COVID-19
អន្តរជាតិ
ចំនួនស្ត្រីដឹកនាំជាច្រើននាក់លើពិភពលោក បានធ្វើការយ៉ាងប្រសើរក្នុងការទប់ស្កាត់កូវីត-១៩
អធិការបតីរបស់ប្រទេសអាល្លឺម៉ង់ លោកស្រី អង់ជែឡា មើគែល (Angela Merkel)-AFP
×![]()
ដោយ: គី ចំណា
នៅក្នុងប្រទេសតៃវ៉ាន់ ការអន្តរាគមន៍ដោយយកចិត្តទុកដាក់ពីរដ្ឋាភិបាលបានកាត់បន្ថយការឆ្លងនៃវីរុសកូវីត-១៩បានដោយជោគជ័យ។ លើសពីនេះ ប្រទេសតៃវ៉ាន់បាននាំចេញផលិតផលម៉ាស់របស់ខ្លួនរាប់លានបន្ទះទៅកាន់សហគមន៍អឺរ៉ុបបន្ថែមទៀត។ ចំណែកឯនៅប្រទេសអាល្លឺម៉ង់វិញ ការធ្វើតេស្តរកវត្តមានកូវីត-១៩ដែលមានទ្រង់ទ្រាយធំជាងគេនៅអឺរ៉ុបត្រូវបានអនុវត្តឡើងរហូតទៅដល់៣៥ម៉ឺនតេស្តក្នុងមួយថ្ងៃ។
បើងាកមកមើលប្រទេសនូវែលហ្សេឡង់វិញ ការដាក់បញ្ជាឲ្យផ្អាកដំណើរការរបស់វិស័យទេសចរណ៍ និងការបិទប្រទេសចំនួនមួយខែ បានធ្វើឲ្យអ្នកស្លាប់ពីកូវីត-១៩នៅក្នុងប្រទេសនោះមានត្រឹមតែ៩ករណីតែប៉ុណ្ណោះ។ ប្រទេសទាំងបីដែលបានរៀបរាប់ខាងលើនេះ សុទ្ធសឹងតែបានធ្វើការអន្តរាគមន៍ដោយទាន់ពេលវេលា និងមានប្រសិទ្ធភាពខ្ពស់ក្នុងការប្រយុទ្ធប្រឆាំងនឹងវីរុស ទោះបីជាប្រទេសទាំងបីនេះស្ថិតនៅក្នុងតំបន់ផ្សេងៗគ្នានៃពិភពលោកក៏ពិតមែន។ នេះបើតាមការបកស្រាយចេញពីគេហទំព័រទូរទស្សន៍ CNN នៃសហរដ្ឋអាមេរិក កាលពីថ្ងៃទី១៦ ខែមេសា។
អ្វីដែលគួរឲ្យភ្ញាក់ផ្អើលផងដែរនោះគឺថា ប្រទេសទាំងបីដែលបានរៀបរាប់ខាងលើសុទ្ធសឹងតែស្ថិតនៅក្រោមការដឹកនាំពីសំណាក់ស្ត្រីភេទ។ ការកំណត់វិធានការទាន់ពេលវេលាដោយមេដឹកនាំនារីនៅក្នុងអំឡុងនៃការឆ្លងវីរុសកូវីត-១៩ បានធ្វើឲ្យមានការកត់សម្គាល់យ៉ាងខ្លាំង បើទោះបីជាចំនួនអ្នកដឹកនាំសំខាន់ៗលើពិភពលោកមានប្រមាណតែ៧ភាគរយប៉ុណ្ណោះដែលជាភេទស្រី។
ការសម្រេចចិត្តច្បាស់លាស់ និងរហ័ស
ប្រទេសមួយចំនួនដែលបានរៀបរាប់ខាងលើសុទ្ធសឹងតែជាប្រទេសដែលប្រកាន់លទ្ធិប្រជាធិបតេយ្យ និងមានជំនឿទុកចិត្តខ្ពស់ទៅលើរដ្ឋាភិបាលពីសំណាក់មហាជន។ នៅចំពោះមុខនៃការឆ្លងវីរុស ពួកគេបានអនុវត្តការធ្វើតេស្តទ្រង់ទ្រាយធំ ផ្តល់សេវាកម្មវេជ្ជសាស្ត្រដែលមានគុណភាព និងទូលំទូលាយ យកចិត្តទុកដាក់ខ្លាំងក្នុងការតាមដានចលនាវីរុស ឬ ការផ្អាកចលនារបស់មនុស្សនៅក្នុងទីសាធារណៈក្នុងកម្រិតតឹងរឹងជាដើម។
ប្រធានាធិបតីប្រទេសតៃវ៉ាន់ លោកស្រី សៃ អ៊ីងវេន (Tsai Ing-wen) ក្រោយពីបានទទួលដំណឹងពីការរីករាលដាលដំបូងនៃកូវីត-១៩ នៅឯទីក្រុងវូហាននៃប្រទេសចិនកាលពីអំឡុងខែធ្នូ ឆ្នាំ២០១៩ បានបញ្ជាឲ្យបានការត្រួតពិនិត្យយ៉ាងហ្មត់ចត់ទៅលើជើងហោះហើរធ្វើដំណើរមកពីទីក្រុងមួយនេះ ចូលមកកាន់ដែនដីកោះតៃវ៉ាន់។ ក្រោយមក លោកស្រីបានបង្កើតទីបញ្ជាការគ្រប់គ្រងជំងឺអាសន្នរោគ បន្ថែមការផលិតសម្ភារៈវេជ្ជសាស្ត្រ និងដាក់កម្រិតលើជើងហោះហើរពីប្រទេសចិន ទីក្រុងម៉ាកាវ និងហុងកុង។ ជាលទ្ធផល ប្រទេសតៃវ៉ាន់បានរកឃើញករណីឆ្លងកូវីត-១៩ តែ៣៩៣ករណី និងអ្នកស្លាប់៦ករណីប៉ុណ្ណោះ នៅក្នុងដែនដីដែលមានប្រជាជនរស់នៅប្រមាណ២៤លាននាក់ និងមានទីតាំងភូមិសាស្ត្រក្បែរគ្នាជាមួយនឹងប្រទេសចិន។
ធ្វើដំណើរមកកាន់ទ្វីបអឺរ៉ុបវិញ ប្រទេសអាល្លឺម៉ង់ ជាមួយនឹងចំនួនប្រជាជនសរុប៨៣លាននាក់ មានករណីឆ្លងប្រមាណតែ១៣២ពាន់នាក់ប៉ុណ្ណោះ និងមានតួរលេខអ្នកស្លាប់ដោយកូវីត-១៩សឹងតែតិចជាគេក្នុងចំណោមមួយលាននាក់ បើប្រៀបធៀបទៅនឹងប្រទេសផ្សេងៗទៀតក្នុងទ្វីបអឺរ៉ុប។ អធិការបតីរបស់ប្រទេសអាល្លឺម៉ង់ លោកស្រី អង់ជែឡា មើគែល (Angela Merkel) បានទទួលកំនើនកើនឡើងយ៉ាងខ្ពស់នៃអត្រាគាំទ្រ ទៅលើសមត្ថភាពនៃការគ្រប់គ្រងការឆ្លងវីរុស របស់លោកស្រី។
បន្តមកមើលប្រទេសនូវែលហ្សេឡង់ ដែលពឹងផ្អែកខ្លាំងលើវិស័យទេសចរណ៍ នៅក្នុងទ្វីបអូសេអានីវិញ លោកស្រីនាយករដ្ឋមន្ត្រី ចាស៊ីនដា អាឌើន (Jacinda Ardern) បានប្រកាសបិទការធ្វើដំណើរចូលនៃជនជាតិបរទេស និងការប្រកាសបិទប្រទេសរយៈពេល៤សប្តាហ៍ ផ្អាកការងារដែលមិនសូវសំខាន់ លើកលែងតែការធ្វើដំណើរទៅទិញអាហារ និងការហាត់ប្រាណក្បែរផ្ទះ។ ប្រទេសនូវែលហ្សេឡង់បានរកឃើញករណីឆ្លងប្រមាណតែ១៣០០ករណីប៉ុណ្ណោះ ជាមួយនឹងអ្នកស្លាបចំនួន៩ករណី។
ប្រទេសខាងជើងអឺរ៉ុប
ក្រុមនៃប្រទេសខាងជើងទ្វីបអឺរ៉ុប ឬ Nordic Countries ទាំង៥ប្រទេស ដែលក្នុងនោះ៤ប្រទេសត្រូវបានដឹកនាំដោយស្ត្រី បានរក្សាចំនួនករណីស្លាប់នៅតិចតួច បើប្រៀបធៀបទៅប្រទេសផ្សេងៗទៀតក្នុងទ្វីបអឺរ៉ុបដូចគ្នា។ នាយករដ្ឋមន្ត្រីនៃប្រទេសហ្វាំងឡង់ លោកស្រី សាណា ម៉ារីន (Sanna Marin) អាយុ៣៤ឆ្នាំ បានរៀបចំផែនការប្រឆាំងនឹងការឆ្លង ឲ្យមកត្រឹមតែ៥៩ករណីស្លាប់តែប៉ុណ្ណោះ ក្នុងប្រទេសដែលមានប្រជាជន៥.៥លាននាក់។ នាយករដ្ឋមន្ត្រីប្រទេសអ៊ីស្លង់ លោកស្រី កាទ្រីន ចាកូបស៍ដូធៀ (Katrín Jakobsdóttir) ជាមួយនឹងចំនួនអ្នករស់នៅ៣៦ម៉ឺននាក់ បានអនុវត្តតេស្តរកវត្តមានកូវីត-១៩។ លទ្ធផលបានបញ្ជាក់ថា ប្រមាណជាពាក់កណ្តាលនៃចំនួនប្រជាជនមានផ្ទុកវីរុស តែមិនទាន់បានបង្ហាញសញ្ញា។ អ៊ីស្លង់ក៏បានដាក់វិធានការតឹងរឹងក្នុងការទប់ស្កាត់ការឆ្លងនេះភ្លាមៗដែរ។ ចំណែកប្រទេសស្វីដង់វិញ ដែលជាក្រុមប្រទេសខាងជើងទ្វីបអឺរ៉ុប ដឹកនាំដោយលោកនាយករដ្ឋមន្ត្រី ស្តេហ្វាន់ ឡូហ្វវេន (Stefan Löfven) មិនបានអនុវត្តការបិទប្រទេសទាន់ពេលវេលា និងបន្តឲ្យគ្រឹះដ្ឋានសិក្សា និងអាជីវកម្មផ្សេងៗទៀតដំណើរការជាធម្មតា។ ជាលទ្ធផល ចំនួនអ្នកស្លាប់នៅក្នុងប្រទេសស្វីដង់បានកើនឡើងសឹងតែខ្ពស់ជាងគេនៅក្នុងទ្វីបអឺរ៉ុប។
មេដឹកនាំបុរសដែលមិនមានភាពជឿជាក់លើវិទ្យាសាស្ត្រ
ប្រធានាធិបតីកូរ៉េខាងត្បូងលោក មូន ចេអ៊ីន (Moon Jae-in) ពិតជាបានកាត់បន្ថយការរីករាលដាលនៃជំងឺឆ្លងបានល្អគួរជាទីកត់សម្គាល់មែន។ ប៉ុន្តែប្រទេសមួយចំនួនជាច្រើនទៀត ដឹកនាំដោយមេដឹកនាំបុរសដែលមិនមានភាពជឿជាក់លើទិន្នន័យវិទ្យាសាស្ត្រ បានធ្វើឲ្យប្រទេសរបស់ខ្លួនទទួលរងការឆ្លងយ៉ាងធ្ងន់ធ្ងរ គួរឲ្យព្រួយបារម្ភខ្លាំង។ ប្រធានាធិបតីអាមេរិក លោក ដូណាល់ ត្រាំ មិនបានយកចិត្តទុកដាក់ជាមួយនឹងការឆ្លងនេះទេ បើទោះបីជាមានការព្រមានបញ្ជាក់ពីក្រុមអ្នកវិទ្យាសាស្ត្រជាន់ខ្ពស់ក្តី។ សហរដ្ឋអាមេរិកមានអ្នកស្លាប់ប្រមាណជា២៥ពាន់នាក់ និងអ្នកឆ្លងប្រមាណជាកន្លះលាននាក់ទៀតពីវីរុសកូវីត-១៩។ នាយករដ្ឋមន្ត្រីប្រទេសអង់គ្លេស លោក បូរីស ចនសុន ក៏មិនបានអនុវត្តវិធានការទាន់ពេលវេលាផងដែរ ក្នុងអំឡុងពេលដែលប្រទេសផ្សេងៗទៀតនៅក្នុងទ្វីបអឺរ៉ុបកំពុងតែអនុវត្តវិធីសាស្ត្រការពាររៀងៗខ្លួន។ ការរាលដាលនៃកូវីត-១៩អាចនឹងមានលក្ខណៈធូរស្រាលជានេះប្រសិនបើលោកប្រធានាធិបតីចិន ស៊ី ជីនពីង មិនបានអនុញ្ញាតឲ្យប្រជាជនទីក្រុងវូហានប្រមាណ៥លាននាក់ធ្វើដំណើរចេញក្រៅ មុនពេលដែលទីក្រុងនោះត្រូវបានគេប្រកាសឲ្យបិទ។
តើគួរតែមានវត្តមានមេដឹកនាំស្ត្រីជាច្រើនរូបទៀតឬ?
គេពិបាកនឹងនិយាយខ្លាំងណាស់ថា តើមេដឹកនាំរូបណាបានបោះជំហានត្រឹមត្រូវគ្រប់គ្រាន់ក្នុងការគ្រប់គ្រងការឆ្លងមួយនេះ។ ប៉ុន្តែដោយយោងតាមឧទាហរណ៍ខាងលើ ចំនួនមេដឹកនាំជាស្ត្រីដែលបានអនុវត្តវិធានការច្បាស់លាស់ភ្លាមៗពិតជាមានច្រើនរូប។ ចំនួនដ៏តិចតួចនៃមេដឹកនាំជាស្ត្រី ដោយធៀបជាមួយនឹងបុរស មកត្រឹមពេលនេះបានបង្ហាញពីភាពជោគជ័យក្នុងការទប់ស្កាត់ការឆ្លងនៃវីរុសកូវីត-១៩។ នេះក៏បានបង្ហាញផងដែរថា សមភាពយេនឌ័ររវាងបុរស និងស្ត្រីពិតជាមានភាពសំខាន់ខ្លាំងនៅក្នុងឆាកដឹកនាំអន្តរជាតិ៕
© រក្សាសិទ្ធិដោយ thmeythmey.com
