ជាតិ
សង្គមជាតិ
ក្រសួងកសិកម្ម កំណត់ស្លាកសញ្ញាជាតិ សម្គាល់លើផលិតផលស្បៀង ដើម្បីបង្កើនការនាំចេញ
×![]()
ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទនឹងកំណត់ដាក់ស្លាកសញ្ញាជាតិ សម្រាប់សម្គាល់លើផលិតផលស្បៀង និងផលិតផលសរីរាង្គ ដើម្បីជំរុញឲ្យផលិតផលមានទីផ្សារក្នុងស្រុក និងការនាំចេញទៅក្រៅប្រទេស។ ជាពិសេសផ្តល់ទំនុកចិត្តដល់អ្នកទិញជឿជាក់ពីផលិតផលនោះមានប្រភពចេញពីការត្រួតពិនិត្យវិធានការកសិកម្មសរីរាង្គពីក្រសួងកសិកម្ម។
ក្រសួងកសិកម្មបានផ្តល់សិទ្ធិឲ្យអគ្គនាយកដ្ឋានកសិកម្មរៀបចំ និងអនុវត្តយន្តការគ្រប់គ្រងសម្រាប់អនុវត្តវិធានកសិកម្មសរីរាង្គ នៅក្នុងដំណើរការកែច្នៃដំណាំស្បៀង ការលាងសំអាត វេចខ្ចប់ផលិតផលស្រស់។ តួនាទីចម្បងរបស់អគ្គនាយកដ្ឋានកសិកម្ម គឺការរៀបចំឲ្យម្ចាស់ផលិតផលអនុវត្តតាមវិធានកសិកម្មសរីរាង្គនៅក្នុងផលិតកម្ម និងការកែច្នៃ ដោយម្ចាស់ផលិតផលអាចមានសិទ្ធិកំណត់ស្លាកសញ្ញាសម្គាល់លើផលិតផលរបស់ខ្លួនដែលប្រកបដោយគុណភាព។
បើតាមក្រសួងកសិកម្ម ម្ចាស់ផលិតផលដែលមានបំណងចង់ប្រើប្រាស់ស្លាកសញ្ញាសម្រាប់សម្គាល់លើផលិតផលរបស់ខ្លួន គឺត្រូវដាក់ពាក្យស្នើសុំការទទួលស្គាល់ពីអគ្គនាយកដ្ឋានកសិកម្ម ឬនាយកដ្ឋានកសិ-ឧស្សាហកម្ម។
ក្រសួងកសិកម្ម បានបង្គាប់ឲ្យអគ្គនាយកដ្ឋានកសិកម្ម និងនាយកដ្ឋានកសិ-ឧស្សាហកម្ម រួមគ្នាត្រូវចុះពិនិត្យ និងវាយតម្លៃលើការអនុវត្តវិធានកសិកម្មសរីរាង្គ ក្នុងការផលិត និងការកែច្នៃដំណាំស្បៀង។ ក្រោយការវាយតម្លៃលើផលិតកម្ម និងការកែច្នៃដំណាំស្បៀងរួចហើយ ក្រសួងនឹងផ្តល់វិញ្ញាបនបត្របញ្ជាក់ពីការទទួលស្គាល់ការអនុវត្តវិធានកសិកម្មសរីរាង្គ និងអាចមានសិទ្ធិប្រើប្រាស់ស្លាកសញ្ញាលើផលិតផលរបស់ខ្លួន។
វិញ្ញាបនបត្របញ្ជាក់ពីការទទួលស្គាល់ការអនុវត្តវិធានកសិកម្មសរីរាង្គ គឺជាការឲ្យដឹងពីកាលបរិច្ឆេទនៃសពុលផលិតផល និងទំហំនៃការផលិត។
ក្រសួងកសិកម្មបានបញ្ជាក់ថា មុននឹងម្ចាស់ផលិតផលទទួលបានវិញ្ញាបនបត្របញ្ជាក់ពីការទទួលស្គាល់ការអនុវត្តវិធានកសិកម្មសរីរាង្គនេះ គឺត្រូវចូលរួមវគ្គបណ្តុះបណ្តាលស្តីពីវិធានការកសិកម្មសរីរាង្គ អនុវត្តតាមគោលការណ៍បច្ចេកទេសកសិកម្មសរីរាង្គ។
ក្នុងករណីដែលម្ចាស់ផលិតផលក្លែងបន្លំស្លាកសញ្ញាលើផលិតផល នឹងត្រូវប្រឈមនឹងចាត់វិធានការតាមច្បាប់។ នេះបើតាមការបញ្ជាក់ពីក្រសួងកសិកម្ម៕
© រក្សាសិទ្ធិដោយ thmeythmey.com
