អន្តរជាតិ
បច្ចេកវិទ្យា
×![]()
ដោយ: គី ចំណា
បើអ្នកមានឱកាសក្នុងការធ្វើដំណើរតាមនាវានៅតាមសមុទ្រ ទិដ្ឋភាពដ៏កម្រមួយដែលអ្នកអាចប្រទះគឺក្រុមសត្វដុលហ្វីនហែលក្នុងល្បឿនដំណាលគ្នាជាមួយនឹងនាវាដែលអ្នកកំពុងធ្វើដំណើរនោះ។ ជារឿយៗ ដុលហ្វីនទាំងនោះក៏អាចលោតចេញពីក្នុងទឹកដើម្បីបង្ហាញពីសម្រស់របស់វាផងដែរ។ គួរឲ្យបញ្ជាក់ផងដែរថា «ដុលហ្វីន»ទោះបីជាពួកវារស់នៅក្នុងមជ្ឈដ្ឋានទឹក និងមានរូបរាងដូចជាសត្វត្រីមែនក្តី តែអ្នកជំនាញបានចាត់ពពួកសត្វមួយនេះជាក្រុម«ថនិកសត្វ»ស្រដៀងគ្នានឹងមនុស្សដែរ ដែលមានលក្ខណៈមួយចំនួនដូចជា ការបង្កើតកូនផ្ទាល់ (មិនពងដូចត្រី) ដកដង្ហើមតាមសួត និងចិញ្ចឹមកូនដោយទឹកដោះ។ បើងាកទៅរកសំណួរខាងដើមវិញ ហេតុអ្វីបានជាសត្វដុលហ្វីនចូលចិត្តហែលនៅជិតកប៉ាល់? 
ដោយផ្នែកតាមការប្រែសម្រួលពីគេហទំព័រ animals.mom.me សត្វដុលហ្វីនគឺជាសត្វដែលមានការគិតខ្ពស់ជាសត្វដទៃៗជាច្រើនទៀត។ ពួកវារស់នៅក្នុងទឹកជាក្រុម ដែលមានការជួយមើលថែរទាំគ្នាទៅវិញទៅមក។ វាក៏ជាសត្វដែលចូលចិត្តសកម្មភាពលេងសប្បាយផងដែរ។ ហេតុផលសំខាន់ៗមួយចំនួនមានដូចជា៖
អាហារ៖ មនុស្សបានធ្វើដំណើរតាមផ្លូវទឹកអស់រយៈពេលជាច្រើនរយឆ្នាំមកហើយ មិនថាតាមក្បូន សំពៅ នាវាដើរដោយអូស ឬធ្យូងថ្មនោះទេ។ ដុលហ្វីនអាចហែលនៅជិតនាវាទាំងនោះក្នុងគោលបំណងមួយគឺដើម្បីរកអាហារ។ នៅពេលខ្លះអ្នកធ្វើដំណើរអាចគប់សាច់មួយចំនួនចូលទៅក្នុងទឹក។
លេងកម្សាន្ត៖ ពេលខ្លះទៀតវាគ្មានអ្វីក្រៅពីការហែលកម្សាន្តលេងនោះទេ។ ដុលហ្វីនជាសត្វមួយប្រភេទដែលចូលចិត្តលេងផងដែរ ដូចជាការហក់ចេញពីទឹកដើម្បីមើលទេសភាពសមុទ្រ សត្វដែលរស់នៅតាមផ្ទៃសមុទ្រដទៃទៀត និងពេលខ្លះនាវាដែលអ្នកកំពុងធ្វើដំណើរនេះឯង។
ការចង់ដឹង៖ ដូចជាបានបញ្ជាក់ខាងលើ សត្វដុលហ្វីនជាសត្វដែលមានការគិតខ្ពស់ និងមានទំនោរក្នុងការចង់ដឹងជាងសត្វដទៃ។ ពួកគេតែងហែលទៅរកស្ថានភាពអ្វីមួយដែលប្លែក ដើម្បីពិនិត្យ និងរៀនពីវា។ នៅក្នុងករណីនេះ មានដូចជាកប៉ាល់ជាដើម។
សន្សំកម្លាំង៖ ពេលខ្លះដុលហ្វីនប្រើប្រាស់រលកដែលបង្កើតដោយក្បាលនាវាក្នុងការជួយរុញពូកគេឲ្យទៅមុខ និងប្រើប្រាស់កម្លាំងតិចជាមុន។ ដូចគ្នាជាមួយនឹងអ្នកជិះស្គីសមុទ្រ ដោយប្រើប្រាស់កម្លាំងរបស់រលកធម្មជាតិផងដែរ។ ជាមួយនឹងការហែលជិតកប៉ាល់នេះ ពួកគេអាចហែលបានកាន់តែឆ្ងាយជាងមុនច្រើនគីឡូម៉ែត្រ៕
© រក្សាសិទ្ធិដោយ thmeythmey.com
