ជាតិ
×![]()
ដោយ: ធឿន បញ្ញាឬទិ្ធ
ភ្នំពេញ៖ រដ្ឋមន្ត្រីក្រសួងមហាផ្ទៃ សម្ដេច ស ខេង បានសម្រេចផ្អាកសកម្មភាពអង្គការការពារ និងអភិរក្សសត្វ ព្រៃឈើ ជលផលកម្ពុជា ជាបណ្ដោះអាសន្ន កាលពីថ្ងៃទី២១ មេសា។ ការសម្រេចផ្អាកសកម្មភាពអង្គការមួយនេះ ក្រោមហេតុផលថា អង្គការនេះ បានអនុវត្តផ្ទុយពីច្បាប់។
សម្ដេច ស ខេង បានបញ្ជាក់ក្នុងលិខិតថា អង្គការនេះ បានធ្វើសកម្មភាពផ្ទុយពីប្រការ៨ នៃលក្ខន្តិកៈរបស់ខ្លួន ដែលតម្កល់ទុកនៅក្រសួងមហាផ្ទៃ និងពុំបានបំពេញកាតព្វកិច្ចតាមការកំណត់ក្នុងបទប្បញ្ញត្តិមាត្រា១០ និងមាត្រា២៥ នៃច្បាប់ស្តីពីសមាគម និងអង្គការមិនមែនរដ្ឋាភិបាល។ បើតាមរដ្ឋមន្ត្រីមហាផ្ទៃ សកម្មភាពខុសច្បាប់របស់អង្គការនេះ នឹងធ្វើឱ្យមានការយល់ច្រឡំជាមួយនឹងអាជ្ញាធរមានសមត្ថកិច្ច។
លិខិតរដ្ឋមន្ត្រីក្រសួងមហាផ្ទៃ បានបញ្ជាក់ដូច្នេះថា៖«សម្រេចផ្អាកសកម្មភាពរបស់អង្គការការពារ និងអភិរក្សសត្វ ព្រៃឈើ ជលផលកម្ពុជា ជាបណ្ដោះអាសន្នក្នុងរយៈពេល៩០ថ្ងៃ ដោយគិតចាប់ពីថ្ងៃជូនដំណឹងនេះទៅ»។
ក្រសួងមហាផ្ទៃ ក៏បានទុកពេល៣០ថ្ងៃ ឱ្យអង្គការមួយនេះ ធ្វើរបាយការណ៍បូកសរុបសកម្មភាពការងារ និងរបាយការណ៍ហិរញ្ញវត្ថុ ចន្លោះពី២០១៧ដល់២០១៩ ជាលាយលក្ខណ៍អក្សរអំពីព័ត៌មានរាល់គណនី និងអាស័យដ្ឋានស្នាក់ការកណ្ដាលអង្គការផងដែរ។ «ក្នុងករណីមិនអនុវត្តតាមការជូនដំណឹងនេះ ក្រសួងមហាផ្ទៃនឹងចាត់វិធានការតាមផ្លូវច្បាប់ជាធរមាន»។ នេះជាការបញ្ជាក់របស់រដ្ឋមន្ត្រីក្រសួងមហាផ្ទៃ៕
Tag:
ស ខេង
បរិស្ថាន
© រក្សាសិទ្ធិដោយ thmeythmey.com
