ក្រសួងទេសចរណ៍ ចាប់ផ្ដើម​រៀបចំ​ស្តង់ដារ​អាជីវក​ម្មទេស​ចរណ៍​ថ្មី
COVID-19
ជាតិ
ក្រសួងទេសចរណ៍ ចាប់ផ្ដើម​រៀបចំ​ស្តង់ដារ​អាជីវក​ម្មទេស​ចរណ៍​ថ្មី
03, May 2020 , 4:59 pm        
រូបភាព
រូបភាពពី​ទំព័រហ្វេសប៊ុកក្រសួង​ទេសចរណ៍
រូបភាពពី​ទំព័រហ្វេសប៊ុកក្រសួង​ទេសចរណ៍
​ភ្នំពេញ​៖ ក្នុង​បរិបទ​កូ​វីដ​១៩ បានធ្វើ​ឲ្យ​វិស័យ​ទេសចរណ៍​ជួប​បញ្ហា​ប្រឈម​ក្នុងការ​បាត់បង់​ប្រាក់ចំណូល​។ ក្រសួងទេសចរណ៍ បានចាប់ផ្ដើម​រៀបចំ​ស្ដង់ដា​ថ្មី ក្នុងពេល​កម្ពុជា​កំពុង​ជួបប្រទះ​បញ្ហា​កូ​វីដ​-១៩ សម្រាប់​អាជីវកម្ម​ទេសចរណ៍​ចំនួន ៣ រួមមាន​សេវាកម្ម​ស្នាក់នៅ ម្ហូបអាហារ និង​សេវាកម្ម​ទេសចរណ៍​សហ​គម​ន៍​-​រមណីយដ្ឋាន​ទេសចរណ៍​។ បើតាម​ក្រសួងទេសចរណ៍ ការរៀបចំ​ស្ដង់ដា​ថ្មី​នេះ ដើម្បី​ឲ្យ​វិស័យ​ទេសចរណ៍​មាន​សកម្មភាព​ឡើងវិញ ដោយ​ធានា​នូវ​សុវត្ថិភាព​ជូន​ប្រជាពលរដ្ឋ និង​ភ្ញៀវទេសចរ​។


 
​នៅ​ថ្ងៃទី​៣០ មេសា​កន្លងទៅ រដ្ឋមន្ត្រី​ក្រសួងទេសចរណ៍ លោក ថោង ខុន បាន​ដឹកនាំ​កិច្ចប្រជុំ​រវាង​ក្រសួងទេសចរណ៍ ជាមួយ​វិស័យ​ឯកជន​ក្នុង​វិស័យ​ទេសចរណ៍ ជុំវិញ​ការរក​ដំណោះស្រាយ​លើ​ផលប៉ះពាល់​ក្នុង​វិស័យ​ទេ​ចរណ៍ ដោយសារ​កូ​វីដ​-១៩​។ ក្នុង​កិច្ចប្រជុំ​ខាងលើ លោក ថោង ខុន រដ្ឋមន្ត្រី​ក្រសួងទេសចរណ៍ បានសម្រេច​រៀបចំ​ស្ដង់ដា​អាជីវកម្ម​ទេសចរណ៍​ថ្មី​។​
 
​បើតាម​ទំព័រ​ហ្វេ​ស​ប៊ុ​ក​ផ្លូវការ​របស់​ក្រសួងទេសចរណ៍ ស្ដង់ដា​អាជីវកម្ម​ទេសចរណ៍​ថ្មី​នេះ ផ្ដោតលើ​សេវាកម្ម​ស្នាក់នៅ​, ម្ហូបអាហារ និង​សេវាកម្ម​ទេសចរណ៍​សហ​គម​ន៍​-​រមណីយដ្ឋាន​ទេសចរណ៍​។ ក្រសួងទេសចរណ៍ បញ្ជាក់ថា ស្ដង់ដា​អាជីវកម្ម​ទេសចរណ៍​ថ្មី​នេះ នឹងមាន​ការចេញប្រកាស​ឲ្យ​អនុវត្ត​ជា​ផ្លូវការ​យ៉ាងយូរ​ដាច់​ខែឧសភា ឆ្នាំ​២០២០​។ 
 
​ទាក់ទង​នឹង​សកម្មភាព​របស់​ភ្ញៀវទេសចរ​ធ្វើដំណើរ​កម្សាន្ត​នៅតាម​តំបន់​ទេសចរណ៍​ក្នុងស្រុក​ឡើងវិញ​នេះ ក្រសួងទេសចរណ៍ តម្រូវ​ឲ្យ​ម្ចាស់​អាជីវកម្ម​ទេសចរណ៍​នៅតាម​តំបន់​ទោះ​នោះ ត្រូវ​អនុវត្តតាម​បទបញ្ជា និង​ការណែនាំ​របស់​រដ្ឋាភិបាល និង​ក្រសួងសុខាភិបាល​។ លោក ថោង ខុន បាន​លើកឡើងថា​៖ «​នៅ​ចំពោះមុខ​ដែល​មិនទាន់​ចេញ​ស្ដង់ដា​ថ្មី​ខាងលើនេះ ប្រសិនបើ​មាន​ភ្ញៀវទេសចរ​ទៅ​ទស្សនា ឬ​មាន​តម្រូវការ​សេវាកម្ម​ទេសចរណ៍ មន្ទីរ​ទេសចរណ៍ អាជីវកម្ម​ទេសចរណ៍​ត្រូវ​ទទួលភ្ញៀវ​តាម​ធម្មតា មិន​ថា​ភ្ញៀវទេសចរ​ជាតិ ឬ​ភ្ញៀវទេសចរ​បរទេស​នោះឡើយ​»​។ នេះ​បើតាម​ទំព័រ​ហ្វេ​ស​ប៊ុ​ក​ក្រសួងទេសចរណ៍​។ 
 
​ស្រប​ពេលដែល​កម្ពុជា ជួប​បញ្ហា​កូ​វីដ​-១៩​នេះ ក្រសួងទេសចរណ៍ បន្ត​ក្រើនរំឭក​ដល់​រមណីយដ្ឋាន​ទេសចរណ៍ សហគមន៍​ទេសចរណ៍​នានា ត្រូវ​រៀបចំ​សោភ័ណភាព និង​យកចិត្តទុកដាក់​លើ​ស្ដង់ដា​អនាម័យ ភាព​ស្អាត បន្ទប់​ទឹកស្អាត​ជានិច្ច​។ ដោយឡែក អាហា​រដ្ឋា​ន ភោជនីយដ្ឋាន នៅក្នុង​រមណីយដ្ឋាន​ទេសចរណ៍ សហគមន៍​ទេសចរណ៍ ក៏ត្រូវ​អនុវត្តតាម​កា​រ​ណែនាំ​របស់​ក្រសួងសុខាភិបាល​ផងដែរ​។​
 
​លោក ថោង ខុន ក៏បាន​ព្រមាន​ដល់​ម្ចាស់​អាជីវកម្ម​ទេសចរណ៍​យ៉ាង​ដូច្នេះ​៖ «​ប្រសិនបើ​ម្ចាស់​អាជីវកម្ម​ទេសចរណ៍​ណា​ដែល​មិន​អនុវត្តតាម​គោលនយោបាយ បទបញ្ជា និង​ស្ដង់ដា​សុវត្ថិភាព​អនាម័យ​របស់​រាជរដ្ឋាភិបាល ក្រសួងសុខាភិបាល និង​ក្រសួង​ពាក់ព័ន្ធ​ទេនោះ មូលដ្ឋាន​អាជីវកម្ម​ទេសចរណ៍​ទាំងនោះ នឹងត្រូវ​ប្រឈម​នឹង​ការផ្អាក​សកម្មភាព​អាជីវកម្ម ឬ​ឈានទៅដល់​ការបិទ​អាជីវកម្ម​ទាំងស្រុង​តែម្ដង​»​។ នេះ​បើតាម​ទំព័រ​ហ្វេ​ស​ប៊ុ​ក​ក្រសួងទេសចរណ៍​ដដែល​៕

Tag:
 ទេសចរណ៍​
  ថោង ខុន​
© រក្សាសិទ្ធិដោយ thmeythmey.com