នៅថ្ងៃទី២១ ខែមេសា សារព័ត៌មានធំៗជាច្រើនបានផ្សាយពីសុខភាពរបស់មេដឹកនាំកូរ៉េខាងជើង គីម ជុងអ៊ុន ដែលត្រូវបានរាយការណ៍ថា ជួបបញ្ហាធ្ងន់ធ្ងរក្រោយការវះកាត់បេះដូង។ វេបសាយ Daily NK ដែលតាមដានស្ថានការណ៍កូរ៉េខាងជើង ជាអ្នកចេញផ្សាយមុនគេ ហើយក្រោយមកទូរទស្សន៍អាមេរិក CNN ក៏ស្រង់សម្ដីមន្ត្រីចារកម្មអាមេរិកថា វ៉ាស៊ីនតោនកំពុងតាមដានព័ត៌មាននេះដែរ ប៉ុន្តែកូរ៉េខាងត្បូងអះអាងថា មិនមានបញ្ហាអ្វីលើលោក គីម ឡើយ។ ក្នុងករណីលោក គីម ធ្លាក់ខ្លួនមិនអាចដឹកនាំកូរ៉េខាងជើងមែននោះ តើនរណានឹងស្នងតំណែងបន្ត?
សុខភាពរបស់មេដឹកនាំកូរ៉េខាងជើង គីម ជុងអ៊ុន ជាអាថ៌កំបាំងមួយសម្ងាត់បំផុតនៅកូរ៉េខាងជើង។ ការគ្រប់គ្រងយ៉ាងតឹងរ៉ឺងលើលំហូរព័ត៌មាននៅរដ្ឋកុម្មុយនីស្តមួយនេះ ធ្វើឲ្យគេពិបាកនឹងទទួលបានព័ត៌មានពិតពីបញ្ហាសំខាន់ណាមួយណាស់ កុំថាឡើយដល់រឿងរ៉ាវទាក់ទងនឹងមេដឹកនាំកំពូលទៅទៀតនោះ។ ព័ត៌មានផ្លូវការទាំងអស់ គឺត្រូវរង់ចាំការផ្សាយដោយទូរទស្សន៍រដ្ឋកូរ៉េខាងជើង KCTV ឬទីភ្នាក់ងារព័ត៌មានរដ្ឋ KCNA ជាដើម។
១. លោក គីម ជុងអ៊ុន ពិតជាមានបញ្ហាសុខភាពមែន
ទោះការផ្សាយរបស់ទូរទស្សន៍ CNN ធ្វើឲ្យរញ្ជួយប្រព័ន្ធផ្សព្វផ្សាយអន្តរជាតិក្ដី គេក៏នៅតែមិនទាន់ច្បាស់ពីសុខភាពលោក គីម ដដែល។ សូម្បីតែប្រធានាធិបតីអាមេរិក ដូណាល់ ត្រាំ ដែលមន្ត្រីរបស់លោកត្រូវបាន CNN ស្រង់សម្ដីតែមិនបញ្ចេញឈ្មោះ ក៏និយាយថា លោកមិនដឹងអ្វីទាំងអស់ពីបញ្ហាផ្ទាល់ខ្លួនលោក គីម ។
ប៉ុន្តែអ្វីដែលគេដឹងនោះ គឺលោក គីម ពិតជាមានបញ្ហាសុខភាពមែន។ មេដឹកនាំកូរ៉េខាងជើង ត្រូវបានគេដឹងថា ជាមនុស្សជក់បារីខ្លាំង ផឹកស្រា និងមានជំងឺទឹកនោមផ្អែមផង។ ពេលទូរទស្សន៍រដ្ឋកូរ៉េខាងជើងផ្សាយសកម្មភាពលោក គីម ជួបមន្ត្រី ឬចុះមូលដ្ឋាន គេតែងឃើញលោកជក់បារីយ៉ាងញឹកញាប់។ កន្លែងដែលលោកអង្គុយ តែងមានចានគោះបារីជានិច្ច។ កាលពីឆ្នាំ២០១៤ លោក គីម ធ្លាប់បាត់មុខជាង៥០ថ្ងៃ ហើយក្រោយមក គេក៏ឃើញលោកកាន់ឈើច្រត់ដើរផងដែរ។
២. នរណាស្នងតំណែង បើលោក គីម មានបញ្ហាឥឡូវមែន?
ព័ត៌មាននៃបញ្ហាសុខភាពរបស់លោក គីម ជុងអ៊ុន ពេលនេះ បានរំលេចភាពមិនច្បាស់នៃការបន្តតំណែងនៅកូរ៉េខាងជើង ព្រោះក្នុងរយៈពេលនៃការកាន់តំណែងមិនទាន់បានមួយទសវត្សរ៍ផងនោះ លោកទំនងមិនទាន់គិតគូរដល់រឿងបន្តវេនអ្វីឡើយ។ ក្នុងករណី លោក គីម មានបញ្ហាសុខភាពខ្លាំងមែននោះ សាច់ញាតិត្រកូល គីម ផ្សេងទៀត ទំនងជាដឹកនាំកូរ៉េខាងជើងបន្តបាន ដោយមានជំនួយពីមន្ត្រីជាន់ខ្ពស់របស់បក្ស និងរដ្ឋ។
អ្នកស្រី គីម យ៉ូចុង ប្អូនស្រីបង្កើតលោក គីម ជុងអ៊ុន ត្រូវបានមើលឃើញថា ជាបេក្ខភាពម្នាក់មកពីត្រកូល គីម ។ អ្នកស្រីមានឥទ្ធិពលខ្លាំងក្នុងជួរបក្សពលករកូរ៉េ និងជាសមាជិកមិនអចិន្ត្រៃយ៍ការិយាល័យនយោបាយបក្សផងដែរ។ អ្នកស្រី ត្រូវបានមើលឃើញថា ជាមនុស្សជំនិតរបស់បងប្រុសខ្លួន ហើយតែងធ្វើដំណើរជាមួយគ្នា។ ជំនួបជាមួយប្រធានាធិបតីអាមេរិក ចិន និងកូរ៉េខាងត្បូង សុទ្ធតែមានវត្តមានអ្នកស្រី។ ប៉ុន្តែគេមិនដឹងថា មន្ត្រីជាន់ខ្ពស់ដទៃ ឈរខាងអ្នកស្រីឬយ៉ាងណាឡើយ។
លោក គីម ជុងអ៊ុន នៅមានបងប្រុសបង្កើតម្នាក់ទៀតឈ្មោះ គីម ចុងឈុល ។ ប៉ុន្តែលោក គីម ចុងឈុល មិនដែលចេញមុខលើឆាកនយោបាយឡើយ ហើយគេក៏មានឥទ្ធិពលអ្វីដូចប្អូនស្រីដែរ។ អតីតអ្នកការទូតកូរ៉េខាងជើង ថេ យ៉ុងហូ ដែលកំពុងរស់នៅកូរ៉េខាងត្បូង និយាយថា លោក គីម ចុងឈុល ជាមនុស្សស្រឡាញ់ហ្គីតា ហើយមិនខ្វល់ខ្វាយនឹងនយោបាយអ្វីទេ។ យ៉ាងណាមិញ ជាសាច់ញាតិត្រកូល គីម ភេទប្រុស លោក គីម ចុងឈុល ទំនងអាចមានការគាំទ្រច្រើន។
ក្រៅពីបងប្អូនបង្កើត លោក គីម ក៏មានកូនប្រុសស្រីផងដែរ។ បើតាមភ្នាក់ងារចារកម្មកូរ៉េខាងត្បូង លោក គីម ដែលមានវ័យខ្ទង់៣៦ឆ្នាំ មានកូនបីនាក់ជាមួយភរិយា រី សុលជូ ។ កូនប្រុសរបស់លោក អាចមានអាយុ១០ឆ្នាំ។ បើលោក គីម ចង់ឲ្យកូនខ្លួនបន្តតំណែងនោះ លោកត្រូវបានជំនួយពីប្អូនស្រីដែលប្រលូកក្នុងនយោបាយបានយូរ និងមន្ត្រីជំនិតក្នុងការតម្រង់ទិស ឬដឹកនាំកូរ៉េខាងជើងសិន ទម្រាំកូនប្រុសធំល្មម។
លោក ឆេ យ៉ុងហេ មនុស្សមានអំណាចទីពីរបន្ទាប់ពីលោក គីម និងអតីតនាយករដ្ឋមន្ត្រី ប៉ាក់ ពុងជូ ជាមន្ត្រីជាន់ខ្ពស់ក្នុងរចនាសម្ព័ន្ធដឹកនាំកូរ៉េខាងជើងដែលអាចជួយឃ្លាំមើលកិច្ចការប្រទេសជាតិ បើអ្នកបន្តតំណែងមិនទាន់អាចដឹកនាំប្រទេសបាន៕