COVID-19
កីឡាអន្តរជាតិ
អន្តរជាតិ
COVID-19៖ ក្លិប Wuhan Zall ចាប់ផ្តើមហ្វឹកហាត់ ក្រោយត្រឡប់ចូលវូហានបាន៥ថ្ងៃ
រូបភាព៖ Wuhan Zall FC Club
×![]()
ដោយ: ទេព ពិទូរ្យ
កីឡាកររបស់ក្រុម Wuhan Zall នៃលីគកីឡាករបាល់ទាត់កំពូលចិន (Chinese Super League) ចាប់ផ្តើមបើកការហ្វឹកហាត់នៅឯមូលដ្ឋានរបស់ខ្លួនក្នុងក្រុងវូហាន បន្ទាប់ពីត្រឡប់ចូលស្រុកវិញបាន៥ថ្ងៃ។ កីឡាកររបស់ Wuhan Zall បានអាក់ខានចូលប្រទេសជាង៣ខែឯណោះ ដោយសារវិបត្តិនៃជំងឺឆ្លង COVID-19។
Wuhan Zall បានស្នាក់នៅជំរំហ្វឹកហាត់នៅឯប្រទេសអេស្ប៉ាញតាំងពីខែមករាម្លេះ ពោលគឺចាប់តាំងពីជំងឺឆ្លង COVID-19 បានកើនឡើងកាន់តែខ្លាំងក្នុងក្រុងវូហាន ប្រទេសចិន។ វូហានជាតំបន់ដែលមានករណីឆ្លងជំងឺរលាកសួតបង្កដោយកូរ៉ូណាប្រភេទថ្មីដំបូងគេ ក្នុងប្រទេសចិន និងជាក្រុងដែលត្រូវប្រកាសឲ្យបិទមុនគេផងដែរ។
ក្លិបដែលស្ថិតក្នុងក្រុងវូហានមួយនេះ បានវិលត្រឡប់ពីប្រទេសអេស្ប៉ាញចូលមាតុភូមិវិញកាលពីថ្ងៃទី១៨ ខែមេសា តាមរយៈជើងហោះហើរ និងរថភ្លើងដោយឆ្លងកាត់អាល្លឺម៉ង់ និងដាក់ចត្តាឡីស័ក នៅក្រុង Shenzhen ប្រទេសចិន ៣សប្តាហ៍ទៀតផង។
ក្រោយត្រឡប់ចូលប្រទេស និងអនុញ្ញាតឲ្យជួបជុំគ្រួសាររយៈពេល៥ថ្ងៃរួចមក នៅថ្ងៃទី២៣ ខែមេសា ក្រុមលីគកំពូលចិនមួយនេះបានបើកការហ្វឹកហាត់វិញ បើទោះមានការរឹតត្បិតលើវិធានការគម្លាតសុវត្តិភាពនៅក្នុងប្រទេសចិនក៏ដោយ។
ជុំវិញការត្រឡប់ចូលជំរំហ្វឹកហាត់នេះ ក្លិប Wuhan Zall មានវិធានការរឹតបន្តឹងមួយចំនួនសម្រាប់អ្នកពាក់ក្នុងក្លិបទាំងអស់ ដូចជាត្រូវពាក់ម៉ាស់ការពារ ហើយប្រើថ្នាំសម្លាប់មេរោគដែលអាចរកបាននៅច្រកចេញចូលកន្លែងហ្វឹកហាត់ និងមជ្ឈមណ្ឌលអាហារ ឬកន្លែងហាត់ប្រាណ។ មួយវិញទៀត ក្លិបក៏បានដាក់បម្រាមលើកីឡាករ គ្រូបង្វឹក និងបុគ្គលិកធ្វើការទាំងអស់ មិនឲ្យទទួលទានអាហារពេលល្ងាច ឬចូលរួមក្នុងសកម្មភាពសង្គមណាមួយឡើយ។
ពួកគេក៏ត្រូវទទួលការត្រួតពិនិត្យសីតុណ្ហភាពរាងកាយជារៀងរាល់ថ្ងៃ។ ហើយវិធីសាស្ត្ររឹតត្បិតទាំងនេះនឹងត្រូវអនុវត្តរហូតដល់មានការជូនដំណឹងបន្ថែមពីរដ្ឋាភិបាលក្នុងតំបន់។
Wuhan Zall បានបញ្ចប់ទៅក្នុងចំណាត់ថ្នាក់ទី៦ ក្នុងតារាងលីគកំពូលចិន CSL ក្នុងរដូវកាល ២០១៩ ក្រោមការដឹកនាំរបស់លោក Li Tie។ លោក Li Tie ដែលជាអតីតកីឡាកររបស់ Everton បានផ្លាស់ទៅដឹកនាំក្រុមជម្រើសជាតិចិនវិញកាលពីខែមករា បន្ទាប់ពីការចាកចេញរបស់លោក Marcelo Lippi។
ចិន មានចំនួនអ្នកស្លាប់ដោយសារ COVID-19 ជាង៤៦០០នាក់ គិតត្រឹមថ្ងៃទី២៤ ខែមេសានេះ។ អ្នកឆ្លងមានចំនួនជាង៨ម៉ឺននាក់ ក្នុងនោះជាសះស្បើយជាង៧៧ពាន់ករណី។ ចិនបានធ្លាក់ចំណាត់ថ្នាក់ពីចំនួនអ្នកឆ្លង និងស្លាប់ច្រើនជាងគេលើលោកទៅលេខ៨វិញ ខណៈអាមេរិកឡើងទៅឈរកំពូលតារាង តាមពីក្រោយដោយអេស្ប៉ាញ អ៊ីតាលី បារាំង និងអាល្លឺម៉ង់៕
Tag:
Wuhan Zall
© រក្សាសិទ្ធិដោយ thmeythmey.com
