ភ្នំពេញ៖ «ស្ទឹងពពក» ជាតំបន់ទេសចរណ៍ និងស្អាតអស្ចារ្យមួយទៀត ដែលមានទីតាំងនៅភូមិក្រាំងចេក ឃុំដងពែង ស្រុកស្រែអំបិល ខេត្តកោះកុង។ ពពករសាត់ដេដាស ជាផ្ទាំងទស្សនីយភាពថ្មីមួយសម្រាប់អ្នកទេសចរដែលបានទៅដល់តំបន់«ស្ទឹងពពក»។ ក្រៅពីនេះ គេអាចគយគន់ទេសភាពទឹកធ្លាក់ និងដងព្រែក អមដោយព្រៃព្រឹក្សាដ៏ត្រឈឹងត្រឈៃត្រជាក់ល្អឹមទៀតផង។
ដើម្បីជ្រាបច្បាស់ សូមអញ្ជើញស្ដាប់កិច្ចសម្ភាស រវាងកញ្ញា ញឹក ស្រីល័ក្ខ អ្នកសារព័ត៌មានថ្មីៗ ជាមួយលោក សៀង មករា អ្នករៀបចំដំណើរកម្សាន្តបែបផ្សងព្រេង ជុំវិញតំបន់«ស្ទឹងពពក» នេះ៖
លោកសៀ ង មករា ជាអ្នកដាក់ឈ្មោះឲ្យតំបន់ទេសចរណ៍ថ្មីនេះថា«ស្ទឹងពពក» ក្រោយពីលោក និងគ្រួសារ បានមកដល់ទីតាំង«ស្ទឹងពពក»កាលពី៤ឆ្នាំមុន។ ជាអ្នករៀបចំដំណើរកម្សាន្តបែបផ្សងព្រេង និងធ្លាប់ដើរលេងច្រើនកន្លែង លោក មករា យល់ច្បាស់ថាតំបន់«ស្ទឹងពពក» មានសក្តានុពលទេសចរណ៍ដ៏អស្ចារ្យ។ ដូច្នេះហើយ លោក ក៏បានផ្សព្វផ្សាយតាមបណ្តាញសង្គមអំពីទិដ្ឋភាពដ៏អស្ចារ្យ នៅតំបន់នេះទៅសាធារណជន។
ដើម្បីទៅដល់ «ស្ទឹងពពក» គេត្រូវធ្វើដំណើរលើផ្លូវជាតិលេខ៤៨ ឆ្លងកាត់ស្ពានស្រែអំបិលរួចធ្វើដំណើរប្រមាណ ១៥០ម៉ែត្រ បត់ស្ដាំតាមផ្លូវដីក្រហម ឆ្ពោះទៅស្ថានីយវារីអគ្គិសនីគីរីរម្យ៣ ហើយត្រូវបន្តដំណើរហួសវារីអគ្គិសនីប្រមាណ ១៥០ម៉ែត្រ នោះនឹងដល់ផ្ទះប្រជាសហគមន៍ស្ទឹងពពក។ ភ្ញៀវទេសចរ ត្រូវជិះម៉ូតូឡើងភ្នំ ដែលដឹកដោយប្រជាសហគមន៍ ឆ្ពោះទៅស្ទឹងពពក ដែលមានចម្ងាយ ៣,៥០០ម៉ែត្រ។
តាមលោក សៀង មករា ភ្ញៀវទេសចរអាចគយគន់ទេសភាពពពករសាត់ដេដាសសក្បុស យ៉ាងស្រស់ស្អាត នៅដើមខែវស្សា និងដើមរដូវរងា។ ក្រៅពីនេះ អ្នកទេសចរអាចទស្សនាដងព្រែក និងទឹកធ្លាក់ពីភ្នំ បោះតង់ ឬចងអង្រឹងស្នាក់នៅក្នុងតំបន់ទេសចរធម្មជាតិដ៏ស្ងប់ស្ងាត់នេះបានដែរ។
លោក សៀង មករា ប្រាប់សារព័ត៌មានថ្មីៗតាមទូរសព្ទថា៖«តំបន់នេះ ត្រូវបានប្រជាសហគមន៍រកឃើញយូរហើយ ប៉ុន្តែប្រជាពលរដ្ឋរស់នៅទីនោះ គិតថាវាជាកន្លែងធម្មតា។ ប៉ុន្តែសម្រាប់ខ្ញុំ ខ្ញុំមើលឃើញថា វាមានសក្ដានុពល ដែលអាចទាក់ទាញភ្ញៀវទេសចរបាន»។
ដោយសារតែតំបន់នេះ នៅមិនទាន់មានការរៀបចំ ឲ្យក្លាយជាតំបន់ទេសចរណ៍នោះ លោក សៀង មករា ក៏បានជួយជ្រោមជ្រែង រៀបចំជាសហគមន៍ទេសចរណ៍ ដែលអាចផ្តល់ប្រាក់ចំណូលដល់ប្រជាសហគមន៍នៅទីនេះផងដែរ។ ភ្ញៀវទេសចរម្នាក់ តម្រូវឲ្យបង់ថ្លៃសំបុត្រចំនួន ១ម៉ឺនរៀល សម្រាប់វិភាគទានដល់សហគមន៍ ដែលពួកគាត់មានតួនាទីយាមល្បាតនៅលើភ្នំ និងមានទាហានការពារតំបន់ទំនប់វារីអគ្គិសនីគីរីរម្យ ៣ ផងដែរ។
ទោះបីតំបន់ «ស្ទឹងពពក» មានទេសភាពស្រស់ស្អាត ប៉ុន្តែភ្ញៀវទេសចរត្រូវដឹងពីស្ថានភាពផ្លូវទៅកាន់តំបន់នេះ។ លោក សៀង មករា បញ្ជាក់ថា៖«តំបន់ស្ទឹងពពកនេះ ចូលដល់ចុងខែមិថុ នា និងដើមខែកក្កដា គឺមានការបិទចរាចរណ៍ឡើងភ្នំ រហូតដល់ចុងខែតុលា។ ដោយសារខែភ្លៀងខ្លាំង មានថ្មបាក់ និងផ្លូវបេតុង មានស្លែ ហើយមានហានិភ័យច្រើន។ ដូច្នេះយើងបិទនៅរដូវភ្លៀង ហើយចុងខែតុលា និងដើមខែវិច្ឆិកាទើបយើងបើកវិញ»។
ក៏ប៉ុន្តែអ្វីដែលអ្នករៀបចំដំណើរកម្សាន្តរូបនេះបារម្ភនោះ គឺរឿងបញ្ហាបរិស្ថាន នៅពេលដែលមានទេសចរកាន់តែច្រើន មកទស្សនាតំបន់នេះ។ ដូច្នេះហើយ លោក សៀង មករា បានអំពាវនាវដល់ភ្ញៀវទេសចរដែលទៅកម្សាន្តនៅស្ទឹងពពក ចូលរួមថែរក្សាអនាម័យ និងសម្អាតបរិស្ថាន បន្ទាប់ពីទទួលទាន និងត្រូវទុកដាក់សំរាមឲ្យបានត្រឹមត្រូវ។
គួរកត់សម្គាល់ថា ក្រៅពីតំបន់ទេសចរណ៍ថ្មី«ស្ទឹងពពក» ខេត្តកោះកុង ក៏មានតំបន់ទេសចរណ៍ធម្មជាតិជាច្រើនកន្លែងទៀតដែរ តួយ៉ាងតំបន់អារ៉ែង និងខ្នងផ្សាជាដើម៕
រូបភាពពីហ្វេសប៊ុកផេកស្ទឹងពពក៖