COVID-19
អន្តរជាតិ
ប្រមុខការទូតរុស្ស៊ី សោកស្ដាយដែលលោកខាងលិចទម្លាក់កំហុសឲ្យចិនរឿង COVID-19 រដ្ឋមន្រ្តីការបរទេសរុស្ស៊ី Sergei Lavrov ។ រូបភាព Xinhua
× ប្រមុខការទូតរុស្ស៊ី លោក Sergei Lavrov បានបង្ហាញការសោកស្ដាយចំពោះក្រុមប្រទេសលោកខាងលិចដែលទម្លាក់កំហុសលើចិនពាក់ព័ន្ធជំងឺរលាកសួតបង្កដោយកូរ៉ូណាវីរុសថ្មី (COVID-19) ។ បើតាមលោក Lavrov ការស៊ើបអង្កេតជារឿងចាំបាច់ តែមិនមែនដើម្បីបញ្ជាក់ថា អ្នកណាខុស ឬអ្នកណាត្រូវឡើយ។
ជាការចេញមុខជួយយឹតយោងចិនដែលរងសម្ពាធឲ្យបើកការស៊ើបអង្កេតលើប្រភពជំងឺ COVID-19 រដ្ឋមន្ត្រីការបរទេសរុស្ស៊ី Sergei Lavrov និយាយថា លោកខកចិត្តនឹងអ្វីដែលប្រទេសលោកខាងលិចកំពុងធ្វើ។ លោក សំដៅដល់ការទាមទារឲ្យមានការស៊ើបអង្កេតមួយទាក់ទងនឹងជំងឺ COVID-19 ដែលរាលដាលពេញពិភពលោក ក្រោយផ្ទុះឡើងដំបូងនៅទីក្រុងវូហាន ខេត្តហ៊ូប៉ីកាលពីខែធ្នូ ឆ្នាំ២០១៩ កន្លងទៅ។
«ខ្ញុំនិយាយថា យើងខកចិត្តនឹងការប៉ុនប៉ងចង្អុលមុខលើប្រទេសណាមួយ។ អាមេរិក កំពុងចោទចិន។ នៅអឺរ៉ុប ក៏មានការចោទប្រកាន់លើចិនដែរ។» នេះជាលើកឡើងរបស់រដ្ឋមន្ត្រីការបរទេសរុស្ស៊ី លោក Lavrov ក្នុងកិច្ចសម្ភាសជាមួយទីភ្នាក់ងារព័ត៌មានរុស្ស៊ី Tass នៅថ្ងៃទី២៩ ខែមេសា។ ដោយហៅការប៉ុនប៉ងនេះជារឿងគួរឲ្យសោកស្ដាយ លោក Lavrov បញ្ជាក់ អាទិភាពពេលនេះ គឺការទប់ស្កាត់វីរុសដ៏សាហាវមួយនេះ។
បើតាមប្រមុខការទូតរុស្ស៊ី ការស៊ើបអង្កេតជារឿងចាំបាច់ដើម្បីឲ្យប្រជាជនទាំងអស់ដឹងពីរបៀបដែលត្រូវការពារខ្លួនសម្រាប់ការគំរាមកំហែងខាងមុខ ប៉ុន្តែមិនមែនជាការរុញកំហុសឲ្យគ្នាទេ។ ត្រង់ចំណុចនេះ លោកបញ្ជាក់ថា៖ «ការស៊ើបអង្កេត មិនមែនដើម្បីឲ្យមនុស្សម្នានិយាយថា ខ្ញុំត្រូវ ហើយនរណាម្នាក់ នឹងត្រូវទទួលកំហុស។ ខ្ញុំធ្វើរឿងត្រឹមត្រូវ។»
ប្រភព COVID-19 និងការរាលដាលជំងឺនេះ ធ្វើឲ្យចិនកា្លយជាមុខសញ្ញារិះគន់យ៉ាងខ្លាំង។ អាមេរិក តែងរិះគន់មិនលស់ថ្ងៃពីរឿងនេះ និងចោទចិនជាច្រើនរឿងតាំងពីការលាក់បាំងវីរុស រហូតដល់ការមិនចាត់វិធានការឆ្លើយតបឲ្យបានលឿនដែលបណ្ដាលឲ្យវីរុសអាចសាយភាយទៅកាន់ប្រទេសជាច្រើន។ រដ្ឋអឺរ៉ុបខ្លះមានអង់គ្លេស បារាំង និងអាល្លឺម៉ង់ដែលសុទ្ធសឹងរងគ្រោះខ្លាំងដោយសារ COVID-19 ក៏ទាមទារឲ្យមានការស៊ើបអង្កេតរកសខ្មៅផងដែរ។
តាមពិតទៅ ម្ដងជាពីរដង ចិនតែងទាត់ចោលការចោទប្រកាន់ទាំងអស់លើខ្លួន។ មិនតិចលើកឡើយដែលទីក្រុងប៉េកាំងអះអាងថា COVID-19 មានដំបូងនៅចិនមែន តែមិនមែនបានន័យថា ចិនជាប្រភពនៃជំងឺនេះឡើយ រហូតដល់មន្ត្រីអ្នកនាំពាក្យក្រសួងការបរទេសចិនម្នាក់និយាយថា កងទ័ពអាមេរិកឯណោះទេដែលនាំវីរុសទៅវូហានអំឡុងពេលកីឡាកងទ័ពកាលពីខែតុលា ឆ្នាំ២០១៩ ៕
Tag:
រុស្ស៊ី
ចិន
COVID-19
© រក្សាសិទ្ធិដោយ thmeythmey.com