COVID-19
ជាតិ
សង្គមជាតិ
Paragon និង Footprint ព្រមបញ្ចុះថ្លៃរៀនអនឡាញ១០ទៅ១៥ភាគរយ ខណៈ CIA មិនទាន់សម្រេច
× ភ្នំពេញ៖ បញ្ហារវាងអាណាព្យាបាលសិស្ស ជាមួយសាលាផារ៉ាហ្គន និងសាលាអន្តរជាតិហ្វ៊ូតព្រីន លើការបញ្ចុះតម្លៃសម្រាប់ការរៀនតាមអនឡាញ បានឈានដល់ការបញ្ចប់ត្រឹមការបញ្ចុះតម្លៃពី១០ទៅ១៥ភាគរយ ក្រោយពីក្រសួងអប់រំ បានចូលរួមដោះស្រាយ។ ប៉ុន្តែសាលា CIA FIRST International School មិនទាន់សម្រេចនៅឡើយទេ ដោយត្រូវបន្តការចរចាបន្ថែមទៀត។
លោក ហង់ ជួន ណារ៉ុន រដ្ឋមន្ត្រីក្រសួងអប់រំ បានដាក់របាយការណ៍ស្តីពីលទ្ធផលនៃកិច្ចប្រជុំរវាងសាលាទាំងបី ជាមួយអាណាព្យាបាលសិស្ស ជូនទៅសម្តេចនាយករដ្ឋមន្ត្រី ហ៊ុន សែននៅថ្ងៃទី២៩ ខែមេសា ឆ្នាំ២០២០។ របាយការណ៍ បង្ហាញថា សាលាផារ៉ាហ្គន (Paragon International School) បានសម្រេចតាមសំណើរបស់អាណាព្យាបាលសិស្ស លើការបញ្ចុះតម្លៃសិក្សាតាមអនឡាញចំនួន១៥ភាគរយ សម្រាប់ឆ្នាំសិក្សា២០១៩-២០២០ មិនដំឡើងថ្លៃសិក្សាសម្រាប់ឆ្នាំ២០២០-២០២១ ចំពោះសិស្សគ្រប់កម្រិត និងពន្យារពេលបិទការចុះឈ្មោះចូលរៀនសម្រាប់ឆ្នាំសិក្សា២០២០-២០២១ រហូតដល់ក្រសួងអប់រំប្រកាសបើកសាលាវិញ ព្រមទាំងពង្រឹងគុណភាពបង្រៀនតាមអនឡាញ។
ចំណែកសាលាអន្តរជាតិហ្វ៊ូតព្រីន (Footprint International School) បានសម្រេចបញ្ចុះតម្លៃ១០ភាគរយលើការបង់ថ្លៃរៀនតាមអនឡាញ ហើយសាលា បង្វិលថវិកាត្រីមាសទី៣ សម្រាប់ឆ្នាំសិក្សា២០១៩-២០២០ ចំនួន១៥ភាគរយទៅឲ្យអាណាព្យាបាលសិស្សវិញ និងរក្សាតម្លៃដើមលើសេវាសៀវភៅ អាហារ និងថ្លៃឡានជាដើម។ ចំពោះបញ្ហាផ្សេងៗទៀតសម្រាប់សាលានេះ កំពុងបន្តដោះស្រាយបន្ថែម។
សម្រាប់សាលា CIA FIRST International School ដែលមានអាណាព្យាបាលសិស្សបានចូលរូមទាមទារឲ្យបញ្ចុះតម្លៃដែរនោះ មិនទាន់ឯកភាពគ្នានៅឡើយទេ ខណៈដែលភាគីអាណាព្យាបាលសិស្សទាមទារឲ្យសាលាបញ្ចុះតម្លៃ៤៥ ឬក៏៣៥ភាគរយក៏បាន តែខាងសាលាអាចមានលទ្ធភាពបញ្ចុះត្រឹម២០ភាគរយតែប៉ុណ្ណោះ។
តែយ៉ាងណា ក្រសួងអប់រំ បានលើកឡើងថា បើអាណាព្យាបាលសិស្សទាមទារបញ្ចុះតម្លៃត្រឹម៥០ភាគរយ នោះសាលានឹងប្រឈមនឹងការបិទទ្វារ និងបណ្តាលឲ្យគ្រូ និងបុគ្គលិក បាត់បង់ការងារ និងចំណូល។ ក្រសួងបានលើកហេតុផលសមស្របសម្រាប់ភាគីទាំងសងខាងថា បើសាលាបញ្ចុះត្រឹម២៥ ទៅ៣០ភាគរយនោះ ខាងសាលានឹងអាចទប់ទល់លើការចំណាយសម្រាប់គ្រូបង្រៀន និងចំណាយផ្សេងៗផងដែរ៕
Tag:
ក្រសួងអប់រំ
សិក្សាតាមអនឡាញ
© រក្សាសិទ្ធិដោយ thmeythmey.com