COVID-19
អន្តរជាតិ
អង់គ្លេសមានអ្នកស្លាប់ដោយសារ COVID-19 លំដាប់ទីពីរនៅអឺរ៉ុប បុគ្គលិកវេជ្ជសាស្រ្ត យកសំណាកពីប្រជាជនអង់គ្លេសមកធ្វើតេស្ត។ រូបភាព៖ COVID-19
× គិតមកត្រឹមថ្ងៃទី២៩ ខែមេសា ចំនួនអ្នកស្លាប់នៅអង់គ្លេស បានកើនលើសដល់លំដាប់ទីពីរហើយ នៅក្នុងតំបន់អឺរ៉ុប ដោយឈរនៅក្រោយអ៊ីតាលី។ បញ្ហានេះ ត្រូវបានគេរិះគន់ជាច្រើនជុំវិញការឆ្លើយតបរបស់នាយករដ្ឋមន្ត្រីអង់គ្លេស បូរីស ចនសុន ក្នុងការដោះស្រាយជំងឺរលាកសួត ដែលបង្កដោយកូរ៉ូណាវីរុស (COVID-19)។
បើតាមការប្រកាសរបស់ទីភ្នាក់ងារសុខាភិបាលសាធារណៈអង់គ្លេស (PHE) អត្រាអ្នកស្លាប់នៅក្នុងប្រទេសអង់គ្លេស បានកើនដល់ ២៦៩០៧នាក់ហើយ។ តួលេខមួយនេះ គឺខ្ពស់ជាងគេបង្អស់នៅក្នុងតំបន់អឺរ៉ុប បន្ទាប់ពីអ៊ីតាលីដែលមានចំនួន២៧៦៨២០នាក់។ ចំណែកករណីសរុបរបស់អង់គ្លេស គឺឈរនៅលំដាប់ទី៤ គឺ១៦៥២២២១ករណី បន្ទាប់ពីអេស្ប៉ាញដែលមាន២៣៦៨៩៩ករណី អ៊ីតាលីទីពីរចំនួន២០៣៥៩១ករណី និងបារាំងទីបីចំនួន១៦៦៤២០ករណី។
ពាក់ព័ន្ធនឹងចំនួនអ្នកស្លាប់កើនឡើងបែបនេះ សម្ពាធកាន់តែខ្លាំងធ្លាក់លើរដ្ឋាភិបាលអង់គ្លេស ក៏ដូចជានាយករដ្ឋមន្ត្រី ចនសុខ ដែលទើបតែជាសះស្បើយពី COVID-19។ គណបក្សប្រឆាំងមួយចំនួននៅអង់គ្លេស បានចោទរដ្ឋាភិបាលថា មានភាពយឺតយ៉ាវក្នុងការប្រកាសបិទប្រទេស ការធ្វើតេស្តទ្រង់ទ្រាយធំមិនទាន់ពេលវេលា និងការទទួលបានសម្ភារវេជ្ជសាស្ត្រសម្រាប់បំពាក់នៅមន្ទីរពេទ្យមានលក្ខណៈយឺតជាដើម។
ចំណែកមេដឹកនាំគណបក្សពលករអង់គ្លេស លោក Keir Starmer បានរិះគន់លោក ចនសុន ថា ចំណាត់ការរបស់លោកនាយករដ្ឋមន្ត្រី គឺមានលក្ខណៈយឺតយ៉ាវណាស់ ចាប់តាំងពីផ្ទុះវិបត្តិសុខភាពក្នុងឆ្នាំ ១៩១៨មក។
សូមបញ្ជាក់ថា អង់គ្លេសបានប្រកាសបិទប្រទេសតាំងពីចុងខែមីនាមកម្លេះ ហើយត្រូវបានរដ្ឋាភិបាលអង់គ្លេសពន្យារពេលរហូតដល់ថ្ងៃទី៧ ខែឧសភា។ តាមរយៈចំណាត់ការនេះ ប្រជាជនជាច្រើនត្រូវគេបង្ខំឲ្យស្នាក់នៅផ្ទះ ហាមជួបប្រជុំមនុស្សច្រើន បិទហានលក់ទំនិញមួយចំនួន បិទភោជនីយដ្ឋាន បារ និងតៀមលក់ស្រានៅក្នុងប្រទេស។ មកទល់ពេលនេះ គឺមិនទាន់ដឹងនៅឡើយទេថាតើរដ្ឋាភិបាល នឹងបន្តការបិទប្រទេស ឬក៏អត់ ខណៈថ្ងៃកំណត់ជិតមកដល់៕
© រក្សាសិទ្ធិដោយ thmeythmey.com