ជាតិ
សង្គមជាតិ
ដំណាំត្រប់របស់អ្នកស្រី ឈន ម៉ុន ឆ្នាំនេះបានថ្លៃជាងរាល់ឆ្នាំ
× សៀមរាប៖ អ្នកស្រី ឈន ម៉ុន កសិករនៅភូមិគោកដូង សង្កាត់ក្របីរៀល ក្រុងសៀមរាប។ កសិកររូបនេះកំពុងទទួលផលពីដំណាំត្រប់វែង ដែលអ្នកស្រីដាំលើដីតូចល្មមក្បែរផ្ទះ។ ឆ្នាំនេះ ផលដំណាំត្រប់របស់អ្នកស្រី ម៉ុន លក់បានតម្លៃថ្លៃជាងរាល់ឆ្នាំ ដ្បិតតម្រូវការកសិផលក្នុងស្រុកមានការកើនឡើង ខណៈដែរទីផ្សារនាំចូលបន្លែក្រៅប្រទេសមានចំនួនតិចតួច។
អ្នកស្រី ម៉ុន បានបង្ហាញទឹកមុខរីករាយ នៅពេលដែលត្រប់វែងដែលអ្នកស្រីដាំក្បែរផ្ទះ លក់បានតម្លៃខ្ពស់ទ្វេរ៣ដងបើធៀបនឹងឆ្នាំទៅ។ ត្រប់វែងមួយគីឡូដែលឈ្មួញប្រមូលទិញក្នុងតម្លៃពី១២០០ ទៅ១៥០០រៀល ខណៈដែលឆ្នាំទៅមិញ លក់បានតែ៥០០រៀលប៉ុណ្ណោះ។ អ្នកស្រី ម៉ុន ដែលមានវ័យ៥៥ឆ្នាំ មិនអាចប៉ាន់ប្រមាណទំហំដីដាំត្រប់ ឬចំនួនដើមត្រប់ដែលដាំមានចំនួនប៉ុណ្ណានោះទេ តែរាល់៣ទៅ៥ថ្ងៃម្ដង កសិកររូបនេះបេះលក់ឱ្យឈ្មួញបានពី១៥ ទៅ៤០គីឡូក្រាម ដែលបានទឹកប្រាក់ពី៤ម៉ឺនទៅ៥ម៉ឺនរៀល។
តាមការបញ្ជាក់ពីកសិករនៅក្របីរៀល ដំណាំត្រប់ប្រើពេល៣ខែទើបអាចទទួលផលបាន និងមានអាយុវែងក្នុងការទទួលផល។ នារដូវប្រាំងនេះ ដំណាំត្រប់ត្រូវបានទឹកច្រើនបន្ដិច។ អ្នកស្រី ម៉ុន ប្រើជីអាចម៍គោ សម្រាប់ជំនួយដំណាំប្រភេទនេះ ហើយការដាំដុះមិនសូវពិបាកដូចដំណាំប្រភេទស្ពៃ និងសាឡាត់ទេ។
កសិករ អ្នកស្រី ម៉ុន ប្រាប់ថា ចង់ឱ្យតម្លៃត្រប់ឬបន្លែផ្សេងៗទៀតមានតម្លៃល្អដូចពេលនេះ ដើម្បីឱ្យកសិករក្នុងស្រុកមានកម្លាំងចិត្តដាំដុះបន្ថែមទៀត៕
© រក្សាសិទ្ធិដោយ thmeythmey.com