ជាតិ
សង្គមជាតិ
លោកយាយ ចែម ខែត បន្តកិនម្សៅធ្វើណែមលក់តាមក្បួនបុរាណ ដើម្បីរក្សារសជាតិឆ្ងាញ់
× សៀមរាប៖ លោកយាយ ចែម ខែត រស់នៅភូមិព្រះដាក ស្រុកបន្ទាយស្រី ខេត្តសៀមរាប។ បច្ចុប្បន្នលោកយាយមានរបរលក់នំនៅផ្ទះបន្ដិចបន្ដួច ដើម្បីចិញ្ចឹមចៅកំព្រា២នាក់។ លោកយាយ ខែត ធ្វើនំណែម ដែលអ្នកតំបន់ខ្លះនិយមហៅគួង។ អ្នកភូមិព្រះដាករូបនេះ នៅបន្តកិនម្សៅនិងធ្វើនំតាមក្បួនបុរាណ ព្រោះយល់ថា ការធ្វើរបៀបនេះមានរសជាតិឆ្ងាញ់ជាង ហើយអ្នកទិញក៏ចូលចិត្តហូបជាងដែរ។
នៅក្រោមរោងមុខផ្ទះ ម៉ោងប្រមាណ១០ព្រឹក លោកយាយ ខែត និងកូនស្រី កំពុងញាប់ដៃធ្វើនំណែម។ ណែមដែលទើបចាក់ក្ដៅៗ បង្ហើរក្លិនចូលច្រមុះ និងត្រូវបានយកដាក់ហាលឱ្យស្ងួត និងត្រជាក់បន្ដិច មុននឹងយកទៅមូលលាយគ្រឿងនិងបន្លែ ដើម្បីបន្ថែមរសជាតិពេលជ្រលក់ទឹកត្រី។ លោកយាយ ខែត ដែលកំពុងមូលណែមលើគ្រែមុខផ្ទះបាននិយាយថា លោកយាយធ្វើនំនេះលក់ច្រើនឆ្នាំមកហើយ ដែលធ្វើឆ្លាស់គ្នាពេលខ្លះធ្វើបាញ់ឆាវ គុយទាវកាត់ និងណែម។
សូមទស្សនាវីដេអូខាងក្រោម៖
ក្នុងមួយថ្ងៃលោកយាយ ខែត ធ្វើណែមលក់អស់២គីឡូអង្ករ ដែលគិតជាប្រាក់បានប្រមាណ៣ម៉ឺនរៀល។ ណែមមួយលក់បាន ៥០០រៀល ដែលចាប់លក់ពីម៉ោង១០ព្រឹក រហូតដល់ថ្ងៃរសៀលបន្ដិច។
ចំពោះការរក្សាធ្វើណែមតាមក្បួនបុរាណ ខណៈដែលទីផ្សារមានលក់សំបកណែមស្រាប់ៗទៅហើយនោះ លោកយាយ ខែត ពន្យល់ថា ណែមធ្វើពីម្សៅអង្ករដែលកិនភ្លាមៗមានរសជាតិឆ្ងាញ់ ទន់ និងមិនប្រៃពេក។ លោកយាយដែលមានជំងឺស្វិតជើងដើរមិនរួច និយាយទៀតថា អតិថិជនដែលនិយមហូបគឺចូលចិត្តនំលោកយាយជាង ណាមួយវាមានសំបកក្រាស់៕
© រក្សាសិទ្ធិដោយ thmeythmey.com