COVID-19
អន្តរជាតិ
ទិវាសេរីភាពសារព័ត៌មាន៖ ប្រមុខ UN ស្នើរដ្ឋាភិបាលការពារអ្នកកាសែត និងលើកកម្ពស់សេរីភាពបញ្ចេញមតិ
អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស ក្នុងសន្និសីសារព័ត៌មានកន្លងទៅ។ រូបភាព Xinhua
×![]()
ដោយ: តន ចាន់រិទ្ធារ៉ា
អគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស បានចេញសារអបអរទិវាសេរីភាពសារព័ត៌មានពិភពលោក ថ្ងៃទី៣ ខែឧសភា ដោយបានអំពាវនាវឲ្យមានការការពារអ្នកសារព័ត៌មាន និងអ្នកពាក់ព័ន្ធក្នុងវិស័យនេះ។ លោក ហ្គូតេរ៉េស និយាយថា អ្នកសារព័ត៌មាន មានតួនាទីសំខាន់ក្នុងផ្ដល់ព័ត៌មានពិត និងជាថ្នាំដើម្បីព្យាបាលអ្វីដែលហៅថា ការរាតត្បាតព័ត៌មានក្លែងបន្លំអំឡុងពេលជំងឺ COVID-19 ។
ក្នុងសារវីដេអូដែលចេញផ្សាយនៅថ្ងៃទី២ ខែឧសភា ប្រមុខអង្គការសហប្រជាជាតិ លោក អាន់តូនីញ៉ូ ហ្គូតេរ៉េស បានលើកឡើងពីតួនាទីសំខាន់របស់ប្រព័ន្ធផ្សព្វផ្សាយអំឡុងពេលរាតត្បាតជំងឺ COVID-19 នៅជុំវិញពិភពលោក និងជួយផ្ដល់ព័ត៌មានពិតដើម្បីឈានទៅកាន់ការសម្រេចចិត្តត្រឹមត្រូវ។ បើតាមលោក ហ្គូតេរ៉េស ការសម្រេចចិត្តដោយផ្អែកលើព័ត៌មានច្បាស់លាស់ គឺមានឥទ្ធិពលខ្លាំងព្រោះអាចបណ្ដាលឲ្យមានការស្លាប់ ឬការរស់រានមានជីវិត។
«នៅពេលជំងឺCOVID-19 រាតត្បាត ជំងឺនេះក៏នាំឲ្យមានការកើនឡើងការរាតត្បាតព័ត៌មានក្លែងបន្លំចាប់ពីការណែនាំដែលប៉ះពាល់ដល់សុខភាពរហូតដល់ការសាយភាយទ្រឹស្តីប្លែកៗ។ សារព័តមានជាអ្នកផ្ដល់ថ្នាំបន្សាប គឺព័ត៌មាន និងការវិភាគដែលច្បាស់លាស់ បែបវិទ្យាសាស្ត្រ និងផ្អែកលើការពិត។» លោក ហ្គូតេរ៉េស បញ្ជាក់បែបនេះក្នុងសារវីដេអូរបស់លោក។
ប្រមុខអង្គការសហប្រជាជាតិរូបនេះ បានទទូចឲ្យរដ្ឋាភិបាលប្រទេសទាំងអស់ការពារអ្នកសារព័ត៌មាន និងអ្នកពាក់ព័ន្ធក្នុងវិស័យនេះ និងលើកកម្ពស់សេរីភាពសារព័ត៌មានផងដែរ។ ត្រង់ចំណុចនេះ លោក ហ្គូតេរ៉េស ក៏និយាយដល់វិធានការរឹតបន្តឹងរបស់ប្រទេសនានាដើម្បីការពារការឆ្លងជំងឺ COVID-19 ។ សម្រាប់លោក វិធានការនេះជារឿងសំខាន់ តែក៏មិនត្រូវយកវិធានការនេះទៅរឹតត្បិតសមត្ថភាពរបស់អ្នកសារព័ត៌មានក្នុងការបំពេញការងាររបស់ពួកគេដែរ។
ទាក់ទងបញ្ហានេះ លោក David Kaye អ្នករាយការណ៍ពិសេសសម្រាប់ការលើកកម្ពស់ និងការពារសិទ្ធិ និងសេរីភាពបញ្ចេញមតិ និងយោបល់ និយាយថា លោកបានទទួលព័ត៌មាននៃការសងសឹកលើអ្នកសារព័ត៌មានក្រោមរូបភាពនៃការចែកចាយព័ត៌មានក្លែងបន្លំ។ ចំណែករបាយការណ៍គណៈកម្មាធិការដើម្បីការពារអ្នកកាសែតវិញ បញ្ជាក់ថា អ្នកសារព័ត៌មានយ៉ាងហោចណាស់២៥០នាក់នៅជុំវិញពិភពលោក កំពុងស្ថិតក្រោមការឃុំខ្លួន។
ទោះជាយ៉ាងណា លោក ហ្គូតេរ៉េស បានអរគុណប្រព័ន្ធផ្សព្វផ្សាយដែលផ្ដល់ព័ត៌មានពិត និងការវិភាគ និងចំពោះតួនាទីរបស់ពួកគេក្នុងការតាមដានមេដឹកនាំគ្រប់វិស័យ និងសម្រាប់ការនិយាយការពិត។ លោកក៏ទទួលស្គាល់ដែរថា អ្នកាសែតបានដើរតួនាទីជាអ្នកជួយសង្គ្រោះជីវិតអំឡុងពេល COVID-19 នេះ និងថា ការការពារអ្នកសារព័ត៌មាន ជារឿសំខាន់សម្រាប់អនាគតនៃសន្តិភាព យុត្តិធម៌ និងសិទ្ធិមនុស្សសម្រាប់ទាំងអស់គ្នា៕
Tag:
UN
អាន់តូនីញ៉ូហ្គូតេរ៉េស
អ្នកសារព័ត៌មាន
© រក្សាសិទ្ធិដោយ thmeythmey.com
