COVID-19
ជាតិ
COVID-19៖ ចិន អរគុណកម្ពុជា ដែលប្រឆាំងនយោបាយទម្លាក់កំហុស
× ភ្នំពេញ៖ ចិន គាំទ្រកម្ពុជា ដែលប្រឆាំងនយោបាយទម្លាក់កំហុស ក្នុងគ្រាប្រឈមមុខនឹងការគំរាមកំហែងមនុស្សជាតិ។ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន ថ្លែងបែបនេះ មកកាន់លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ តាមរយៈទូរសព្ទ កាលពីថ្ងៃទី២៧ មេសា។
លោក វ៉ាង យី ចាត់ទុកការគាំទ្ររបស់កម្ពុជា មកលើការប្រឹងប្រែងរបស់អង្គការសុខភាពពិភពលោក (WHO) គឺជាជំហរមួយដ៏ត្រឹមត្រូវ ព្រោះវាមិនមែនជាពេលវេលាត្រូវទម្លាក់កំហុសលើគ្នាទេ។ សេចក្តីជូនព័ត៌មានរបស់ក្រសួងការបរទេសកម្ពុជា ដែលបានស្រង់សម្តីរដ្ឋមន្ត្រីការទូតចិន ដែលពិភាក្សាពីរឿងកូវីដ១៩ ជាមួយលោក ប្រាក់ សុខុន បាននិយាយដូច្នេះថា៖«អរគុណកម្ពុជា ដែលបានប្រឆាំងនឹងការធ្វើនយោបាយតូបនីយកម្ម និងល្បែងទម្លាក់កំហុស ក្នុងពេលដែលយើងត្រូវរួមគ្នា ដើម្បីប្រឈមនឹងការគំរាមកំហែងរួម ចំពោះមនុស្សជាតិ»។
ចិន ក៏បានអំពាវនាវឱ្យមានការឯកភាពគ្នា ក្នុងការប្រឆាំងជំងឺCOVID-19ដែរ។ លោក ប្រាក់ សុខុន គាំទ្រការអំពាវនាវរបស់ចិន។ រដ្ឋមន្ត្រីការបរទេសកម្ពុជារូបនេះ បាននិយាយដូច្នេះថា៖« ពេលនេះគឺជាពេលវេលា ដែលយើងត្រូវរួបរួមគ្នា មិនមែនជាពេលវេលាដែលត្រូវបែកគ្នានោះទេ»។
កម្ពុជា គាំទ្រការប្រកាន់យកអភិក្រមបែបវិទ្យាសាស្ត្រ ដើម្បីប្រយុទ្ធប្រឆាំងCOVID-19 និងកិច្ចប្រឹងប្រែងរបស់អង្គការសុខភាពពិភពលោក (WHO) ជាពិសេសគំនិតថ្លឹងថ្លែងរវាងការប្រយុទ្ធប្រឆាំង COVID-19 ជាមួយនឹងការអភិវឌ្ឍ។ នេះជាការបញ្ជក់របស់លោក ប្រាក់ សុខុន។
កន្លងមករដ្ឋាភិបាលចិន បានបញ្ជូនគ្រូពេទ្យ និងសម្ភារពេទ្យទាំងខាងស៊ីវិល និងយោធា រួមទាំងវត្ថុធាតុដើមផ្គត់ផ្គង់ដល់រោងចក្រកម្ពុជា ។ ជាពិសេសការយកចិត្តទុកដាក់ចំពោះពលរដ្ឋ និងនិស្សិតខ្មែរនៅប្រទេសចិន ក៏ដូចជាជួយផ្ដល់បទពិសោធន៍ ដល់កងកម្លាំងមួកខៀវកម្ពុជា នៅលីបង់ និងនៅម៉ាលីជាដើម។
ចិន នឹងបន្តជួយគាំទ្រកម្ពុជា ដើម្បីជំរុញការអភិវឌ្ឍឱ្យកាន់តែខ្លាំងក្លាថែមទៀត។ រដ្ឋមន្ត្រីការបរទេសចិន លោក វ៉ាង យី បានបញ្ជាក់ប្រាប់លោក ប្រាក់ សុខុន ដូច្នេះថា៖«អាទិភាពរបស់យើង គឺបន្តជំរុញកិច្ចសហប្រតិបត្តិការក្នុងក្របខណ្ឌនានា ជំរុញសេដ្ឋកិច្ចឱ្យងើបឡើងវិញពីវិបត្តិCOVID-19 ដោយផ្ដោតការយកចិត្តទុកដាក់លើវិស័យសំខាន់ៗ ដែលបានព្រមព្រៀងគ្នាកន្លងមក»៕
© រក្សាសិទ្ធិដោយ thmeythmey.com