ជាតិ
សង្គមជាតិ
ក្រសួង នឹងអនុវត្តច្បាប់លើNGO ដែលគ្មានចុះបញ្ជីត្រឹមត្រូវ ដើរធ្វើសកម្មភាពអនាធិបតេយ្យនៅតំបន់ការពារធម្មជាតិ
×![]()
ដោយ: ថ្មីៗ
ភ្នំពេញ៖អង្គការមិនមែនរដ្ឋាភិបាល និងសមាគម ដែលគ្មានចុះបញ្ជីត្រឹមត្រូវ ហើយដើរធ្វើសកម្មភាពអនាធិបតេយ្យ ក្នុងតំបន់ការពារធម្មជាតិ នឹងប្រឈមមុខច្បាប់។ ក្រសួងបរិស្ថាន ព្រមានបែបនេះ នៅក្នុងសេចក្តីថ្លែងការណ៍ ចុះថ្ងៃទី២៤ មេសា។
ក្រសួងបរិស្ថាន អះអាងថា ខ្លួនបានរកឃើញអង្គការ និងសមាគមមួយចំនួន កំពុងសកម្មភាពគឃ្លើន ដោយជ្រកក្រោមស្លាកជាអ្នកស្រឡាញ់បរិស្ថាន និងធនធានធម្មជាតិ ក្នុងចេតនាទុច្ចរិតក្នុងការធ្វើវិទ្ធង្សនាប្រឆាំងនឹងរាជរដ្ឋាភិបាលលើការងារគ្រប់គ្រង និងអភិរក្សធនធានធម្មជាតិតែប៉ុណ្ណោះ។
« ចំពោះអង្គការមិនមែនរដ្ឋាភិបាល ឬសមាគមណា ដែលនៅតែបន្តបំពានធ្វើសកម្មភាពយ៉ាងអនាធិបតេយ្យ និងខុសច្បាប់ក្នុងតំបន់ការពារធម្មជាតិ ក្រសួងបរិស្ថានគ្មានជម្រើសអ្វីក្រៅពីការអនុវត្តវិធានការច្បាប់។ ជាពិសេសច្បាប់ស្តីពីតំបន់ការពារធម្មជាតិ ដើម្បីទប់ស្កាត់ និងបញ្ឈប់សកម្មភាពបែបនេះទេ»។ នេះជាការបញ្ជាក់របស់ក្រសួងបរិស្ថាន។
ក្រសួងបរិស្ថាន អំពាវនាវឱ្យអង្គការមិនមែនរដ្ឋាភិបាល ឬសមាគមនានា ដែលកំពុងធ្វើសកម្មភាពដោយខុសច្បាប់នៅក្នុងតំបន់ការពារធម្មជាតិ បញ្ឈប់សកម្មភាពបែបនេះជាបន្ទាន់ ដើម្បីចៀសវាងការប្រឈមមុខដាក់គ្នាតាមផ្លូវច្បាប់។
ក្នុងសេចក្តីថ្លែងការណ៍របស់ក្រសួងបរិស្ថាន បានសង្កត់ធ្ងន់ដូច្នេះ៖«គ្មានផលប្រយោជន៍អ្វីទៅប្រឆាំងនឹងអ្នកស្រឡាញ់ និងចូលរួមការពារធនធានធម្មជាតិឡើយ ប៉ុន្តែតម្រូវឱ្យទាំងអស់គ្នាគោរពច្បាប់ជាធរមាន និងធ្វើសកម្មភាពស្របតាមច្បាប់កំណត់ និងដោយក្តីស្មោះត្រង់ក្នុងភាពជាដៃគូ ដើម្បីរួមកម្លាំងគ្នាថែរក្សាធនធានធម្មជាតិកម្ពុជាឱ្យបានគង់វង្ស សម្រាប់មនុស្សរាប់ជំនាន់តទៅមុខទៀត»។
ក្រសួងបរិស្ថាន ក៏លើកទឹកចិត្តអង្គការមិនមែនរដ្ឋាភិបាល ឬសមាគម ដែលបានចុះបញ្ជី និងកិច្ចព្រមព្រៀងត្រឹមត្រូវស្របតាមនីតិវិធីច្បាប់ ឱ្យចូលរួមក្នុងការងារ ការពារ និងអភិរក្សធនធានធម្មជាតិ ជីវៈចម្រុះ ប្រព័ន្ធអេកូឡូស៊ី និងការងារលើកស្ទួយជីវភាពរស់នៅ របស់ប្រជាសហគមន៍ដែលរស់នៅក្នុង និងក្បែរតំបន់ការពារធម្មជាតិ ដើម្បីបុព្វហេតុសម្បត្តិធម្មជាតិ របស់យើងទាំងអស់គ្នា។
បច្ចុប្បន្ននេះ ក្រសួងបរិស្ថានបាននិងកំពុងគ្រប់គ្រងប្រព័ន្ធតំបន់ការពារធម្មជាតិ ដែលរួមមាន៖ តំបន់ការពារធម្មជាតិ និងរបៀងអភិរក្សជីវៈចម្រុះ សរុបចំនួន ៦០ កន្លែង គ្របដណ្តប់លើផ្ទៃដី ប្រមាណជាង ៧,២ លានហិកាតា ស្មើប្រមាណ ៤១% នៃផ្ទៃដីសរុបរបស់ព្រះរាជាណាចក្រកម្ពុជា។ ក្នុងនោះមន្ត្រីឧទ្យានុរក្សនៃក្រសួងបរិស្ថានចំនួន ១២៦០នាក់ ឈរជើងនៅតាមតំបន់ការពារធម្មជាតិនីមួយៗ កំពុងធ្វើសកម្មភាពល្បាត ការពារ និងអភិរក្សធនធានធម្មជាតិ ដោយមានការចូលរួម និងកិច្ចសហការល្អពីសំណាក់អាជ្ញាធរមូលដ្ឋាន អង្គការមិនមែនរដ្ឋាភិបាល សមាគម និងសហគមន៍ មូលដ្ឋានពាក់ព័ន្ធទាំងយប់ទាំងថ្ងៃ៕
Tag:
បរិស្ថាន
ធនធានធម្មជាតិ
© រក្សាសិទ្ធិដោយ thmeythmey.com
