ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ភាគច្រើននៃពួកយើងសុទ្ធតែដឹងថាបន្លែ គឺចាំបាច់ណាស់សម្រាប់រក្សាសុខភាពល្អប្រសើរ។ ប៉ុន្តែថាតើនឹងមានអ្វីកើតឡើងប្រសិនបើឈប់ទទួលទានបន្លែ? 
ខាងក្រោមនេះយើង នឹងបង្ហាញឱ្យដឹងពីបញ្ហាដែលកើតឡើងប្រសិនបើអ្នកមិនញ៊ាំបន្លែ ៖
១. អ្នកនឹងកើនទម្ងន់លើសលប់
ជាតិសរសៃ គឺជាអ្វីមួយដែលអ្នកនឹងមិនអាចរកបានពីក្នុងសាច់សត្វឡើយ។ ជាតិសរសៃដើរតួនាទីជាច្រើនខុសៗពីគ្នា ហើយមួយក្នុងចំណោមនោះ គឺធ្វើឱ្យអ្នកឆាប់ឆ្អែត។ ប្រសិនបើអាហារគ្មានជាតិសរសៃទេនោះ អ្នកនឹងមិនងាយមានអារម្មណ៍ឆ្អែតឡើយ។ ជាលទ្ធផលអ្នកនឹងទទួលទានច្រើនជាងធម្មតាដើម្បីឱ្យអារម្មណ៍ឆ្អែត ហើយប្រាកដជាកើនទម្ងន់លើសលប់។ អ្វីដែលកាន់តែគួរឱ្យបារម្ភថែមទៀតនោះ គឺភាពធាត់ជ្រុលអាចបង្កើនហានិភ័យនៃបញ្ហាសុខភាពផ្សេងទៀត។
២. អ្នកនឹងឧស្សាហ៍ទល់លាមក
ជាតិសរសៃជួយសម្រួលចលនាពោះវៀននិងទប់ស្កាត់ជាតិពុល ព្រមទាំងកាកសំណល់ផ្សេងៗ។ ដូច្នេះប្រសិនបើអ្នកមិនញ៊ាំបន្លែដែលជាប្រភពដ៏ប្រសើរនៃជាតិសរសៃទេនោះ អ្នកប្រាកដជាឧស្សាហ៍ទល់លាមកជាមិនខាន ពិសេសប្រសិនបើមិនទទួលទានទឹកបានគ្រប់គ្រាន់និងមានរបៀបរស់នៅគ្មានសុខភាពល្អ។
៣. អ្នកនឹងមានស្បែកមិនស្រស់ស្អាត
បញ្ហាស្បែកផ្សេងៗ គឺងាយនឹងកើតឡើងណាស់ប្រសិនបើអ្នកមិនរួមបញ្ចូលបន្លែក្នុងរបបអាហារប្រចាំថ្ងៃ។ នេះក៏ព្រោះតែកង្វះជាតិសរសៃបណ្ដាលឱ្យជាតិពុលផ្សេងៗប្រមូលផ្ដុំមិនត្រូវបានកម្ចាត់ចេញ។ លើសពីនេះទៅទៀតបន្លែមានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលកម្ចាត់រ៉ាឌីកាល់សេរីមិនឱ្យបំផ្លាញកោសិកាស្បែក។
៤. សុខភាពពោះវៀនមិនប្រសើរ
ជាតិសរសៃក្នុងបន្លែជួយចិញ្ចឹមបាក់តេរីល្អៗក្នុងពោះវៀន។ ដូច្នេះប្រសិនបើអ្នកមិនទទួលទានបន្លែទេនោះសុខភាពពោះវៀននឹងចុះខ្សោយដែលបង្កើនហានិភ័យនៃបញ្ហាសុខភាពគួរឱ្យបារម្ភច្រើនផ្សេងទៀត។
៥. ប្រព័ន្ធភាពស៊ាំចុះខ្សោយ
បញ្ហាសុខភាពមួយដែលផ្សារភ្ជាប់នឹងសុខភាពពោះវៀនចុះខ្សោយ គឺប្រព័ន្ធភាពស៊ាំរាងកាយ។ នៅពេលបិរមាណនៃបាក់តេរីមិនល្អកើនឡើងខ្ពស់នោះវានឹងជះឥទ្ធិពលលើប្រព័ន្ធភាពស៊ាំរាងកាយនាំឱ្យចុះខ្សោយ។
៦. អ្នកនឹងប្រឈមមុខខ្ពស់ជាមួយហានិភ័យនៃជំងឺមហារីក
នេះក៏ព្រោះតែបន្លែបៃតងជាប្រភពដ៏ប្រសើរនៃសារធាតុប្រឆាំងអុកស៊ីតកម្មដែលជួយកម្ចាត់រាល់រ៉ាឌីកាល់សេរីទប់ស្កាត់ហានិភ័យនៃជំងឺមហារីក។ ដូច្នេះប្រសិនបើអ្នកមិនទទួលទានបន្លែសោះនោះ អ្នកប្រាកដជាអាចប្រឈមមុខខ្ពស់នឹងហានិភ័យនៃជំងឺមហារីកមិនខាន។
៧. អ្នកនឹងប្រឈមមុខខ្ពស់ជាមួយហានិភ័យនៃជំងឺបេះដូង
របបអាហារដែលមានបន្លែតិច ប៉ុន្តែជាតិខ្លាញ់ឆ្អែតនិងកូឡេស្តេរ៉ូលខ្ពស់អាចបណ្ដាលឱ្យស្ទះសរសៃឈាម ព្រមទាំងបញ្ហាសម្ពាធឈាមឡើងខ្ពស់។ នេះហើយជាមូលហេតុដែលបង្កើនហានិភ័យនៃជំងឺបេះដូង គាំងបេះដូង និងដាច់សរសៃឈាមខួរក្បាល៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
