ជាតិ
សុខភាព
តើត្រូវសម្គាល់ផលិតផលក្លែងក្លាយដូចម្ដេច ដើម្បីជៀសវៀងខាតថវិកា និងប៉ះពាល់ដល់សុខភាព?
ប្រភពរូប ពីលោកវណ្ណ ផេង អនុប្រធានលេខាធិការដ្ឋាននៃគណៈកម្មការប្រយុទ្ធប្រឆាំងផលិតផលក្លែងក្លាយ
×![]()
ភ្នំពេញ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានចាប់ផលិតផលក្លែងក្លាយ ដែលគ្មានគុណភាព និងច្បាប់ត្រឹមត្រូវនៅលើទីផ្សារ យកទៅកម្ទេច និងបំផ្លាញចោលជាបន្តបន្ទាប់នាពេលកន្លងមក។ ប៉ុន្តែផលិតក្លែងក្លាយ នៅតែមានវត្តមានលើទីផ្សារ ខណៈជនខិលខូច បន្តសកម្មភាពលួចចរាចរដដែល។ ដូច្នេះតើពលរដ្ឋត្រូវធ្វើដូចម្ដេច ដើម្បីជៀសវៀងការខាតបង់ថវិកា ទៅលើផលិតផលដែលគ្មានគុណភាព?
ដើម្បីជ្រាបព័ត៌មានកាន់តែច្បាស់ សូមលោកអ្នកនាងតាមដានបទសម្ភាសរវាង អ្នកនាង ស៊ែម ម៉ូនីតា អ្នកសារព័ត៌មានអេឡិចត្រូនិកថ្មីៗ និងលោក វណ្ណ ផេង អនុប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដូចតរទៅ៖
អ្នកនាង ស៊ែម ម៉ូនីតា៖ តើយើងអាចដឹងបានដោយរបៀបណា ថាផលិផលមួយពិតឬក្លែងក្លាយ?
លោក វណ្ណ ផេង៖ ការណ៍ដែលយើងអាចដឹងថា ផលិតផលណាពិត ឬក្លែងក្លាយ វាអាស្រ័យទៅលើលក្ខណៈមួយចំនួន ដែលយើងអាចកត់សម្គាល់បានដោយខ្លួនឯង។ តែក៏មានផលិតមួយចំនួន លុះត្រាតែយកទៅពិសោធន៍ផ្ទាល់ទើបអាចដឹងបានថាពិត ឬក្លែងក្លាយ។
អ្នកនាង ស៊ែម ម៉ូនីតា៖ តើមានលក្ខណៈអ្វីខ្លះ ដែលយើងអាចសម្គាល់បានដោយខ្លួនឯង ថាផលិតផលនោះពិត ឬក្លែងក្លាយ?
លោក វណ្ណ ផេង៖ ចំពោះវិធីបឋម ដើម្បីងាយស្រួលប្រជាពលរដ្ឋសម្គាល់ ផលិតផលក្លែងក្លាយ និងផលិតផលលួចចម្លង រួមមាន៖ ១.ការសម្គាល់រូបរាង ទំហំ ទម្ងន់ និងពណ៌របស់ផលិតផលដែលមានលក្ខណៈខុសពីស្តង់ដា និងពុំមានគុណភាពល្អ។ ២.ការវេចខ្ចប់មិនស្អាត ដោយប្រើប្រាស់វត្ថុធាតុដើមមានគុណភាពទាប និងពុំមានគុណភាព។ ៣.មិនមានបញ្ជាក់ពីប្រភពផលិតផល និងអាស័យដ្ឋានច្បាស់លាស់។ ៤.តម្លៃមានលក្ខណៈថោក ឬថ្លៃខុសពីធម្មតា និងការពិពណ៌នាអំពីផលិតផលបផ្លើសពីការពិត។ ៥.ការបោះពុម្ពនៅលើស្លាកសញ្ញាមិនច្បាស់ រួមទាំងការពិពណ៌នាមិនត្រឹមត្រូវ និងការសរសេរខុស។ ៦.ពិនិត្យលើបាកូដ ដោយប្រើកម្មវិធី QR code Scanner នៅលើទូរស័ព្ទស្មាតហ្វូន ដើម្បើដឹងព័ត៌មាននានា ពីផលិតផល និងប្រភពផលិត។ ៧.មិនមានបញ្ជាក់អាជ្ញាប័ណ្ណ អនុញ្ញាតពីក្រសួង ស្ថាប័នមានសម្ថកិច្ច។
អ្នកនាង ស៊ែម ម៉ូនីតា៖ តើការកត់សម្គាល់បែបនេះ អាចដឹងច្បាស់១០០ភាគរយទេ?
លោក វណ្ណ ផេង៖ តាមពិត វាមិន១០០ភាគរយទេ តែអាចបង្ការបានច្រើន។
អ្នកនាង ស៊ែម ម៉ូនីតា៖ បើធៀបនឹងឆ្នាំកន្លងមក តើមានការកើនឡើង ឬថយចុះយ៉ាងណា ក្រោយគណៈកម្មាធិការ ចាប់បានផលិតផលក្លែងក្លាយទាំងនោះ? ហើយកាលពីឆ្នាំ២០១៩ចាប់បានប្រហែលប៉ុន្មានដែរ?
លោក វណ្ណ ផេង៖ ពីមួយឆ្នាំទៅមួយឆ្នាំ ការចាប់បានផលិតផលទាំងនោះច្រើន ឬតិច វាមិនទៀងនោះទេ វាអាស្រ័យទៅលើតម្រូវការទីផ្សារ។ កាលណាទីផ្សារកាន់មានតម្រូវការជនខិលខូចនិងនៅតែឆ្លៀតឱកាស។សម្រាប់ឆ្នាំ២០១៩ យើងចាប់បាន(ផលិតផលក្លែងក្លាយ)ប្រមានសរុនជាង៥០០រយតោន។
អ្នកនាង ស៊ែម ម៉ូនីតា៖ តើគណៈកម្មការចាប់ផលិតនោះបានដោយរបៀបណា?
លោក វណ្ណ ផេង៖ គឺយើងទទួលពាក្យបណ្ដឹងពីអ្នកប្រើប្រាស់ គាត់បានសហការដោយទំនាក់ទំនងផ្ដល់ជាព័ត៌មានមក ហើយយើង ក៏មានក្រុមការងារចុះស៊ើបអង្កេតស្រាវជ្រាវបន្ថែមទៀតផងដែរ។ សម្រាប់រយៈពេល មិនកំណត់ទេ ឱ្យតែមានករណីរកឃើញ យើងនឹងអនុវត្តភ្លាម។
អ្នកនាង ស៊ែម ម៉ូនីតា៖ តើផលិតផលទាំងនោះ ភាគច្រើនមានប្រភពមកពីណា?
លោក វណ្ណ ផេង៖ គឺមកពីបណ្ដាប្រទេសជិតខាងដូចជា ថៃ វៀតណាម ហើយចិនច្រើនជាងគេ។ នៅកម្ពុជាក៏មានដែរ។
អ្នកនាង ស៊ែម ម៉ូនីតា៖ តើមានផលប៉ះពាល់អ្វីខ្លះ ចំពោះអ្នកប្រើប្រាស់ និងសេដ្ឋកិច្ចរបស់ប្រទេស?
លោក វណ្ណ ផេង៖ គឺប៉ះពាល់ខ្លាំងណាស់ ដល់សុខភាព មិនថាជាប្រភេទអាហារ ឬគ្រឿងសំអាងនោះទេ គឺប៉ះពាល់ទាំងសុខភាព ខាតថវិកា។ ឯប្រទេសក៏ប៉ះពាល់ ទៅតាមហ្នឹងដែរ។
អ្នកនាង ស៊ែម ម៉ូនីតា៖ ក្រោយពីមានការចុះបង្គ្រាបជាច្រើនលើក តើស្ថានភាពទូទៅប្រែប្រួលយ៉ាងណាដែរ?
លោក វណ្ណ ផេង៖ បន្ទាប់ពីគណៈកម្មការអន្តរក្រសួង នៃគណៈកម្មការប្រយុទ្ធប្រឆាំងផលិតផលក្លែងក្លាយ ចុះត្រួតពិនិត្យចាប់យកទៅកម្ទេចជាច្រើនលើកមក យើងសង្កេតឃើញថាមានជនខិលខូចមួយចំនួន ក៏ខ្លាចរអាច្បាប់ និងក៏បានទៅបំពេញសុំការអនុញ្ញាតច្បាប់ត្រឹមត្រូវ មានការកើនឡើងផងដែរ។ ចុងក្រោយ យើងសុំឱ្យបងប្អួន រួមសហការគ្នាបន្តទៀត ដើម្បីទប់ស្កាត់ ប្រឆាំងទាំងអស់គ្នា ប្រសិនបើជួបករណីសង្ស័យ បងប្អូនអាចឆាតតាមផេក គណៈកម្មការប្រយុទ្ធប្រឆាំងផលិតផលក្លែងក្លាយផ្ទាល់ ឬទូរស័ព្ទ ០៨១ ៩៩៩ ៨០៨៕
ប្រភពរូប ពីលោកវណ្ណ ផេង អនុប្រធានលេខាធិការដ្ឋាននៃគណៈកម្មការប្រយុទ្ធប្រឆាំងផលិតផលក្លែងក្លាយ៖
Tag:
ផលិតផល
© រក្សាសិទ្ធិដោយ thmeythmey.com
