ភ្នំពេញ៖ ការសិក្សាតាមអនឡាញ ក្នុងអំឡុងជួបវិបត្តិជំងឺកូវីដ-១៩ គឺអាចផ្តល់សុវត្ថិភាពដល់សិស្សានុសិស្ស ប៉ុន្តែពួកគេថា មិនបានចំណេះដឹង ដូចការរៀនផ្ទាល់ជាមួយគ្រូៗនៅសាលាឡើយ។ នេះជាការយល់ឃើញរបស់សិស្សានុសិស្សខ្លះ ដែលប្រាប់សារព័ត៌មានថ្មីៗ។
រយៈពេល១ខែកន្លះហើយ ដែលក្រសួងអប់រំ យុវជន និងកីឡា បានពន្យារពេលការចូលរៀនរបស់សិស្សានុសិស្ស នៅគ្រប់កម្រិតទាំងថ្នាក់មត្តេយ្យ រហូតដល់ថ្នាក់មហាវិទ្យាល័យទូទាំងប្រទេស ដើម្បីជៀសវាងជំងឺកូវីដ-១៩ ឆ្លងជាសហគមន៍។ ក្រសួង តម្រូវឲ្យសិស្សានុសិស្សទាំងអស់ ស្សិក្សាខ្លួនឯង និងរៀបចំប្រព័ន្ធសិក្សាតាមអនឡាញ ទូរសព្ទ វិទ្យុ និងទូរទស្សន៍ជំនួសឲ្យការរៀនផ្ទាល់វិញ។ ក្រសួងក៏ពិចារណាថានឹងបន្ថែមម៉ោងសិក្សា និងកាត់បន្ថយវិស្សមកាលធំ ក្រោយបើកដំណើរការសាលាវិញ។
យុវសិស្ស អាន វិច្ឆិកា ដែលជាសិស្សថ្នាក់ទី៩ នៅវិទ្យាល័យពាមជីកង ខេត្តកំពង់ចាម ចាប់ផ្តើមរៀនដោយខ្លួនឯងនៅផ្ទះ តាំងពីក្រសួងប្រកាសយបិទសាលាបាន១សប្តាហ៍ម្ល៉េះ។ បើតាម វិច្ឆិកា ក្នុងមួយថ្ងៃនាងចំណាយពេល៥ម៉ោង ដើម្បីចម្លងមេរៀន និងធ្វើលំហាត់ ដែលគ្រូមុខវិជ្ជានីមួយៗដាក់ឲ្យ តាមរយៈប្រព័ន្ធអេឡិចត្រូនិក។ រាល់ពេលព្រឹក នាងក៏ឆ្លៀតសិក្សាតាមកម្មវិធីផ្សាយផ្ទាល់ របស់ E-School learningខ្លះដែរ។ វិច្ឆិកា អះអាងប្រាប់សារព័ត៌មានថ្មីៗថា ការរៀនដោយខ្លួនឯង និងរៀនតាមអនឡាញ ពិតជាជួយនាងឲ្យរួចផុត ពីការឆ្លងជំងឺកូវីដ-១៩មែន តែកម្រិតចំណេះដឹងដែលនាងទទួល មិនបានពេញលេញឡើយ។ ពេលខ្លះ នាងមិនទទួលបានការពន្យល់មេរៀនដែលនាងឆ្ងល់ ពីគ្រូបានភ្លាមៗទេ គឺត្រូវហៅទូរសព្ទទៅគ្រូ ដើម្បីបានការពន្យល់បន្ថែម ។
យុវសិស្ស អាន វិច្ឆិកា បានរៀបរាប់ដូច្នេះថា៖«រៀនតាមអនឡាញរៀងពិបាកបន្តិច ព្រោះអីនៅពេលដែលយើងមានចម្ងល់អីមួយ ដោយចង់ដឹងភ្លាមៗ គឺយើងពិបាកនឹងសួរគាត់។ វាអត់ដូចយើងរៀននៅសាលាមានគ្រូ គាត់ពន្យល់យើង នៅចំណុចណាយើងមិនយល់ គឺយើងអាចសួរគាត់ និងអាចឆាប់យល់ជាង»។
ក្រៅពីទំនេរពីស្វ័យសិក្សា វិច្ឆិកា ក៏ឆ្លៀតតាមដានវីដេអូខ្លះៗ នៅក្នុង YouTube អានសៀវភៅរឿង និងសៀវភៅ ដែលទាក់ទងនឹងមេរៀនផ្សេងៗ ដើម្បីលំហែខួរក្បាល និងបង្កើនចំណេះដឹង នៅពេលដែលនាងដាក់កំហិតខ្លួនឯង មិនចេញទៅក្រៅដែលនាំឲ្យឆ្លងជំងឺកូវីដ-១៩។
ចំពោះយុវសិស្ស ម៉ិច សុជាតិ ដែលជាសិស្សថា្នក់ទី១២ នៅវិទ្យាល័យភ្ញីមាស ខេត្តតាកែវ ក៏មិនព្រួយបារម្ភពីការឆ្លងកូវីដ-១៩ដែរ ខណៈរូបគេ កំពុងសិក្សាដោះស្រាយលំហាត់គ្រប់មុខវិជ្ជាតាមសៀវភៅពុម្ព និងវិញ្ញាសាត្រៀមប្រឡងសញ្ញាបត្រមធ្យមសិក្សាទុតិយភូមិ នៅក្នុងផ្ទះរាល់ថ្ងៃនោះ។ យុវសិស្ស សុជាតិ ពេញចិត្តនឹងការរៀនតាមអនឡាញ ដែលនាំឲ្យគេទទួលបានចំណេះដឹងថ្មីៗ និងគន្លឹះដោះស្រាយលំហាត់ប្លែកៗ។ តែរូបគេជួបបញ្ហាអ៊ីនធឺណិត ដែលធ្វើឲ្យរូបគេតាមដានការផ្សាយមិនបានទៀងទាត់ឡើយ។
យុវជន ដែលត្រៀមប្រឡងបាក់ឌុបឆ្នាំនេះ បានរៀបរាប់ដូច្នេះ៖«ខ្ញុំនៅជនបទ គឺសេវាអ៊ីនធឺណិតវាយឺតផង ហើយទូរសព្ទរបស់ខ្ញុំសេរីទាបផង ដល់ពេលអ៊ីចឹងអ៊ីនធឺណិតវាខ្សោយ មើលៗទាក់ វាពិបាកនឹងតាមដាន ហើយពេលយើងឆាតសួរគ្រូទៅ គាត់ឆ្លើយតបយើងយឺតដែរ»។
ដោយសារបញ្ហាអ៊ីនធឺណិតនេះ ទើបពេលខ្លះ សុជាតិ ក៏សម្រេចចិត្តទៅហាងកាហ្វេ ឬកន្លែងណាមួយដែលមានសេវា ដើម្បីអាចតាមដានការផ្សាយមេរៀនរបស់ក្រសួងអប់រំបាន។
មិនខុសពីសុជាតិឡើយ! យុវសិស្សម្នាក់ទៀតដែលរៀនថ្នាក់ទី១២ នៅវិទ្យាល័យភ្ញីមាស ខេត្តតាកែវ ក៏ពិបាកទទួលចំណេះដឹង តាមអនឡាញដែរ ព្រោះសេវាអ៊ីនធឺណិតមិនអំណោយផល។ ទោះជួបបញ្ហាបែបនេះក្តី ក៏យុវសិស្ស សូ សេងឆាយ នៅតែអាចសិក្សាដោយខ្លួនឯង និងងាកទៅសិក្សាតាមទូរទស្សន៍ ដែលជាកម្មវិធីរបស់ក្រសួងអប់រំដែរ។
តែយ៉ាងណា យុវសិស្ស សូ សេងឆាយ នៅតែយល់ឃើញថា ការរៀនតាមរយៈមានគ្រូពន្យល់ផ្ទាល់ គឺអាចឲ្យរូបគេ ឆាប់យល់មេរៀនជាងការរៀនតាមអនឡាញ។ យុវជនថ្នាក់ទី១២ រូបនេះ បានរៀបរាប់ដូច្នេះថា៖«យើងរៀនតាមអនឡាញវាលំបាក យើងក៏បបួលគ្នា ៤ទៅ៥នាក់ ហើយយើងនាំគ្នាសួរគ្រូអ៊ីចឹង ទៅគាត់ក៏ឲ្យមករៀនជុំគ្នា៤ទៅ៥នាក់។ ហើយយើងសួរទៅលោកគ្រូអ្នកគ្រូ ដែលនៅក្បែរផ្ទះយើង។ អ្នកផ្សេងទៀតគេអត់មក គេរៀនតាមអនឡាញ»។
មិនត្រឹមតែប្រឹងសិក្សាដោយខ្លួនឯងទេ យុវសិស្ស សេងឆាយ ក៏ឆ្លៀតបង្រៀន និងពន្យល់មេរៀនទៅមិត្តភក្តិដទៃទៀតដែរ តាមរយៈក្រុមទំនាក់ទំនងរវាងមិត្តរួមថ្នាក់ និងតាមការណាត់ជួបត្រឹមមនុស្ស៥នាក់។
តែយ៉ាងណាសិស្សខាងលើនេះ ក៏ទទួលស្គាល់ពីស្ថានភាពបច្ចុប្បន្ន ដែលតម្រូវឱ្យក្រសួងអប់រំ រៀបចំកម្មវិធីបង្រៀនតាមអនឡាញ និងទូរទស្សន៍ តាមកម្មវិធីE-School learning នេះដែរ៕