ជាតិ
រយៈពេល៤ខែ កម្ពុជានាំចេញអង្ករ ចេក ស្វាយ ដំឡូង ម្រេច...ទៅទីផ្សារអន្តរជាតិបាន២លានតោន រូបថត៖ ពីគណនីហ្វេសហ៊ុកលោក វេង សាខុន(Sakhon Veng) រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ។
× ភ្នំពេញ៖ ក្នុងរយៈពេល៤ខែ ដើមឆ្នាំ២០២០នេះ កម្ពុជានាំចេញផលិតផលកសិកម្មមួយចំនួនដូចជាអង្ករ, ដំឡូងមី, គ្រាប់ស្វាយចន្ទី, ចេក, ស្វាយ និងម្រេច បានជិត២លានតោន ទៅទីផ្សារអន្តរជាតិ។ បើតាមលទ្ធផលនៃនាំចេញផលិតផលកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៣០មេសា ទីផ្សារអន្តរជាតិនៃកសិផលកម្ពុជានោះ មានជាង២០ប្រទេសទាំងក្នុងនិងក្រៅតំបន់។
របាយការណ៍លទ្ធផលនៃការនាំចេញផលិតផលកសិកម្មដដែល បញ្ជាក់ថា ក្នុងរយៈពេលនេះ កម្ពុជានាំចេញអង្ករបានជាង៣០ម៉ឺនតោន ដោយក្នុងនោះនាំទៅចិនបាន១២ម៉ឺនតោន និងទៅអឺរ៉ុបបានជាង៩ម៉ឺនតោន។ ដំឡូងមី(ស្រស់, ម្សៅ, ក្រៀម) នាំចេញបានជិត១,២៧លានតោន, គ្រាប់ស្វាយចន្ទី ជាង១៨ម៉ឺនតោន, ចេក ជិត៩,៧ម៉ឺនតោន, ស្វាយ ជាង៤ម៉ឺនតោន, ម្រេច ជាង២ពាន់តោន និងកសិផលផ្សេងៗទៀត(គ្រាប់ពោត,បន្លែ, សណ្តែកដី, ម្ទេស ថ្នាំជក់) មានជាង៣ម៉ឺនតោន។
ដោយឡែក ទីផ្សារនាំចេញផលិតផលកសិកម្មកម្ពុជា ក្រៅពីចិន និងប្រទេសក្នុងតំបន់អឺរ៉ុប មាន កូរ៉េខាងត្បូង ជប៉ុន ថៃ វៀតណាម ម៉ាឡេស៊ី រុស្សី ហុងកុង អាមេរិក អង់គ្លេស ឥណ្ឌា...។
កាលឆ្នាំ២០១៩ កម្ពុជា បាននាំចេញកសិផលសំខាន់ៗទៅទីផ្សារអន្តរជាតិ ចំនួន៦,៩៣៩,៩៦៨តោន។ ក្នុងនោះ ការនាំចេញស្រូវក្រៅផ្លូវការទៅប្រទេសវៀតណាម មាន២,១៥៥,១០២តោន។
Tag:
អង្ករ
ស្វាយ
ចេក
ដំឡូង
ម្រេច
នាំចេញ
© រក្សាសិទ្ធិដោយ thmeythmey.com