COVID-19
កីឡាអន្តរជាតិ
អន្តរជាតិ
COVID-19៖ លីគកំពូលហូឡង់ត្រូវលុបចោល ដោយគ្មានជើងឯក និងកាត់ចោលក្រុម
× ប្រធានសហព័ន្ធកីឡាបាល់ទាត់ហូឡង់ (KNVB) បានប្រកាសលុបចោលការប្រកួតក្របខណ្ឌ Eredivisie រដូវកាល ២០១៩-២០ នេះដោយគ្មានការផ្តល់ជើងឯងទៅឲ្យក្រុមណាឡើយ។ សម្រាប់ក្រុមកំពូលតារាង នៅតែទទួលបានកៅអីសម្រាប់ការប្រកួតជម្រុះពាន Champions League រដូវកាលក្រោយ។
លីគកីឡាបាល់ទាត់កំពូលហូឡង់ចំនួនពីរកម្រិត ត្រូវបានឆាចោលតែម្តងដោយសារវិបត្តិជំងឺ COVID-19។ ក្នុងការលុបចោលនេះ KNVB បានសម្រេចមិនឲ្យមានការកាត់ចោលក្រុម និងក្រុមត្រូវឡើងទៅលីគកំពូល ហើយក៏គ្មានក្រុមជើងឯកដែរ។
ក្រោយលុបចោលការប្រកួតក្របខណ្ឌក្នុងស្រុកនេះ លោក Just Spee ប្រធាន KNVB ថែមទាំងអះអាងទៀតថា ឱកាសនៃការបន្តលេងក្នុងក្របខណ្ឌផ្សេងទៀតនៅតំបន់អឺរ៉ុបដោយបិទទ្វារកីឡដ្ឋាននោះគឺមានភាគរយតិចតួចបំផុត។
ក្រុម Ajax បាននាំមុខគេក្នុងតារាង Eredivisie រដូវកាលនេះ ដោយមានពិន្ទុស្មើគ្នាជាមួយក្រុម AZ Alkmaar ចំនួន ៥៦ពិន្ទុ (តែមានគ្រាប់បាល់ស៊ីសងល្អជាង) បន្ទាប់ពីឆ្លងកាត់ការប្រកួត២៥លើករួចមក។ ខណៈនៅសល់ ៩ប្រកួតទៀតនឹងបញ្ចប់នោះលីគនេះត្រូវសម្រេចឆាចោលតែម្តងដោយសារតែ COVID-19 ។
បើទោះជាគ្មានការផ្តល់ពាន ឬកាត់ចោលក្រុម ប៉ុន្តែទាំង Ajax និង AZ Alkmaar នឹងទទួលបានកៅអីប្រកួតវគ្គជម្រុះក្របខណ្ឌអឺរ៉ុប Champions League រដូវកាលក្រោយ ខណៈ Feyenoord ដែលជាក្រុមឈរលេខ៣ បានលេងវគ្គជម្រុះ Europa League ។
ហូឡង់ក៏ជាប្រទេសមួយនៅតំបន់អឺរ៉ុបដែលមានចំនួនអ្នកឆ្លង COVID-19 ច្រើនផងដែររហូតដល់ជិត៤ម៉ឺននាក់ ក្នុងនោះស្លាប់ជិត៤៥០០នាក់។ ដោយសារតែឥទ្ធិពលជំងឺរលាកសួតបង្កដោយកូរ៉ូណាវីរុសប្រភេទថ្មីនេះ ទើបព្រឹត្តិការណ៍កីឡាធំៗនៅហូឡង់ ត្រូវហាមមិនឲ្យមានសកម្មភាពរហូតដល់ខែកញ្ញា៕
Tag:
KNVB
Eredivisie
COVID-19
© រក្សាសិទ្ធិដោយ thmeythmey.com