័នរបស់លោក គឺបើកចំហរ មិនលាក់ព័ត៌មាន ហើយមានតែផ្ដល់ព័ត៌មានដល់ប្រទេសទាំងអស់ឲ្យបានរហ័ស សំដៅជួយពួកគេក្នុងការត្រៀមខ្លួនបានល្អ និងលឿនផងដែរ។
ឯរឿងតៃវ៉ាន់វិញ លោក Tedros និយាយការពារថា តៃវ៉ាន់ មិនមែនជាប្រទេសដំបូងដែលផ្ញើសារសួរនាំពីជំងឺនេះឡើយ។ លោក Tedros ទំនងជាឆ្លើយតបទៅអាមេរិលដែលចោទ WHO ថា មិនអើពើនឹងការព្រមានរបស់តៃវ៉ាន់ពីជំងឺរលាកសួតម្យ៉ាងនៅវូហានកាលពីខែធ្នូ ឆ្នាំ២០១៩ ។ លោកអគ្គនាយកបន្ថែមថា តៃវ៉ាន់មិនបានរាយការណ៍បែបនោះឡើយ៕
© រក្សាសិទ្ធិដោយ thmeythmey.com