សម្តេចសង្ឃ បួរ គ្រី៖ កុំភ្លេចខ្លួននឹងកូវីដ [កុំឲ្យដូច] ពាក្យខ្មែរថា ដល់កំពង់លង់ទូក

COVID-19

ជាតិ

សង្គមជាតិ

សម្តេចសង្ឃ បួរ គ្រី៖ កុំភ្លេចខ្លួននឹងកូវីដ [កុំឲ្យដូច] ពាក្យខ្មែរថា ដល់កំពង់លង់ទូក

30, Apr 2020 , 5:28 pm

រូបភាព

សម្តេចសង្ឃ បួរ គ្រី មានបន្ទូលក្នុងសន្និសីទសារព័ត៌មាន នៅទីស្តីការគណៈរដ្ឋមន្រ្តី នារសៀលថ្ងៃទី៣០ ខែមេសា ឆ្នាំ២០២០។ ព្រះអង្គ មានបន្ទូលថា វា ជាលើកទីមួយសម្រាប់ព្រះអង្គ ដែលបានយាងទៅទីស្តីការគណៈរដ្ឋមន្ត្រី។

ដោយ: ថ្មីៗ

សម្តេចព្រះអភិសិរីសុគន្ធា បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយ បង្ហាញព្រះហទ័យត្រេកអរជាមួយព្រះសង្ឃនិងប្រជាជនទូទៅ ចំពោះការធូរស្បើយជំងឺកូវីដ-១៩ នៅកម្ពុជា។ យ៉ាងណា ព្រះអង្គ នៅតែក្រើនរម្លឹកព្រះសង្ឃនិងប្រជាជន «កុំឲ្យភ្លេចខ្លួន» នឹងជំងឺនេះ។

ក្នុងសន្និសីទសារព័ត៌មាន ស្តីពីបច្ចុប្បន្នភាពនៃការប្រយុទ្ធប្រឆាំងជំងឺកូវីដ-១៩ របស់សហគមន៍ព្រះពុទ្ធសាសនា នៅទីស្តីការគណៈរដ្ឋមន្ត្រី នារសៀលថ្ងៃទី៣០ ខែមេសា ឆ្នាំ២០២០ សម្តេច បួរ គ្រី ដែលជាថ្នាក់ដឹកនាំខ្ពស់បំផុតផ្នែកធម្មយុត្តិកនិកាយ ជំរុញឲ្យព្រះសង្ឃនិងប្រជាជន បន្តរក្សាអនាម័យនិងការពារខ្លួនពីជំងឺកូវីដ-១៩ ដ្បិតកម្ពុជា មិនទាន់ប្រកាសបញ្ចប់ការប្រយុទ្ធប្រឆាំងនឹងជំងឺនេះនៅឡើយទេ។

សម្តេចព្រះសង្ឃរាជនៃគណៈធម្មយុត្តិកនិកាយ ប្រាប់ឲ្យប្រយ័ត្ន កុំឲ្យដូចសុភាសិតខ្មែរ ដែលពោលថា «ដល់កំពង់លង់ទូក» ដោយព្រះអង្គ ចង់មានន័យថា បើប្រជាជន ប្រមាទនឹងជំងឺកូវីដ-១៩ ព្រោះតែឃើញស្ថានភាពធូរស្បើយ វា អាចនឹងបង្កហានិភ័យ។ ព្រះអង្គ ទ្រង់ប្រទានឱវាទថា៖«យើង ប្រយ័ត្នឲ្យមែនទែន ជិតដល់កំពង់ហើយ ងើបព្រូឡើង ទូក វា ឃ្លោង។ អ៊ីចឹង នៅឲ្យនឹងសិន ឲ្យទូកដល់ច្រាំង ហើយចាំយើងឡើងទាំងអស់គ្នា»។

ព្រះអង្គ បន្តថា ព្រះអង្គ បានណែនាំឲ្យព្រះសង្ឃនៃគណៈធម្មយុត្តិកនិកាយទៅទូទាំងប្រទេសចូលរួមអនុវត្តតាមវិធានការរបស់រដ្ឋាភិបាលនិងក្រសួងសុខាភិបាល ក្នុងការទប់ស្កាត់ការរាតត្បាតជំងឺកូវីដ-១៩។ ព្រះអង្គ មានព្រះបន្ទូលថា៖«យើង ដើរតាមថ្នាក់ដឹកនាំ មិនឲ្យចេញពីផ្ទះ មិនឲ្យចេញពីវត្ត យើង មិនចេញ...យើង មិនហ៊ានធ្វើឲ្យខុសទេ...។ គណៈធម្មយុត្តិ បានចូលរួម១០០ភាគ [ជាមួយរដ្ឋាភិបាល]...»។

កន្លងមក សម្តេចនាយករដ្ឋមន្រ្តី ហ៊ុន សែន ក៏បានពញ្ញាក់ស្មារតីប្រជាជន ឲ្យបន្តប្រុងប្រយ័ត្ននឹងជំងឺកូវីដ-១៩ ដែរ ហើយមិនត្រូវធ្វេសប្រហែស ដោយសារតែស្ថានភាពជំងឺនេះ ធូរស្រាលឡើយ។

ក្នុងចំណោមអ្នកឆ្លងជំងឺកូវីដ-១៩ ១២២នាក់ មាន១១៩នាក់ហើយ ដែលបានជាសះស្បើយវិញ។ ជាង២សប្តាហ៍មកនេះ កម្ពុជា មិនមានករណីឆ្លងថ្មីនោះទេ៕