COVID-19
អន្តរជាតិ
នយោបាយអន្តរជាតិ
នាយករដ្ឋមន្ត្រីឡាវបញ្ជាអាជ្ញាធរឲ្យបន្តរឹតបន្តឹងសកម្មភាពប្រជាជន ព្រោះខ្លាចរលកនៃការឆ្លង Covid-19 ទីពីរ
× លោកនាយករដ្ឋមន្ត្រីឡាវ ថុងលួន ស៊ីសូលីត បានក្រើនរម្លឹកឲ្យអាជ្ញាធរឡាវទាំងអស់បន្តរឹតបន្តឹងចលនាប្រជាជន ដើម្បីធានាឲ្យបានការមិនឆ្លងបន្តនៃវីរុសរាតត្បាត Covid-19។ លោកនាយករដ្ឋមន្ត្រី មានការព្រួយបារម្ភ ពីរលកទី២ នៃវីរុស Covid-19 ដែលបានផ្ទុះឡើងនៅក្នុងបណ្តាប្រទេសអាស៊ាន ថាអាចកើតឡើងនៅឡាវដូចគ្នាផងដែរ ប្រសិនបើប្រជាជនភ្លេចខ្លួនមិនការពារ។
គិតត្រឹមថ្ងៃ២៥ មេសា ប្រទេសអាស៊ាន ឡាវ មិនបានរកឃើញករណីឆ្លងថ្មីនៃវីរុសរាតត្បាត Covid-19 នោះទេ។ នេះ ក៏ជាថ្ងៃទី១២ ផងដែរ ដែលប្រទេសគ្មានព្រំដែនជាប់សមុទ្រនៅអាស៊ីអាគ្នេយ៍មួយនេះ មិនមានអ្នកឆ្លងថ្មីនៅក្នុងប្រទេស។ នេះបើយោងតាមការចុះផ្សាយរបស់សារព័ត៌មាន Laotian Times។
យ៉ាងណាក៏ដោយ តាមរយៈកិច្ចប្រជុំគណៈរដ្ឋមន្ត្រីប្រចាំខែមេសា លោកនាយករដ្ឋមន្ត្រី ថុងលួន ស៊ីសូលីត បានទទូចឲ្យអាជ្ញាធរបន្តរឹងបន្តឹងលើការអនុវត្តវិធានការទប់ស្កាត់ និងគ្រប់គ្រងការរីករាលរបស់វីរុស Covid-19។ លោក សង្កត់ធ្ងន់ថា ការអវត្តមាននៃករណីថ្មី គឺជាសញ្ញាល្អមួយ ក៏ប៉ុន្តែប្រទេសមួយចំនួន បានប្រឈមនឹងការឆ្លងថ្មីនៃរលកទីពីររបស់វីរុស ដែលចំណុចនេះ តម្រូវឲ្យប្រជាជនមិនត្រូវភ្លេចខ្លួនឡើយ។
ជាមួយនឹងការក្រើនរម្លឹកនេះ ប្រមុខរដ្ឋាភិបាលឡាវ បានស្នើវិធានការថ្មីដោយឲ្យគណកម្មការទប់ស្កាត់ និងគ្រប់គ្រងវីរុស Covid-19 របស់ប្រទេស វាយតម្លៃ និងកំណត់តំបន់ ដែលមានហានិភ័យនៃការឆ្លងវីរុស ទាប មធ្យម និងខ្ពស់ ដើម្បីជាផ្នែកមួយក្នុងការជូនដំណឹងដល់ប្រជាជន និងងាយស្រួលសម្រាប់អាជ្ញាធរគ្រប់គ្រងផងដែរ។
ដោយសារតែអវត្តមាននៃការឆ្លងករណីថ្មី លោកនាយករដ្ឋមន្ត្រី បានឯកភាពលើការពិចារណាបន្ធូរបន្ថយការរឹតត្បិតលើការឲ្យបើកដំណើរការឡើងវិញនៃអាជីវកម្មមួយចំនួន ដែលមានឥទ្ធិពលលើសេដ្ឋកិច្ចជាតិ និងមិនសូវមានហានិភ័យខ្ពស់នៃការឆ្លង។ ការសម្រេចពិចារណានេះ ធ្វើឡើងបន្ទាប់ពីរដ្ឋាភិបាល បរាជ័យក្នុងការអនុម័តបទបញ្ជាថ្មីក្នុងការបន្ធូរបន្ថយពន្ធលើតម្លៃទឹក និងអគ្គិសនី ដោយសារតែរដ្ឋមានឱនភាពនៃចំណូល ៕
© រក្សាសិទ្ធិដោយ thmeythmey.com