រាជធានីភ្នំពេញ៖ ចាប់តាំងពីមានការផ្ទុះរាតត្បាត និងការបន្តរីករាលដាលនៃជំងឺ កូវីដ-១៩ ក្នុងប្រទេសកម្ពុជា មានស្ថាប័នជាច្រើនបានបង្ហាញនូវក្តីព្រួយបារម្ភ និងផ្តោតការយកចិត្តទុកដាក់ខ្ពស់បំផុតលើបញ្ហានេះ។ ជាពិសេស មន្ទីរពេទ្យ និងក្រុមអ្នកជំនាញផ្នែកវេជ្ជសាស្ត្រ ជាអ្នកដើរតួរយ៉ាងសំខាន់ក្នុងការទប់ស្កាត់ការរាតត្បាតនៃជំងឺកូវីដ-១៩។
តែបៃតង អូអ៊ិឈិ ដែលជាភេសជ្ជៈលំដាប់លេខ១ក្នុងប្រទេសកម្ពុជា បានចូលរួមចំណែកក្នុងការការពារតាមរយៈការជួយគាំទ្រដល់ក្រុមវេជ្ជបណ្ឌិត និងក្រុមអ្នកជំនាញផ្នែកវេជ្ជសាស្ត្រ
ក្នុងប្រទេសកម្ពុជា ដោយរួមសហការជាមួយ និងក្រសួងសុខាភិបាល បានផ្តល់ជូននូវទឹកអាល់កុលសម្លាប់មេរោគចំនួន ៣,៦០០ លីត្រ ម៉ាស់ចំនួន ៤០០០ រួមជាមួយ ផលិផលតែបៃតង អូអ៊ិឈិ ចំនួន ៣០០ កេះ ភេសជ្ជៈរេងជឺរចំនួន ១,០០០ កេះ និងទឹកសុទ្ធចំនួន ២០០ កេះ សរុបជាទឹកប្រាក់ចំនួន៣៦,៦០០ដុល្លារអាមេរិក ដល់មន្ទីរពេទ្យ និងមណ្ឌលសុខភាពនៅទូទាំងប្រទេស។ នេះជាការចូលរួមចំណែកដើម្បីប្រយុទ្ធប្រឆាំងនិងទប់ស្កាត់ ការរាតត្បាត នៃជំងឺ កូវីដ-១៩ ក្នុងប្រទេសកម្ពុជា ក្រោមយុទ្ធនាការ តែបៃតង អូអ៊ិឈិ ចូលរួមថែរក្សា ប្រទេសកម្ពុជា។
ពិធីប្រគល់-ទទួលជំនួយឧបត្ថម្ភខាងលើបានប្រារព្ធឡើងនៅថ្ងៃទី២០ ខែមេសា ឆ្នាំ២០២០ នៅក្រសួងសុខាភិបាល ក្រោមអធិបតីភាពឯកឧត្តម អេង ហួត រដ្ឋលេខាធិការក្រសួងសុខាភិបាល, ឯកឧត្តមវេជ្ជបណ្ឌិត យូ ពិសី អនុរដ្ឋលេខាធិការក្រសួងសុខាភិបាល និងដោយមានការចូលរួមពី លោកស្រី សៀង មុយ នាយកប្រតិបត្តិតំណាងឱ្យលោកឧកញ៉ា សុខ ហុង អគ្គនាយកក្រុមហ៊ុន អេច អេស ស៊ី បេវើរេចជីស ដែលជាក្រុមហ៊ុនទទួលសិទ្ធិផ្តាច់មុខ ក្នុងការចែកចាយផលិតផលតែបៃតង អូអ៊ិឈិ ក្នុងប្រទេសកម្ពុជា។
តែបៃតង អូអ៊ិឈិ មានការព្រួយបារម្ភ និងផ្តោតការយកចិត្តទុកដាក់លើការរីករាលដាលយ៉ាងឆាប់រហ័សនៃជំងឺ កូវីដ-១៩ នៅទូទាំងសកលលោក ដែលបានសម្លាប់ជីវិតមនុស្សរួមទាំងបុគ្គលិកសុខាភិបាលដែលប្រឈមនឹងហានិភ័យខ្ពស់ក្នុងការជួយសង្គ្រោះជីវិតអ្នកជំងឺ។ ហេតុដូចនេះ យើងខ្ញុំទាំងអស់គ្នាដែលជាក្រុមការងារ តែបៃតង អូអ៊ិឈិ សូមចូលរួមចំណែកជាមួយក្រសួងសុខាភិបាលកម្ពុជា ក្នុងការជួយគាំទ្រ និងផ្តល់ជាជំនួយឧបត្ថម្ភ។
ក្រុមហ៊ុនតែបៃតង អូអ៊ិឈិ សូមលើកទឹកចិត្តដល់ប្រជាជនកម្ពុជា រួមមាន៖ វេជ្ជបណ្ឌិត អ្នកជំនាញផ្នែកវេជ្ជសាស្ត្រ បុគ្គលិកសុខាភិបាល និងក្រុមគ្រូពេទ្យស្ម័គ្រទាំងអស់ សូមរក្សានូវភាពអត់ធ្មត់ និងរឹងមាំក្នុងស្ថានភាពដ៏លំបាកនេះ ព្រមទាំងគោរពតាមដំបូន្មានរបស់ក្រសួងសុខាភិបាល ដើម្បីយកឈ្នះលើវិបត្តិជម្ងឺឆ្លងនេះប្រកបដោយសុវត្ថិភាពទាំងអស់គ្នា។