រថយន្ត
អន្តរជាតិ
រួមចំណែកទប់ស្កាត់ COVID-19 ឥណ្ឌាគ្មានការលក់យានយន្តចេញឡើយក្នុងខែមេសា
× ឧស្សាហកម្មយានយន្តឥណ្ឌា នឹងមានកំណត់ត្រាលើកដំបូងជាប្រវត្តិសាស្ត្រ ដោយគ្មានការលក់ចេញយានយន្តមួយគ្រឿងណាឡើយនៅក្នុងខែមេសា។ យោងតាមការផ្សាយរបស់ ET Auto នេះជាការរួមចំណែករបស់បណ្តាក្រុមហ៊ុនយានយន្តនៅឥណ្ឌា ដើម្បីទប់ស្កាត់ការរាលដាល COVID-19 ខណៈប្រទេសទាំងមូលត្រូវបានបិទ។
គ្រប់មុខជំនួញ និងប្រតិបត្តិការទាំងអស់នៅឥណ្ឌា ត្រូវបានផ្អាកដំណើរចាប់តាំងពីសប្តាហ៍ទី៣នៃខែមីនា ឆ្នាំ២០២០ ពោលគឺបន្ទាប់ពីលោកនាយករដ្ឋមន្ត្រី Narendra Modi បានប្រកាសបិទប្រទេស ដោយរឹតត្បិតការធ្វើដំណើររហូតដល់ថ្ងៃទី១៤ ខែមេសា ហើយក្រោយមកត្រូវបានពន្យាដល់ថ្ងៃទី៣ ខែឧសភា។
គិតត្រឹមរសៀលថ្ងៃទី២៧ ខែមេសា ឥណ្ឌា មានករណីឆ្លងជិត២៨០០០ ក្នុងនោះស្លាប់ជាង៨៨០នាក់ និងសះស្បើយជាង៦៥០០នាក់។ ក្រោយការប្រកាសបិទប្រទេស បណ្តាក្រុមហ៊ុនយានយន្តជាច្រើនក្នុងនោះមាន TVS Motor, Maruti Suzuki, Mahindra ជាដើម បានសម្រេចព្យួរសង្វាក់ផលិតកម្ម និងការលក់រហូតដល់ស្ថានភាពស្ងប់ស្ងាត់។
ក្នុងបទសម្ភាសជាមួយ ET Auto លោក R.C. Bhargava ប្រធានក្រុមហ៊ុន Maruti Suzuki បានអះអាងថា ក្រុមហ៊ុនរបស់លោកតែងតែទទួលបាននូវការបញ្ជាទិញរថយន្តថ្មីពីសំណាក់អតិថិជន ប៉ុន្តែលោកមិនទាន់កំណត់ថា អាចលក់ចេញបាននៅខែឧសភា ឬយ៉ាងណានោះឡើយ ពោលគឺអាស្រ័យលើស្ថានភាព COVID-19។
ថ្នាក់ដឹកនាំក្រុមហ៊ុនផ្សេងៗទៀតនៅឥណ្ឌា សុទ្ធតែបានលើកឡើងស្រដៀងៗគ្នា ប៉ុន្តែទោះបីជាយ៉ាងណាក៏ដោយ ពួកគេបន្តអនុវត្តតាមការណែនាំរបស់រដ្ឋាភិបាលដើម្បីទប់ស្កាត់ការរាលដាល COVID-19។ ជាមួយគ្នានេះ គេក៏មិនរំពឹងថា ស្ថានភាពអាចល្អប្រសើរចាប់ពីខែឧសភា ខាងមុខនោះឡើយ៕
© រក្សាសិទ្ធិដោយ thmeythmey.com