ជាតិ
វីដេអូ
សេដ្ឋកិច្ច
ផ្តើមលក់យ៉ាអ៊ួរជាមួយទុនត្រឹម១៥ដុល្លារ កុមារា ឡា វណ្ណឌី រកចំណូលបានខ្ទង់ពាន់ដុល្លារ
× ភ្នំពេញ៖ កុមារាវ័យ១៣ឆ្នាំ ឡា វណ្ណឌី ដែលរស់នៅខេត្តសៀមរាប មានគំនិតបើកហាងលក់យ៉ាអ៊ួរ ដែលចំណាយដើមទុនដំបូងត្រឹម១៥ដុល្លារប៉ុណ្ណោះ។ វណ្ណឌី ម្ចាស់ហាង«វណ្ណឌី យ៉ាអ៊ួរ» ដែលកំពុងសិក្សានៅអនុវិទ្យាល័យ អាចរកប្រាក់ចំណូលបានខ្ទង់ពាន់ដុល្លារពីរបរនេះ។
ក្រោយទទួលទានយ៉ាអ៊ួរ ដែលជាស្នាដៃម្តាយ កុមារា ឡា វណ្ណឌី មានគំនិតយកយ៉ាអ៊ួរនេះបង្កើតជាអាជីវកម្ម ក្រោមស្លាកយីហោឈ្មោះ «វណ្ណឌី យ៉ាអ៊ួរ» ដែលមានទីតាំងនៅក្នុងខេត្តសៀមរាប។ មុខរបរដែលដំណើរការបាន២ឆ្នាំមកហើយនេះ គឺកុមារាវ័យ១៣ឆ្នាំ ឡា វណ្ណឌី ជាអ្នកគ្រង់គ្រងហាងនេះផ្ទាល់ និងមានម្តាយជាអ្នកធ្វើយ៉ាអ៊ូរ ដ៏មានរសជាតិឈ្ងុយឆ្ងាញ់នេះ។
សូមអញ្ជើញទស្សនាបទសម្ភាសដូចខាងក្រោមនេះ៖
ពីមួយថ្ងៃទៅមួយថ្ងៃ មានអតិថិជនកាន់តែច្រើន គាំទ្រយ៉ាអ៊ួរនៅហាងរបស់កុមារាវ័យ១៣ឆ្នាំ ឡា វណ្ណឌី។ បច្ចុប្បន្ន មិនត្រឹមតែលក់នៅក្នុងហាងប៉ុណ្ណោះទេ វណ្ណឌី ក៏ពង្រីកការលក់ តាមអនឡាញផងដែរ។ ការគាំទ្រយ៉ាអ៊ួររបស់ វណ្ណឌី មានសន្ទុះកាន់តែច្រើននៅតាមបណ្តាខេត្តមួយចំនួន និងរាជធានីភ្នំពេញ។
នៅក្នុងកម្មវិធី«អាជីវកម្មជំនាន់ថ្មី» ដែលសារព័ត៌មានថ្មីៗសហការផលិតជាមួយនឹងវិទ្យុ FM 102 ម្ចាស់ហាង ឡា វណ្ណឌី អះអាងថា មុខរបរដែលចាប់ផ្តើមដើមទុនត្រឹម១៥ដុល្លារនេះ ក្នុងមួយថ្ងៃលក់ដាច់បានប្រមាណ១០០ដប ដោយអាចរកចំណូលបានខ្ទង់ពាន់ដុល្លារក្នុងមួយខែ។
ម្ចាស់ហាង ឡា វណ្ណឌី ដែលកំពុងសិក្សានៅថ្នាក់អនុវិទ្យាល័យ បានរៀបរាន់បន្ថែមពីការគ្រប់គ្រងប្រាក់ចំណូលប្រចាំថ្ងៃយ៉ាងដូច្នេះ៖ «យើងត្រូវបែងចែកហិរញ្ញវត្ថុឲ្យបានត្រឹមត្រូវ។ លុយចំណាយត្រូវដាក់ផ្សេង លុយចំណេញត្រូវដាក់ផ្សេង ហើយលុយចំណេញត្រូវបែងចែកច្រើនប្រភេទទៀត ថាតើសម្រាប់ធ្វើអ្វីបន្តទៀត»។
បើទោះជារកប្រាក់ចំណូលបានច្រើនគួរសមទាំងខ្លួននៅវ័យក្មេង, កុមារា ឡា វណ្ណឌី បានជួបនឹងផលលំបាកមួយចំនួន ដូចជា ការមិនហ៊ាននិយាយជាមួយភ្ញៀវ, ភ័យខ្លាច និងខ្មាស់អៀន នៅពេលចាប់ផ្ដើមអាជីវកម្មដំបូង។ បច្ចុប្បន្ន វណ្ណឌី បានឆ្លងកាត់ឧបស្គទាំងនោះអស់ហើយ ហើយកុមរាវ័យ១៣ឆ្នាំ រូបនេះ យល់ឃើញថាការរួបរួមសហការគ្នារវាងម្ចាស់ហាងនិងបុគ្គលិក គឺជាអ្វីដែលជំរុញឲ្យអាជីវកម្មរបស់ខ្លួនរីកចម្រើនមួយកម្រិតទៀតដោយ វណ្ណឌី ពោលដូច្នេះ៖ «បុគ្គលិកជាសរសៃឈាម ម្ចាស់ហាងជាបេះដូង»៕
© រក្សាសិទ្ធិដោយ thmeythmey.com