ម៉ាឡេស៊ី បើកការរកស៊ីភាគច្រើនឡើងវិញនៅសប្ដាហ៍ក្រោយ តែបន្តអនុវត្តវិធានសុខាភិបាល

COVID-19

អន្តរជាតិ

ម៉ាឡេស៊ី បើកការរកស៊ីភាគច្រើនឡើងវិញនៅសប្ដាហ៍ក្រោយ តែបន្តអនុវត្តវិធានសុខាភិបាល

01, May 2020 , 8:59 pm

រូបភាព

នាយករដ្ឋមន្រ្តីម៉ាឡេស៊ី ម៉ូហ៊ីឌីន យ៉ាស៊ីន ក្នុងសន្និសីទសារព័ត៌មានកន្លងមក។ រូបភាព AFP

ដោយ: តន ចាន់រិទ្ធារ៉ា

នាយករដ្ឋមន្ត្រីម៉ាឡេស៊ី ម៉ូហ៊ីឌីន យ៉ាស៊ីន បានប្រកាសបើកសកម្មភាពសេដ្ឋកិច្ចរបស់ប្រទេសទ្រង់ទ្រាយធំឡើងវិញចាប់ពីសប្ដាហ៍ក្រោយទៅ បន្ទាប់ពីបានបិទអស់ច្រើនសប្ដាហ៍មកដើម្បីទប់ស្កាត់ជំងឺ COVID-19 ។ ក្នុងសេចក្ដីថ្លែងការណ៍តាមទូរទស្សន៍នៅថ្ងៃទី១ ខែឧសភា លោក យ៉ាស៊ីន អះអាងថា ការបន្ធូរបន្ថយនេះ នឹងអនុវត្តតាមគោលការណ៍សុខាភិបាលរបស់ម៉ាឡេស៊ី និងការណែនាំរបស់អង្គការសុខភាពពិភពលោក។

បន្ទាប់ពីបិទប្រទេសតាំងពីខែមីនាមកនោះ រដ្ឋាភិបាលម៉ាឡេស៊ី នឹងអនុញ្ញាតឲ្យការរកស៊ីភាគច្រើនចាប់ផ្ដើមអាជីវកម្មរបស់ខ្លួនឡើងវិញ។ វិធានការបិទប្រទេស បានទម្លាក់ករណីឆ្លង COVID-19 នៅម៉ាឡេស៊ីរហូតដល់អត្រាមួយដែលអាចឲ្យប្រជាជនធ្វើសកម្មភាពឡើងវិញបានមួយភាគធំ។

ក្នុងសារទៅកាន់ប្រជាជនសម្រាប់ទិវាពលកម្មថ្ងៃទី១ ខែឧសភា នាយករដ្ឋមន្ត្រីម៉ាឡេស៊ី ម៉ូហ៊ីឌីន យ៉ាស៊ីន ប្រកាសថា៖ «ជាមួយនឹងយោបល់របស់ក្រសួងសុខាភិបាលដោយផ្អែកលើទិន្នន័យដែលប្រមូលបាន និងការណែនាំសុខាភិបាលរបស់អង្គការសុខភាពពិភពលោក រដ្ឋាភិបាលសម្រេចចិត្តបើកវិស័យសេដកិច្ចវិញដោយប្រុងប្រយ័ត្ន ដោយអនុវត្តតាមនីតិវិធីសុខាភិបាល។»

លោក យ៉ាស៊ីន បន្តថា សកម្មភាពសេដ្ឋកិច្ច និងពាណិជ្ជកម្មភាគច្រើន នឹងត្រូវបានអនុញ្ញាតឲ្យធ្វើប្រតិបត្តិការចាប់ពីថ្ងៃទី៤ ខែឧសភា ហើយអាជ្ញាធរនឹងបន្តត្រួតពិនិត្យវិធានការសុខាភិបាលដដែល។ ចំពោះអាជីវកម្មខ្លះដែលមិនត្រូវបានអនុញ្ញាតឲ្យដំណើរការនោះ ប្រមុខរដ្ឋាភិបាលម៉ាឡេស៊ីរូបនេះពន្យល់ថា សកម្មភាពសេដ្ឋកិច្ច និងជំនួញខ្លះតម្រូវឲ្យមានការជួបជុំទ្រង់ទ្រាយដែលពិបាកដល់ការអនុវត្តគម្លាតសុវត្ថិភាព។

បើតាមការផ្សាយរបស់សារព័ត៌មាន Channel NewsAsia អាជីវកម្មដែលបន្តបិទទ្វារមានហាងម៉ាស្សា ភោជនីយដ្ឋានធំៗ រោងកុន ក្លិបកម្សាន្តរាត្រី សន្និសីទ និងការតាំងពិព័រណ៍។ ចំណែកសកម្មភាពកីឡាខ្លះទៀតដែលតម្រូវឲ្យមានការប៉ះផ្ទាល់ ឬប្រមូលផ្ដុំដែរ ក៏ត្រូវផ្អាកបន្តទៀតដែរដូចជា កីឡាបាល់ទាត់ កីឡាបាល់អោប ការហែលទឹកនៅអាងហែលទឹកសាធារណៈ និងកីឡាក្នុងសាលទាំងអស់។ ប៉ុន្តែកីឡាមួយចំនួនដែលមានគ្នាក្រោម១០នាក់ អាចចាប់ផ្ដើមបានដូចជា តេន្នីស និងការជិះកង់ជាដើម។

ជាមួយគ្នានេះ លោក យ៉ាស៊ីន ប្រកាសទៀតថា ការសូត្រធម៌នៅតាមព្រះវិហារសាសនាឥស្លាមនៅថ្ងៃសុក្រ បន្តបិទដដែល ខណៈការធ្វើដំណើររវាងរដ្ឋ និងរដ្ឋ ក៏ត្រូវហាមឃាត់ដូចគ្នា។ ប្រជាជនម៉ាឡេស៊ីភាគច្រើន មានគម្រោងទៅទីកំណើតនៅថ្ងៃ Aidilfitri ដែលជាពិធីបុណ្យដ៏ធំមួយ ប៉ុន្តែគេក៏បារម្ភថា ការចល័តបែបនេះ នឹងធ្វើឲ្យការឆ្លង COVID-19 រីកប៉ោងឡើងវិញ។

គិតត្រឹមថ្ងៃទី៣០ ខែមេសា ម៉ាឡេស៊ី មានការឆ្លង COVID-19 ចំនួនជាង៦ពាន់ករណី ហើយជិត៧០ភាគរយបានសះស្បើយ៕