COVID-19
អន្តរជាតិ
រូបភាព Xinhua
×![]()
ដោយ: តន ចាន់រិទ្ធារ៉ា
ឆ្មាចិញ្ចឹមពីរក្បាលនៅរដ្ឋញូវយ៉ក ត្រូវបានរកឃើញថា ឆ្លងជំងឺ COVID-19 ។ នេះបើតាមការបញ្ជាក់ទីភ្នាក់ងារសហព័ន្ធអាមេរិកនៅថ្ងៃទី២២ ខែមេសា។ សត្វឆ្មាទាំងពីរ ក្លាយជាសត្វចិញ្ចឹមដំបូងនៅអាមេរិកដែលមានផ្ទុក COVID-19 និងស្ថិតក្នុងចំណោមសត្វតិចតួចដែលឆ្លងជំងឺនេះលើពិភពលោក។
ក្នុងចំណោមករណីឆ្លង COVID-19 រាប់សែននាក់នៅអាមេរិក ក៏មានសត្វឆ្មាពីរក្បាលផងដែរ។ សត្វឆ្មាទាំងពីរក្បាលនេះ រស់នៅដាច់ពីគ្នាក្នុងរដ្ឋញូវយ៉ក។ ពួកវា មានរោគសញ្ញាធម្មតា ហើយរំពឹងថា នឹងសះស្បើយឆាប់ៗនេះ។ នេះបើតាមការបញ្ជាក់របស់ក្រសួងកសិកម្ម និងមជ្ឈមណ្ឌលទប់ស្កាត់ជំងឺឆ្លងអាមេរិក (CDC) ។
សម្រាប់ករណីឆ្មារទីមួយ ក្នុងផ្ទះដែលវារស់នៅ មិនមាននរណាម្នាក់មាន COVID-19 ឡើយ។ អ្នកជំនាញអាមេរិកជឿថា ឆ្មានេះអាចឆ្លងវីរុសពីអ្នកជំងឺខាងក្រៅផ្ទះ ឬពីអ្នកផ្ទះដែលមាន COVID-19 តែមិនចេញរោគសញ្ញា។ នេះបើតាមការផ្សាយរបស់ទីភ្នាក់ងារព័ត៌មាន Xinhua ។
ករណីមួយទៀត ម្ចាស់របស់សត្វឆ្មា មានលទ្ធផល COVID-19 វិជ្ជមាន មុនពេលឆ្មាចេញរោគសញ្ញា។ ទាំងក្រសួងកសិកម្មអាមេរិក ទាំង CDC មិនទាន់អាចរកភស្តុតាងបញ្ជាក់ថា ឆ្មាអាចចម្លងវីរុសបានឡើយ។ CDC របស់អាមេរិក បានណែនាំឲ្យប្រជាជនរក្សាឆ្មាក្នុងផ្ទះ និងបញ្ចៀសការយកសត្វចិញ្ចឹមទៅកាន់ទីសាធារណៈ ខណៈអ្នកជំនាញកំពុងសិក្សាពីករណីនេះ។
នេះជាករណីឆ្លងCOVID-19 លើសត្វចិញ្ចឹមលើកដំបូងនៅអាមេរិក តែមិនមែនជាករណីឆ្លងលើសត្វថ្មីឡើយ។ កន្លងទៅ អាជ្ញាធរអាមេរិក ក៏បានរាយការណ៍ពីករណីឆ្លងវីរុសលើសត្វតោមួយក្បាលផងដែរ។នៅហុងកុងវិញ ករណីឆ្លងបានរកឃើញលើសត្វឆ្មា និងឆ្កែផងដែរ៕
Tag:
ឆ្មា
COVID-19
អាមេរិក
© រក្សាសិទ្ធិដោយ thmeythmey.com
