អត្ថបទ៖ ស៊ីធី
ជំងឺរាតត្បាត COVID-19 បានបង្ខំឲ្យក្លិបហាត់ប្រដាល់នានា និងក្លិបហាត់ប្រាណជុំវិញពិភពលោកត្រូវបិទជាបណ្ដោះអាសន្ន ប៉ុន្តែ ជាសំណាងដោយសារមានប្រភពជាច្រើនបានជួយសម្រួលដល់អត្តពលិកដើម្បីឲ្យពួកគេរក្សាកម្លាំងឲ្យនៅថេរតាមរយៈការហ្វឹកហាត់នៅផ្ទះ។ ក្នុងអត្ថបទនេះ នាយកប្រតិបត្តិ Rich “Ace” Franklin ប្រចាំកម្មវិធី ONE Warrior Series បានផ្ដល់មេរៀនហ្វឹកហាត់នៅផ្ទះងាយៗដែលជួយរក្សាកម្លាំងដល់ពួកគេ។
តាមរយៈបទពិសោធន៍កម្រិតអន្តរជាតិ “Ace” ចូលខ្លួនមកបង្ហាញវិធីងាយៗជាដើម្បីធ្វើលំហាត់នៅផ្ទះឲ្យមានប្រសិទ្ធភាពខ្ពស់ និងអាចរក្សាកម្លាំងឲ្យបានល្អ។ អតីតកីឡាករលំដាប់ពិភពលោកបានរៀបរាប់បែបនេះ ៖«យើងត្រូវធ្វើការឲ្យដូចការរំពឹងទុក។ ដូច្នេះលំហាត់ទាំងនេះអាចរក្សាលំនឹងបានក្នុងនាមជាកីឡាករ។ កម្រិតនៃថាមពលនិងកាយសម្បទាគឺខុសគ្នាសម្រាប់កីឡាករកីឡាការិនីគ្រប់រូប ដូច្នេះសូមហាត់ខុសគ្នា ការធ្វើឡើងវិញខុសគ្នា និង សម្រាកក៏ខុសគ្នាដែរ។ សូមធ្វើវាឲ្យសក្ដិសមនឹងអ្វីដែលអ្នកអាចធ្វើបាន និង បង្កើនវាបន្តិចម្ដងៗឲ្យកាន់តែល្អ»។
នាយកប្រតិបត្តិរូបនេះបញ្ជាក់ថា វាមិនជាបញ្ហានោះទេ ទោះស្ថិតនៅកម្រិតជាកីឡាករថ្មី ឬ អ្នកចាស់វស្សាក៏ដោយ ហើយលំហាត់នេះអាចជួយបានដូចគ្នា។ Franklin សង្កត់ធ្ងន់ថា៖«សម្រាប់អ្នកថ្មីៗសូមធ្វើ៣ជុំនៃលំហាត់នេះ ប៉ុន្តែសម្រាក ២ នាទី (មើលក្រោមគេបង្អស់)។ ហើយបន្ទាប់មកសូមបង្កើនវាបន្តិចម្ដងៗ»។ សូមតាមដានលំហាត់នៅផ្ទះរបស់ Franklin និង ធ្វើទៅតាមកម្រិតកម្លាំងរបស់អ្នកដូចខាងក្រោម។
ទី១ អង្គុយផ្អែកជញ្ជាំង
ឈរឲ្យត្រង់នៅក្បែរជញ្ជាំង ហើយដាក់ខ្លួនចុះយឺតៗដើម្បីអង្គុយដូចក្នុងរូប។ ក្រោយមកត្រូវទប់ខ្លួនឲ្យនឹងរយៈពេល ៣០, ៦០ ឬ ១២០ វិនាទី។ ការប្ដូរជំហរជើងដូចហៀបហក់ទៅមុខរៀបចំជំហរឲ្យដូចរូប ឬ ដូចពេលហៀបហក់ទៅមុខអីចឹង ប៉ុន្តែត្រូវផ្លាស់ប្ដូរជើងទាំងពីរ។ ត្រូវបន្តធ្វើបែបនេះដោយផ្លាស់ប្ដូរជើងម្ខាងៗរហូតដល់ ៨, ១២ ឬ ២០ ដង។
ទី២ អាវ៉ង់
សូមអាវ៉ង់លាតសន្ធឹងដៃអស់ៗឲ្យដូចត្រីកោនឲ្យបាន ១០, ២០ ឬ ៤០ ដង។ យកជើងឡើងលើទល់នឹងជញ្ជាំងស្រដៀងនឹងការអាវ៉ង់ដែរ ប៉ុន្តែយកជើងទាំងពីរឡើងលើទល់នឹងជញ្ជាំងតែដៃច្រត់កម្លាំងចុះក្រោមនិងលៃលកខ្លួនឲ្យត្រង់ដូចរូប។ វាលំបាកបន្តិចសម្រាប់សកម្មភាពនេះ ប៉ុន្តែត្រូវធ្វើឲ្យបាន ៨ , ១៥ ឬ ២០ ដង។
ទី៣ ដូចអាវ៉ង់ដែរ ប៉ុន្តែដើមទ្រូងត្រូវដល់កម្រាល
លំហាត់នេះធ្វើឲ្យរាងកាយពោរពេញដោយថាមពល។ សូមធ្វើសកម្មភាពឲ្យដូចអាវ៉ង់ ប៉ុន្តែដើមទ្រូងត្រូវដល់កម្រាល ឬឥដ្ឋរៀងរាល់ពេល និងបន្តធ្វើរហូតដល់ ១០ ឬ ២០ ឬ ៣០ ដងដដែលៗ។
សំកាំងខ្លួន
នេះជាលំហាត់ដ៏សំខាន់។ សូមសំកាំងខ្លួនច្រត់កែងដៃលើកម្រាលដូចអាវ៉ង់តែសកម្មភាពនៅធ្មឹងរយៈពេល ៦០ វិនាទី, ១២០ ឬ ១៨០ វិនាទី ដោយពឹងផ្អែកលើកម្រិតនៃកម្លាំងរបស់អ្នក។
អ្នកចាប់ផ្ដើមហ្វឹកហាត់ដំបូង៖
• អង្គុយផ្អែកជញ្ជាំងរយៈពេល ៣០ វិនាទី
• ផ្លាស់ប្ដូរសកម្មភាពដូចហៀបហក់ដោយប្ដូរជើងម្ខាង៨ដង
• អាវ៉ង់១០ដង
• យកដៃច្រត់មកក្រោមដោយយកជើងទល់ជញ្ជាំងឡើងលើចំនួន ៨ ដង
• ធ្វើសកម្មភាពដូចអាវ៉ង់តែយកទ្រូងដាល់ក្ដារចំនួន ១០ ដង
• សំកាំងខ្លួនច្រត់កែងដៃលើកម្រាលដូចអាវ៉ង់តែអត់ធ្វើសកម្មភាពរយៈពេល ៦០ វិនាទី
• សម្រាក២នាទីហើយបន្តធ្វើដដែលដូចខាងលើពីរដងទៀត
កុំភ្លេចទស្សនា កម្មវិធីប្រកួតបន្តបន្ទាប់របស់ស្ថាប័ន ONE Championship មានការផ្សាយផ្ទាល់តាមរយៈ Facebook, Twitter, YouTube,និង ONE Super App៕