COVID-19
អន្តរជាតិ
COVID-19៖ ឥណ្ឌូណេស៊ី សង្ឃឹមត្រឡប់ទៅរកជីវិតប្រក្រតីវិញនៅខែកក្កដា រូបភាព AFP
× រដ្ឋាភិបាលភិបាលឥណ្ឌូណេស៊ី សង្ឃឹមថា ការរស់នៅរបស់ប្រជាជនដែលកំពុងរួមរឹតដោយជំងឺ COVID-19 នឹងវិលទៅរកប្រក្រតីឡើងវិញនៅខែកក្កដា។ លោក Doni Monardo មន្ត្រីជាន់ខ្ពស់ទទួលបន្ទុកកិច្ចការប្រឆាំង COVID-19 និយាយដូចនេះ ជាមួយនឹងការប្រកាសថា រដ្ឋាភិបាល ដាក់គោលដៅទម្លាក់ចំនួនឆ្លងឲ្យនៅទាប នៅត្រឹមខែមិថុនាខាងមុខតាមរយៈការបង្កើនការធ្វើតេស្តរកវីរុសក្នុងចំណោមប្រជាជន។
ឥណ្ឌូណេស៊ី គឺជាប្រទេសមួយដែលរងគ្រោះខ្លាំង ដោយសារការរាតត្បាតជំងឺ COVID-19 នៅអាស៊ីអាគ្នេយ៍។ តួលេខករណីឆ្លងជំងឺនេះផ្លូវការរបស់ឥណ្ឌូណេស៊ី គឺ៩០៩៦ករណី គិតត្រឹមថ្ងៃទី២៧ ខែមេសា ដែលជាចំនួនខ្ពស់មួយបន្ទាប់ពីសិង្ហបុរី។ ចំនួនអ្នកស្លាប់ ត្រូវបានរាយការណ៍ថា មាន៧៦៥នាក់ ជាចំនួនខ្ពស់នៅតំបន់អាស៊ីអាគ្នេយ៍។
ទោះជាយ៉ាងណា ទីក្រុងហ្សាការតា បានដាក់គោលដៅវិលទៅរកស្ថានភាពដើម នៅរយៈពេលបីខែទៀត។ ប្រាប់អ្នកសារព័ត៌មាន ក្រោយកិច្ចប្រជុំគណៈរដ្ឋមន្ត្រី នៅថ្ងៃទី២៧ ខែមេសា លោក Doni Monardo ប្រធានក្រុមការងារប្រយុទ្ធប្រឆាំង COVID-19 ប្រាប់អ្នកសារព័ត៌មានថា លោកប្រធានាធិបតី ចូកូ វីដូដូ បានប្រាប់ឲ្យមន្ត្រីប្រឹងធ្វើការ ដើម្បីឲ្យប្រជាជនស្ដាប់ការណែនាំ និងមានវិន័យ សំដៅនៅត្រឹមខែមិថុនា ករណីឆ្លងនឹងធ្លាក់ចុះ។
«ក្នុងខែកក្កដា យើងសង្ឃឹមថា អាចចាប់ផ្ដើមជីវិតប្រក្រតីវិញ។» នេះជាការបញ្ជាក់របស់លោក Monardo ដែលផ្សាយដោយទីភ្នាក់ងារព័ត៌មាន Reuters ដោយបន្ថែមថា នៅខែឧសភា និងមិថុនា ការធ្វើតេស្តរកវីរុស នឹងមានលក្ខណៈទ្រង់ទ្រាយធំ។
គិតត្រឹមដើមសប្ដាហ៍នេះ ឥណ្ឌូណេស៊ី ធ្វើតេស្តលើមនុស្សជិត៦ម៉ឺននាក់។ តួលេខនេះ នៅទាបនៅឡើយ ប្រៀបធៀបនឹងប្រជាជនសរុបរបស់ឥណ្ឌូណេស៊ី ជាង២៦០លាននាក់ ដែលជាប់ចំណាត់ថ្នាក់ទីបួន លើពិភពលោក។ សិង្ហបុរីអ្នកជិតខាងរបស់ឥណ្ឌូណេស៊ី ធ្វើតេស្តលើមនុស្សដល់ទៅជាង៨ម៉ឺន២ពាន់នាក់ ក្នុងចំណោមប្រជាជនជាង៥លាន៦សែននាក់។
ការធ្វើតេស្តមានចំនួនតិច ក៏ព្រោះតែការខ្វះខាតបុគ្គលិកសុខាភិបាល និងសារធាតុសម្រាប់ធ្វើតេស្ត។ រដ្ឋាភិបាលក្រុងហ្សាការតា ព្យាយាមយ៉ាងខ្លាំង ក្នុងការនាំចូលគ្រឿងបរិក្ខារចាំបាច់បម្រើឲ្យការធ្វើតេស្តនេះ។ លោក Monardo និយាយថា សារធាតុ Reagent ដែលត្រូវប្រើក្នុងការធ្វើតេស្តចំនួន៤៧៩ពាន់ ត្រូវនាំដឹកជញ្ជូនពីកូរ៉េខាងត្បូង និងចិនដើម្បីបំពេញតម្រូវការក្នុងស្រុក។ ជាមួយគ្នានេះ ឥណ្ឌូណេស៊ី ក៏ពង្រឹងសមត្ថភាពមន្ទីរពិសោធន៍ក្នុងស្រុក ដើម្បីជួយការងារធ្វើតេស្តនេះដែរ៕
Tag:
ឥណ្ឌូណេស៊ី
COVID-19
© រក្សាសិទ្ធិដោយ thmeythmey.com