ជាតិ
សង្គមជាតិ
ក្រៅពីបង្រៀន លោកគ្រូ លីវ សុខុម ឆ្លៀតភ្ញាស់កូនមាន់លក់បានប្រាក់ពី២-៤លានរៀលក្នុងមួយខែ
×
ភ្នំពេញ៖ លោក លីវ សុខុម ជាគ្រូបង្រៀនមួយរូបនៅក្នុងក្រុងសំរោង ខេត្តឧត្តរមានជ័យ។ ក្រៅពីបង្រៀន លោកគ្រូ លីវ សុខុម ឆ្លៀតពេលភ្ញាស់កូនមាន់លក់ ហើយដែលលោកអាចមានចំណូលបន្ថែមពី២-៤លានរៀលក្នុងមួយខែ។
លោក លីវ សុខុម ជាគ្រូបង្រៀនក្របខណ្ឌមួយរូប នៅភូមិភ្នៀត សង្កាត់សំរោង ក្រុងសំរោង ខេត្តឧត្តរមានជ័យ។ លោកគ្រូ សុខុម ក៏ជាអ្នកជំនាញភ្ញាស់កូនមាន់លក់លើទីផ្សារនានានៅក្នុងខេត្តឧត្តរមានជ័យ និងបណ្តាខេត្តនានាផងដែរ។ តាមទំព័រហ្វេសប៊ុករបស់ក្រសួងកសិកម្ម រុក្ខាប្រមាញ់ និងនេសាទ លោកគ្រូ សុខុម ចាប់ផ្ដើមរបរភ្ញាស់កូនមាន់នៅឆ្នាំ២០១៦ ក្រោយទទួលការបណ្តុះបណ្តាលជំនាញភ្ញាស់កូនមាន់ ពីមន្ទីរជំនាញ និងអង្គការដៃនានា។
រូបភាពពីក្រសួងកសិកម្ម រុក្ខាប្រមាញ់ និងនេសាទ
ផ្តើមពីចិញ្ចឹមមាន់តែ៣០ក្បាល និងទទួលបានកូនបានពី ២០០ ទៅ៣០០កូនក្នុង១ខែ លោក លីវ សុខុម បានបង្កើនចំនួនមេមាន់ជាបន្តបន្ទាប់។ បច្ចុប្បន្ន លោកមានមាន់មេដល់ទៅ២០០ក្បាល ដែលអាចផ្ដល់កូនបានប្រមាណ ២,៥០០កូនក្នុងមួយខែ។ លោក លីវ សុខុម បញ្ជាក់ដូច្នេះថា៖«កូនមាន់ដែលមានអាយុ៣ថ្ងៃ មានតម្លៃ៣៥០០៛, អាយុ១០ថ្ងៃ តម្លៃ៤០០០៛»។
របរបន្ថែមនេះ បានផ្តល់ចំណូលពី២ ទៅ៤លានរៀលក្នុងមួយខែ ដល់លោក លីវ សុខុម។ តាមរយៈភាពជោគជ័យនៃរបរភ្ញាស់កូនមាន់នេះ លោក លីវ សុខុម មានទិសដៅពង្រីកការភ្ញាស់ពងមាន់ពី ១ម៉ឺន៥ពាន់ពង ទៅ២ម៉ឺនពងក្នុង១ខែ សម្រាប់ផ្គត់ផ្គង់ទាំងក្នុងខេត្តឧត្តរមានជ័យ និងទៅបណ្តាខេត្តនានាផងដែរ។នេះបើតាមទំព័រហ្វេសប៊ុកក្រសួងកសិកម្ម រុក្ខាប្រមាញ់ និងនេសាទដដែល៕
Tag:
កសិកម្ម
ឧត្តរមានជ័យ
កូនមាន់
© រក្សាសិទ្ធិដោយ thmeythmey.com