ជាតិ
នគរបាលចរាចរណ៍ត្រូវអនុវត្តការផាកពិន័យដោយមិនលើកលែង តែត្រូវមានសីលធម៌វិជ្ជាជីវៈ
× ភ្នំពេញ៖ ជិតដល់ថ្ងៃដែលត្រូវអនុវត្តការផាកពិន័យតឹងរឹង លើអ្នកប្រើប្រាស់ទ្រូងផ្លូវ លោក នេត សាវឿន អគ្គស្នងការនគបាលជាតិ បានរម្លឹកមន្ត្រីនគរបាលចរាចរណ៍ អំពីការអនុវត្តការងារឱ្យមានប្រសិទ្ធភាព។ ចាប់ពីថ្ងៃទី១ ខែឧសភានេះទៅ នគរបាលចរាចរណ៍ នឹងផាកពិន័យកាន់តែធ្ងន់ធ្ងរលើអ្នកល្មើសច្បាប់ចរាចរណ៍។
«កងកម្លាំងនគរបាលចរាចរណ៍ផ្លូវគោកនៅទូទាំងប្រទេស នឹងអនុវត្តច្បាប់ស្តីពីចរាចរណ៍ផ្លូវគោក និងអនុក្រឹត្យលេខ៣៩ ដោយស្មារតីទទួលខុសត្រូវ តម្លាភាព ស្មើភាព គ្មានការលើកលែង និងមានសីលធម៌វិជ្ជាជីវៈ ព្រមទាំងឥរិយាបថថ្លៃថ្នូរ ទន់ភ្លន់ និងម៉ឺងម៉ាត់»។ នេះគឺជាការណែនាំរបស់លោក នេត សាវឿន អគ្គស្នងការនគបាលជាតិ នៅក្នុងសេចក្តីជូនដំណឹង ស្តីពីការរឹតបន្តឹងការអនុវត្តច្បាប់ចរាចរណ៍ផ្លូវគោក។
ការណែនាំដែលត្រូវបានចេញផ្សាយ នៅព្រឹកថ្ងៃទី២៨ខែមេសានេះ ក៏ជាសេចក្តីជូនដំណឹងដល់មហាជន និងប្រជាពលរដ្ឋទាំងអស់ ឱ្យចូលរួមអនុវត្តច្បាប់ចរាចរណ៍ ឬនឹងត្រូវប្រឈមការពិន័យធ្ងន់ធ្ងរជាងមុន ពីសំណាក់នគបាលចរាចរណ៍។ នេះជាសេចក្តីជូនដំណឹងចុងក្រោយមួយ ពីសំណាក់ក្រសួងមហាផ្ទៃ បន្ទាប់ពីរដ្ឋមន្ត្រីក្រសួងមហាផ្ទៃ សម្តេច ស ខេង បានប្រកាសអំពីការអនុវត្តតឹងតែងច្បាប់ចរាចរណ៍ផ្លូវគោក និងអនុក្រឹត្យលេខ៣៩ចុះថ្ងៃទី១៧ខែមីនាឆ្នាំ២០២០។
អនុក្រឹត្យលេខ៣៩ គឺជាការកែសម្រួលនៃអនុក្រឹត្យ ស្តីពីពិន័យអន្តរការណ៍ចំពោះអំពើល្មើសច្បាប់ចរាចរណ៍ ដើម្បីដំឡើងការពិន័យឱ្យខ្ពស់ជាងមុនពី៣ទៅ៥ដង៕
Tag:
ចរាចរណ៍
នេត សាវឿន
© រក្សាសិទ្ធិដោយ thmeythmey.com