COVID-19
អន្តរជាតិ
សិង្ហបុរី នឹងបន្ធូរបន្ថយការរឹតបន្តឹង ក្រោយការឆ្លង COVID-19 ក្នុងសហគមន៍ធ្លាក់ចុះ
ពលករបរទេសម្នាក់អង្គុយរង់ចាំការត្រួតពិនិត្យសុខភាពនៅសិង្ហបុរី។ រូបភាព Xinhua
×![]()
ដោយ: តន ចាន់រិទ្ធារ៉ា
សិង្ហបុរី នឹងចាប់ផ្ដើមបន្ធូរបន្ថយវិធានការរឹតបន្តឹងមួយចំនួនដែលត្រូវបានដាក់ដើម្បីទប់ស្កាត់ការរាលដាលជំងឺ COVID-19 ក្រោយការឆ្លងក្នុងសហគមន៍បានធ្លាក់ចុះជាបន្តបន្ទាប់។ បើតាមគណៈកម្មការទទួលបន្ទុក COVID-19 សិង្ហបុរី ការធ្លាក់ចុះការឆ្លងក្នុងសហគមន៍នេះ ដែលជាលទ្ធផលនៃការរឹតត្បិតសកម្មភាពជាងពីរសប្ដាហ៍មកនេះ។ សកម្មភាពសេដ្ឋកិច្ចមួយចំនួនដែលមានហានិភ័យទាប នឹងត្រូវបានអនុញ្ញាតឲ្យដំណើរការឡើងវិញចាប់ពីសប្ដាហ៍ក្រោយទៅ។
គិតត្រឹមថ្ងៃទី២ ខែឧសភា សិង្ហបុរីមានករណីឆ្លង COVID-19 ចំនួន១៧០១០នាក់ ដែលភាគច្រើនជាកម្មករបរទេសរស់នៅក្នុងបន្ទប់តូចចង្អៀត។ ទោះករណីឆ្លងក្នុងចំណោមពលករបរទេសនៅមានចំនួនច្រើនក្ដី ការឆ្លងក្នុងសហគមន៍បានថយចុះ។ នៅថ្ងៃទី២ ខែឧសភាដដែល សិង្ហបុរីរាយការណ៍ករណីឆ្លងក្នុងសហគមន៍តែ៥ករណីប៉ុណ្ណោះ។
ជាមួយនឹងស្ថានភាពធូរស្រាលក្នុងស្រុក និងការគ្រប់គ្រងស្ថានការណ៍ក្នុងចំណោមកម្មករបរទេសដែលរស់នៅតាមអន្តេវាសិកដ្ឋាននានា រដ្ឋាភិបាលសិង្ហបុរី ក៏ត្រៀមបើកដំណើរការសកម្មភាពខ្លះឡើងវិញ ដើម្បីស្រោចស្រង់សេដ្ឋកិច្ច។ រដ្ឋមន្ត្រីសុខាភិបាលសិង្ហបុរី លោក Gan Kim Yong និយាយក្នុងសន្និសីទសារព័ត៌មាននៅថ្ងៃទី២ ខែឧសភា ថា អាជីវកម្មខ្លះអាចចាប់បើកឡើងវិញចាប់ពីថ្ងៃទី១២ ខែឧសភាតទៅ ហើយការរកស៊ីខ្លះទៀត នឹងត្រូវអនុញ្ញាតឲ្យដំណើរការតាមដំណាក់កាលក្រោយៗ។
អាជីវកម្មអាហារតាមផ្ទះ ហាងអាហារខ្លះ និងក្រុមហ៊ុនផលិតអាហារ ក៏ស្ថិតក្នុងចំណោមអាជីវកម្មដែលត្រូវអនុញ្ញាតឲ្យដំណើរការនៅថ្ងៃទី១២ ខែឧសភាផងដែរ។ នេះបើតាមការបញ្ជាក់របស់លោក Lawrence Wong រដ្ឋមន្ត្រីអភិវឌ្ឍជាតិរបស់សិង្ហបុរីក្នុងសន្និសីទសារព័ត៌មានដដែល។ លោក Wong បន្តថា អាជ្ញាធរក៏នឹងអនុញ្ញាតឲ្យដំណើរការការសិក្សាទល់មុខគ្នារបស់សិស្សផងដែរ ប៉ុន្តែត្រូវមានទំហំតូច និងផ្ដល់អាទិភាពសម្រាប់សិស្សដែលត្រូវប្រឡង ឬអ្នកដែលត្រូវបញ្ចប់ការសិក្សា។
ដោយឡែក ការព្យាបាលតាមបែបបុរាណចិនដូចជាការចាក់ម្ជុល នឹងត្រូវអនុញ្ញាតឲ្យដំណើរមុនគេ គឺនៅថ្ងៃទី៥ ខែឧសភា ព្រមគ្នាការហាត់ប្រាណក្បែរៗផ្ទះនៅតាមតំបន់ខ្លះ ប៉ុន្តែការអនុវត្តគម្លាតសុវត្ថិភាពនៅតែត្រូវបានអនុវត្តដដែល។ ចំណែកសកម្មភាពកីឡាផ្សេងទៀត នៅតែស្ថិតក្រោមការហាមឃាត់ដដែល។ នេះបើតាមការផ្សាយរបស់ទូរទស្សន៍ Channel NewsAsia ។
ទោះជាយ៉ាងណា រដ្ឋាភិបាលសិង្ហបុរី ក៏ព្រមានដែរថា ការលើកលែងការរឹតត្បិតពេលនេះ មិនមែនមានន័យថា សិង្ហបុរីអស់ក្ដីបារម្ភនឹង COVID-19 ឡើយ។ លោក Gan ដែលជាសហប្រធានក្រុមការងារអន្តរក្រសួងដើម្បីឆ្លើយតប COVID-19 លើកឡើងថា បណ្ដុំការឆ្លងថ្មីនៅតែអាចកើតមាន ប្រសិនប្រជាជនបាត់បង់ការការពារ ដូចនេះប្រជាជនសិង្ហបុរីត្រូវបន្តការប្រុងប្រយ័ត្នរបស់ខ្លួន៕
Tag:
សិង្ហបុរី
COVID-19
© រក្សាសិទ្ធិដោយ thmeythmey.com
